Միջազգային հանրապետական ինստիտուտը սոցիոլոգիական հարցում է անցկացրել՝ պարզելու՝ եթե Եվրամիությանը Հայաստանի անդամակցության հարցով հանրաքվե անցկացվի առաջիկա կիրակի, ինչպես կքվեարկեն քաղաքացիները:
Հարցվածների 49 տոկոսն ասել է, որ կողմ կքվեարկեր, 15 տոկոսը՝ դեմ, 31 տոկոսն ասել է, որ չէր մասնակցի քվեարկությանը, իսկ 5 տոկոսը դժվարացել է պատասխանել հարցին։
Հարցվածների 37 տոկոսը կարծիք է հայտնել, որ Եվրամիությանն անդամակցելու հիմնական առավելությունն անվտանգության ամրապնդումն է, 18 տոկոսն այն կարծիքին է, որ հիմնական առավելությունը տնտեսության հզորացումն է։
Տվյալները հավաքվել են 2025 թվականի հունիսի 16-26-ն ընկած ժամանակահատվածում հեռախոսային հարցման մեթոդով (CATI)։
Ընտրանքը կազմված է 18 տարին լրացած 1,505 ՀՀ քաղաքացիներից և Լեռնային Ղարաբաղից բռնի տեղահանված ԼՂ նախկին բնակիչներից, ովքեր այժմ բնակվում են Հայաստանում (որոնք կարող են լինել կամ չլինել քաղաքացիներ)։
Այն քաղաքացիները, ովքեր ապրել են Հայաստանում ավելի քիչ, քան 6 ամիս, չեն ներառվել ընտրանքում։ Ընտրանքը ներկայացուցչական է բջջային հեռախոս օգտագործող չափահաս բնակչության համար, որը չի ներառում չափահաս բնակչության մոտ 1.7 %-ը։
Հեռախոսահամարներն ընտրվել են պատահական բջջային հեռախոսահամարներին զանգելու եղանակով (random digit dialing, RDD)։
Հարցմանը մասնակցելու ցուցանիշը 25% է: Սխալի միջակայքը չի գերազանցում ±2.5 տոկոսային կետն ամբողջ ընտրանքի համար։
