Հուլիսի 30-ին ուժգին քամու հետևանքով Փրկարար ծառայությունը արտակարգ 52 դեպք է գրանցել, որոնցից 48-ը` Երևանում, երեքը` Կոտայքում, մեկը՝ Արագածոտնում:
Տիգրան Կարապետյան (ՀՀ ՆԳՆ ՓԾ Կոտայքի մարզային փրկարարական ծառայության մայոր) - Շենքի տանիքից որոշ բեկորներ են ընկել ցած, մարդկային կորուստներ չունենք, վնասվել է մեկ մեքենայի հետևի ապակին, եղել է գազի խողովակի հենասյան վնասում, ինչի հետրանքով խողովակն է կախվել, ժամանել է գազի ծառայությունը, վնասները վերացրել, եղել է` նաև մեկ այլ շենքի տանիքից էլի բեկորներ են ընկել:
Իսկ Երևանում մեքենաներից բացի վնասվել են նաև տարբեր հաստության մի քանի տասնյակ ծառեր:
Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը ավելի քան հիսուն տապալված ծառի մասին է պատմում, շուրջ հարյուր ծառ էլ կոտրվել է մասնակի: Մինչև առավոտ հասցրել էին տապալված ծառերից մաքրել երթևեկելի գոտին, իսկ մնացած մասերում ոչ միայն աշխատանքներն են շարունակվում, այլև նոր հասցեների մասին ահազանգեր են ստանում: Բեգոյանի խոսքով` շուրջ 40 միավոր տեխնիկա է աշխատում քաղաքում:
Արմեն Բեգոյան (Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի տնօրեն) - Շատ հաստաբուն ծառեր են, հիմնականում դրանք թեղի և բարդի տեսակի ծառեր են, բազմիցս ասել եմ, որ թեղի տեսակի ծառերը սպառել են իրենց, գտնվում են կենսունակության ավարտին մոտ կամ ավարտել են, կարիք ունեն փոխարինման:
Ծառերի տապալման հիմնական պատճառը տարիքն է, նշում է Բեգոյանը, իսկ բարդիների դեպքում՝ մակերեսային արմատները: ՀՈԱԿ- ի տնօրենի խոսքով` շատ ծառեր, գարնանը չփոխարինվելու դեպքում, նույն ճակատագրին էին արժանանալու, իսկ տապալված ծառերի տեղում, նախատեսվում է նորերը տնկել այս աշնանը: Գարնանը փոխարինված ծառերից էլ դեռևս միայն չորս վնասված սոսիի մասին է հայտնի՝ Եռաբլուր Պանթեոնին հարող անտառում:
Արսեն Հազարապետյան (Կենտրոն և Նորք Մարաշ վարչական շրջանների դենդրոլոգ) - Կենտրոն Վարչական շրջանում ուժեղ քամիների հետևանքով ունենք 30 հասցե, որտեղ ծառեր են տապալվել, հիմնականում տապալվել են թեղի տեսակի ծառեր, բարդի, հացենի:
Ծառերից մեկն էլ Ճանապարհային ոստիկանության տուգանային հրապարակում է ընկել: Ներքին գործերի նախարարությունը վնասված մեքենաների թվի մասին հստակ տվյալներ դեռ չի հրապարակում: «Լուրերի» հետ զրույցում փաստաբան Զորայր Հարությունյանը նշեց` կարգավորող օրենք չկա, բայց տրամաբանական է, որ Հատուկ պահպանության տարածքում գտնվող գույքի վիճակի համար պատասխանատվություն կրում է Ճանապարհային ոստիկանությունը:, իսկ փողոցներում ծառերի տապալումից վնասված մեքենաների փոխհատուցման համար քաղաքապետարանից հայտնում են՝ պետք է դիմել իրենց:
Տապալված ծառերից ստացված փայտանյութն էլ, Արմեն Բեգոյանի պնդմամբ, ձմռանը սոցիալապես անպահով ընտանիքներին կհատկացվի:
Հեղինակ՝ Սիմոն Հովհաննիսյան
