ՀՀ վարչապետ Նիկոլ Փաշինյանի և Էստոնիայի վարչապետ Քրիստեն Միխալի հանդիպման ժամանակ, ի թիվս այլ հարցերի, անդրադարձ է եղել նաև աշխարհաքաղաքական և տարածաշրջանային վերջին զարգացումներին։ Այս մասին համատեղ ասուլիսի ժամանակ նշել է ՀՀ վարչապետ Նիկոլ Փաշինյանը։
Նա ընդգծել է՝ ՀՀ-ն հաստատակամ դիրքորոշում ունի՝ հասնելու կայուն խաղաղության մեր տարածաշրջանում։
«Մենք վճռական ենք՝ իրականացնելու այդ ճանապարհին անհրաժեշտ մեր բաժին քայլերը, կրել մեր բաժին պատասխանատվությունը, առկա խնդիրները հարևանների հետ լուծել երկխոսության ու բանակցությունների միջոցով։ Այս համատեքստում ներկայացրել եմ Հարավային Կովկասում խաղաղության գործընթացի հետ կապված վերջին զարգացումները և մեր ակնկալիքը՝ առ այն, որ ՀՀ խաղաղության օրակարգը, ի վերջո, շոշափելի արդյունք կտա։
Շնորհակալություն եմ հայտնել գործընկերոջս Էստոնիայի կողմից Հայաստանի և Ադրբեջանի միջև խաղաղության ու միջպետական հարաբերությունների հաստատման մասին համաձայնագրի տեքստի վերջնական փոխհամաձայնեցումը ողջունելու համար, և վերահաստատել եմ իմ պատրաստակամությունը՝ ստորագրելու արդեն իսկ համաձայնեցված տեքստը՝ նշելով նաև, որ հնարավոր եմ համարում խաղաղության համաձայնագրի հետ միաժամանակ Ադրբեջանի հետ ստորագրել ԵԱՀԿ Մինսկի կոնֆերանսի կառույցների լուծարման համատեղ հայտը»,- նշել է վարչապետը։
