ԱՄԷ-ի մշտական ներկայացուցչի տեղակալ և գործերի ժամանակավոր հավատարմատարի պաշտոնակատար Ամեյրա Ալ Հեֆեյտին Հայաստանի նախաձեռնությամբ մեկնարկած ՄԱԿ-ի Անվտանգության խորհրդի նիստում հանդես է եկել հայտարարությամբ՝ կապված Լաչինի միջանցքում և Լեռնային Ղարաբաղում տիրող իրավիճակի հետ։
Հայտարարության մեջ ասվում է.
«Արաբական Միացյալ Էմիրություններն ուշադիր հետևում է Հայաստանի և Ադրբեջանի սահմանին զարգացող իրավիճակին և ի գիտություն է ընդունել վերջին շաբաթվա ընթացքում տարածաշրջանում զարգացումների վերաբերյալ ուղարկված նամակները՝ ինչպես Հայաստանից Անվտանգության խորհրդի նախագահին, այնպես էլ Ադրբեջանից ՝ գլխավոր քարտուղարին։ Մենք նաև ի գիտություն ենք ընդունում Գլխավոր քարտուղարի օգոստոսի 2-ի հայտարարությունը և բարձր ենք գնահատում նրա կոչը՝ նպաստելու կարիքավորներին մարդասիրական օգնության փոխանցմանը։ Ավելին, մենք նշում ենք ՄԱԿ-ի դերը մարդասիրական օգնություն տրամադրելու գործում, ինչպես դա նախատեսված է Գլխավոր վեհաժողովի՝ 46/182 և 58/114 բանաձևերում:
ԱՄԷ-ն ընդգծում է անհրաժեշտ ապրանքների տրամադրման անհրաժեշտությունը, ինչպիսիք են սնունդը, դեղորայքը և վառելիքը, և այդ ապրանքները կարիքավորներին հասցնելու ապահովումը, ինչպես նաև ժամանակին անհրաժեշտ բժշկական օգնության ու խնամքի տրամադրումը: Ավելին, մենք բարձր ենք գնահատում Կարմիր խաչի միջազգային կոմիտեի ջանքերը և ողջունում ենք բժշկական տարհանումների վերսկսումը։
Տիկին նախագահ,
Մենք շարունակում ենք մտահոգված լինել երկու կողմերի միջև առկա լարվածությամբ և ևս մեկ անգամ կոչ ենք անում բոլոր կողմերին լարվածության թուլացում և զսպվածություն ցուցաբերել: Հրամայական է խուսափելը միակողմանի միջոցներից կամ հռետորաբանությունից, որոնք կարող են հանգեցնել սարսափելի մարդասիրական հետևանքների կամ խոչընդոտել կայուն խաղաղությանը հասնելուն:
Ուստի, մենք կոչ ենք անում երկու կողմերին շարունակել իրենց տարաձայնությունները խաղաղ ճանապարհով լուծել երկխոսության և դիվանագիտության միջոցներով` միջազգային իրավունքին, միջազգային նորմերին, ինչպես նաև Միավորված ազգերի կազմակերպության կանոնադրությանը համապատասխան:
Այս համատեքստում, ԱՄԷ-ն խրախուսում է Հայաստանին և Ադրբեջանին շարունակել կառուցողական և բարեխիղճ ներգրավվածությունը շարունակական միջնորդական ջանքերի շրջանակում, որոնք, հուսով ենք, հիմք կդնեն կայուն խաղաղության համար: Ողջունում ենք նաև Հայաստանի և Ադրբեջանի միջև ընթացող բանակցությունները և ակնկալում ենք կոնկրետ քայլեր տեսնել այդ ուղղությամբ։
Տիկին նախագահ,
Հիմա խաղաղության ժամանակն է։ Եվ Հայաստանի և Ադրբեջանի հետ հաղորդակցության մեր բաց ուղիների միջոցով ԱՄԷ-ն կշարունակի աջակցել բոլոր ջանքերին, որոնք նպաստում են երկու երկրների միջև կայունությանը, երկխոսությանը և խաղաղ գոյակցությանը»:
