Մարտի 29-ին ՀՀ վարչապետի տիկին Աննա Հակոբյանը ներկա է եղել «Փրկություն» հաշմանդամ երիտասարդների կենտրոնի շահառուների ներկայացմանը: Միջոցառմանը ներկա են եղել նաև Երևանի քաղաքապետի տեղակալ Սարգիս Մադաթյանը, Շենգավիթ վարչական շրջանի ղեկավար Ռազմիկ Մկրտչյանը:
![](/attachments/images/1(1475).jpg)
Ներկայացման թեման Սուրբ Հարության` Զատկի տոնն էր: Կենտրոնի սաները բեմադրել էին Աստվածաշնչից մի հատված, որի ընթացքում պատմում էին Հիսուս Քրիստոսի Հարության մասին: Ներկայացումից հետո սաները հանդես են եկել նաև պարային համարներով: Շահառուներից Ալիկը, որը 43 տարեկան է, Աննա Հակոբյանին է նվիրել իր գեղանկարներից մեկը:
![](/attachments/images/2(383).jpg)
Ներկայացումից հետո վարչապետի տիկինը կազմակերպության ղեկավար Արփինե Աբրահամյանի ուղեկցությամբ շրջել է կենտրոնում, ծանոթացել հնարավորություններին: Կենտրոնն ունի պարի, նկարչության, կավագործության, մաքրամեի, գեղագիտական ձևավորման, տիկնիկագործության խմբակներ, շահառուների համար գործում է ատամնաբուժարան: Շահառուների հետ աշխատում են հատուկ մանկավարժներ, հատուկ հոգեբան, լոգոպեդ՝ պատմել է կենտրոնի ղեկավարը:
![](/attachments/images/3(231).jpg)
Աննա Հակոբյանին իր բացառիկ կարողություններն է ցուցադրել Էդգարը: Ցանկացած ամսաթիվ ասելիս նա կարողանում է հաշվել ու ասել, թե դա շաբաթվա ո՛ր օրն է, ո՛ր թվականին է կրկին այդ օրը եղել և ո՛ր թվականին կլինի: Էդգարն ունի Ասպերգերի համախտանիշ, և իր մոտ զարգացած է թվաբանությունը:
![](/attachments/images/4(125).jpg)
«Փրկություն» հաշմանդամ երիտասարդների կենտրոնը գործում է 25 տարի, ունի անդամագրված 400 շահառու Հայաստանի բոլոր մարզերից: Ցերեկային խնամքի և սոցիալ-վերականգնողական ծառայությունից ամեն օր օգտվում է 67 շահառու:
![](/attachments/images/6(73).jpg)
![](/attachments/images/7(65).jpg)
![](/attachments/images/11(1073).jpg)
![](/attachments/images/44(1).JPG)