Հայաստանի Հանրապետության քննչական կոմիտեի նախագահ Արթուր Պողոսյանը մայիսի 23-ին խորհրդակցություն է անցկացրել Արմավիրի մարզային քննչական վարչությունում: Այս մասին տեղեկացնում են ՔԿ-ից:
Արմավիրի մարզային քննչական վարչությունում տեղի ունեցած խորհրդակցությանը մասնակցել են Արմավիրի մարզպետ Արգիշտի Մեխակյանը, տարածքային քննչական վարչությունների գործունեության վերահսկողության գլխավոր վարչության պետի տեղակալ Աշոտ Ժամկոչյանը, հատուկ հանձնարարություններով գլխավոր վարչության պետ Արման Գալստյանը, Արմավիրի մարզային քննչական վարչության պետ Հրաչյա Ղազարյանը, մարզի դատախազ Վահան Սարգսյանը, Ներքին գործերի նախարարության, Ազգային անվտանգության ծառայության մարզային կառույցների ղեկավարներ, մարզային քննչական վարչության քննիչներ։
Հրաչյա Ղազարյանը Քննչական կոմիտեի նախագահին է ներկայացրել 2024 թվականի ընթացքում, ինչպես նաև 2025 թվականի առաջին եռամսյակի ընթացքում Արմավիրի մարզային քննչական վարչության կատարած աշխատանքները։
Արմավիրի մարզային քննչական վարչությունում 2024 թվականի ընթացքում քննվել է 5012 քրեական վարույթ, որից 785-ը փոխանցվել են 2023 թվականից:
5012 քրեական վարույթից 1312-ը՝ 1394 անձի վերաբերյալ մեղադրական եզրակացությամբ ուղարկվել են դատարան, 4-ը՝ 4 անձի վերաբերյալ եզրափակիչ ակտով ավարտվել են, 1653-ը կարճվել են, որից 1244-ը՝ ռեաբիլիտացնող հիմքով, 409-ը՝ ոչ ռեաբիլիտացնող հիմքով, 423-ը՝ միացվել, 112-ը՝ ուղարկվել են այլ մարմիններ, 95-ով կասեցվել է քրեական հետապնդումը, 759-ով ավարտվել են վարութային և ապացուցողական գործողությունները։
Ոչ արդարացնող հիմքով կարճված քրեական վարույթներով ֆիզիկական անձանց պատճառվել է 15 մլն ՀՀ դրամի նյութական վնաս, որից վերականգնվել է 9 մլն 865 հզր ՀՀ դրամը, պետությանը պատճառվել է 9 մլն 391 հզր ՀՀ դրամի նյութական վնաս, որից վերականգնվել է 8 մլն 388 հզր ՀՀ դրամը, իրավաբանական անձանց պատճառվել է 16 մլն 790 հզր ՀՀ դրամի նյութական վնաս, որն ամբողջությամբ վերականգնվել է, համայնքին պատճառվել է 3 մլն 83 հզր ՀՀ դրամի նյութական վնաս, որն ամբողջությամբ վերականգնվել է:
Ընթացիկ քրեական վարույթներով 2024 թվականի ընթացքում վերականգնվել է պետությանը պատճառված 212 մլն 80 հզր ՀՀ դրամի վնասը, իսկ ֆիզիկական անձանց պատճառված վնասից վերականգնվել է 143 մլն ՀՀ դրամը։
Հաշվետու ժամանակահատվածում անչափահասների կողմից կատարված հանցագործությունների դեպքերով քննվել է 32 քրեական վարույթ, որից 5-ը մեղադրական եզրակացությամբ ուղարկվել են դատարան, 15-ը կարճվել են, որից 3-ը՝ ռեաբիլիտացնող, 12-ը՝ ոչ ռեաբիլիտացնող հիմքով, 3-ը միացվել են, 9-ը գտնվում են ընթացքի մեջ:
Քննվել է անչափահասների նկատմամբ կատարված հանցագործությունների վերաբերյալ 109 քրեական վարույթ, որից 15-ը մեղադրական եզրակացությամբ ուղարկվել են դատարան, 50-ը կարճվել են, որից 39-ը՝ ռեաբիլիտացնող, 11-ը՝ ոչ ռեաբիլիտացնող հիմքով, 1-ն ուղարկվել է այլ մարմին, 6-ը միացվել են, 37-ը գտնվում են ընթացքի մեջ:
2024 թվականի ընթացքում քննվել է կոռուպցիոն բնույթի հանցագործությունների վերաբերյալ 61 քրեական վարույթ, որից 5-ը՝ կարճվել են, որից 2-ը` ռեաբիլիտացնող հիմքով, 3-ը` ոչ ռեաբիլիտացնող հիմքով, 13-ը՝ միացվել են, 37-ն ուղարկվել են այլ մարմին, 6-ը փոխանցվել են 2025 թվականի հունվար ամիս։
2024 թվականի դեկտեմբերի 2-ի դրությամբ առկա է եղել 1 տարուց ավելի ժամկետով քննվող 86 քրեական վարույթ, որից 46-ի ընթացքը նույն ամսվա ընթացքում լուծվել է․ 13-ը մեղադրական եզրակացությամբ ուղարկվել են դատարան, 23-ը կարճվել են, 4-ով քրեական հետապնդման ժամկետը կասեցվել է մեղադրյալի գտնվելու վայրը հայտնի չլինելու հիմքով, 6-ը պասիվացվել է:
2025 թվականի հունվարի 1-ից մայիսի 1-ն ընկած ժամանակահատվածում ստորաբաժանումում ավարտվել է մեկ տարուց ավելի ժամկետում քննվող 161 քրեական վարույթ, որից 35-ը մեղադրական եզրակացությամբ ուղարկվել են դատարան, 95-ը կարճվել են, 22-ը պասիվացվել են, 6-ով քրեական հետապնդման ժամկետը կասեցվել է մեղադրյալի գտնվելու վայրը հայտնի չլինելու հիմքով, 3-ն ուղարկվելեն այլ մարմիններ։
2025 թվականի մայիսի 1-ի դրությամբ քննվում է 1 տարուց ավելի ժամկետով 120 քրեական վարույթ:
Արմավիրի մարզային քննչական վարչությունում 2025 թվականի առաջին եռամսյակի ընթացքում քննվել է 1862 քրեական վարույթ, որից 654-ը փոխանցվել են 2024 թվականի դեկտեմբերից, իսկ 1208-ը ստացվել են 2025 թվականի առաջին եռամսյակի ընթացքում:
Քննված 1862 քրեական վարույթից լուծվել է 704 վարույթի ընթացք, որից դատավարական ավարտ են ունեցել 522-ը։
522 քրեական վարույթից 218-ը մեղադրական եզրակացությամբ կամ եզրափակիչ ակտով ուղարկվել են դատարան, 304-ը կարճվել են, որից 263-ը՝ ռեաբիլիտացնող, 41-ը՝ ոչ ռեաբիլիտացնող հիմքով, 90-ը պասիվացվել են, 82-ը՝ միացվել և 13-ն ուղարկվել են այլ մարմին, 1158-ը մնացել են անավարտ։
2025 թվականի ապրիլ ամսին վարչությունում ստացվել է 345 հաղորդում, որից 269-ով նախաձեռնվել է քրեական վարույթ։
Ավարտված քրեական վարույթներով վերականգնվել է պետությանը պատճառված 45 մլն 706 հզր ՀՀ դրամի նյութական վնասը:
Ընթացքի մեջ գտնվող քրեական վարույթներով վերականգնվել է պետությանը պատճառված 177 մլն 218 հզր ՀՀ դրամի նյութական վնասը:
Քննչական կոմիտեի նախագահը խորհրդակցության արդյունքներով հանձնարարել է ուսումնասիրել դատական ակտերի արդարացման հիմքերը, վեր հանել այն դեպքերը, երբ դատական ակտերի արդարացման հիմքում դրվել են օրենքի էական կամ կոպիտ խախտման հիմքով ձեռք բերված ապացույցների անթույլատրելիության հանգամանքը և նախաձեռնել կարգապահական ներգործության միջոցներ:
Արթուր Պողոսյանը հանձնարարել է ակտիվացնել տևական ժամանակ քննվող քրեական վարույթների նախաքննությունը՝ ըստ անհրաժեշտության կիրառելով ներգործության գործուն միջոցներ: Հատկապես ուշադրության կենտրոնում պահել այն քրեական վարույթները, որոնցով առկա է պետությանը պատճառված վնաս և ձեռնարկել քրեադատավարական օրենսդրությամբ նախատեսված միջոցներ՝ պատճառված վնասը վերականգնելու կամ վնասի վերականգնման նպատակով գույքի արգելադրման ուղղությամբ:
Հանձնարարվել է նաև պատշաճ արձագանքել քաղաքացիների դիմում-բողոքներին, անհրաժեշտության դեպքում կազմակերպել դիմումատուների անձնական ընդունելություն:
