«Քաղաքացիական պայմանագիր» կուսակցությունն արդեն երիտասարդական կառույց ունի։ 15 թեկնածուից 7-ը կհամալրեն խորհդի անդամների կազմը: Կառույցի կազմավորմանը ներկա ՔՊ վարչության նախագահ, վարչապետ Նիկոլ Փաշինյանը պարզաբանեց, թե ինչու կուսակցությունը մինչև հիմա չի ունեցել երիտասարդական կառույց:
Նիկոլ Փաշինյան (ՀՀ վարչապետ) - Մի պարզ պատճառով, որ ՔՊ-ն հենց ինքը եղել է երիտասարդական կազմակերպություն այդ առումով, և մենք հիմա հասկանալիորեն մեծանում ենք, և հընթացս նաև անհրաժեշտություն է առաջանում ունենալ երիտասարդական կազմակերպություն, և դա արտահայտվեց կուսակցության վերջին համաժողովում ընդունված ծրագրում, որտեղ արձանագրված էր, որ կուսակցությունը պետք է ակտիվացնի աշխատանքը երիտասարդների և ուսանողների հետ, և ահա այդ ծրագրային դրույթի կատարման համար մենք ձեռնամուխ ենք լինում Երիտասարդական կազմակերպության ձևավորմանը:
Վարչապետը նշեց, որ բուռն բանավեճեր եղան, թե ինչպես պետք է որոշվի երիտասարդության սահմանագիծը, և ովքեր կարող են լինել կազմակերպության անդամ: Տարիքային շեմը սահմանվեց մինչև 28 տարեկանը, հետագայում այն հնարավոր է` իջեցվի, ասաց Փաշինյանը, հավելեց՝ Երիտասարդական կառույցը պետք է լինի նոր գաղափարների, նոր խմորումների զարգացման վայր: Վարչապետը անդրադարձավ նաև «Քաղաքացիական պայմանագրի» ձևավորմանը՝ նշելով, որ նրանց նպատակն էր Հայաստանում ազատ ընտրությունների և դրանից բխող ժողովրդավարական համակարգերի վերականգնումը:
Նիկոլ Փաշինյան - Դրա համար տեսնում էինք ճանապարհ` ժողովրդական ոչ բռնի, թավշյա հեղափոխության ճանապարհը, որը մեր կուսակցության առաջին, այսպես ասած, նույնիսկ ոչ կուսակցության, հիմնարար փաստաթղթերում արձանագրվել էր, և այս դիտանկյունից էինք մենք նայում, թե ինչն է ճիշտ, ինչը սխալ, և ըստ էության` այդ ռազմավարական հարցը լուծված է, և հետևաբար` հարց է առաջանում` իսկ որն է ռազմավարական հարցը, որի պատասխանը մենք այսօր պետք է գտնենք, և որը ես կուզենայի առաջադրել նաև մեր Երիտասարդական կազմակերպությանը, իսկ իմ կարծիքով` հարցը հետևյալն է. հիմա ներքաղաքականից կտրուկ անցում կկատարեմ ավելի գլոբալ հարթության, իսկ հարցը հետևյալն է` արդյոք մենք ուզու՞մ ենք, որ ՀՀ-ն այս տարածաշրջանում որպես անկախ և ինքնիշխան պետություն գոյություն ունենա, և ուզու՞մ ենք մենք արդյոք Հայաստանը պատրաստել այս տարածաշրջանում գոյության հարատևման՝ առանց, պատկերավոր ասած, հովանավորությունների:
Վարչապետն ընդգծեց` նպատակը Հայաստանի նկատմամբ թշնամանքի նվազեցումն ու այն կառավարելի դարձնելն է:
Նիկոլ Փաշինյան - Ես կարծում եմ, որ մեր երիտասարդական կազմակերպությունը չպետք է զբաղվի, պատկերավոր ասած, երիտասարդական հարցերով, մեր երիտասարդական կազմակերպությունը պետք է զբաղվի ռազմավարական հարցերով, որովհետև դուք չեք էլ նկատի, թե ոնց անցավ, և եկավ այն ժամանակը, որտեղ դուք այդ հարցերին առնչվում եք ոչ թե որպես երիտասարդներ և երիտասարդական կազմակերպություն, այլ որպես անմիջական պատասխանատուներ, ովքեր բազմաթիվ ծանր հարցերի վերաբերյալ պետք է որոշումներ կայացնեն, բայց մյուս կողմից` ես չեմ ուզում, որ մենք ամեն ինչ ավելի ծանրացնենք, քան ինքը ծանր է ինքը իրենով, ընդհակառակը` ես հույս ունեմ, որ երիտասարդական կազմակերպության ձևավորմամբ ՔՊ կուսակցություն կներմուծվի մի նոր երիտասարդական ավյուն, էներգիա, աշխուժություն:
Նիկոլ Փաշինյանը նշեց` քաղաքական խնդիրներից առաջիկայում ամենակարևոր անելիքը Երևանի ավագանու ընտրություններն են, և կարևորեց երիտասարդական կառույցի ակտիվ մասնակցությունը դրան:
Երևանի քաղաքապետի տեղակալ Տիգրան Ավինյանը նշեց, որ նախկինում ընդդիմադիր ուժերի առաջ քաշած պայքարի ձևերն ու թեզերը մերժելն ու հարմարվող չլինելն է նպաստել թավշյա հեղափոխությանը:
Տիգրան Ավինյան (Երևանի քաղաքապետի տեղակալ) - Երբեք մի եղեք հարմարվող, հարմարվողականությունը քանդում է ոչ միայն մշակույթը, այլև քաղաքականությունը ..... այո, բանիմաց լինելը, աշխարհ տեսած լինելը շատ կարևոր է, և քաղաքական պրոցեսներով անցած լինելը շատ կարևոր է, փորձը շատ կարևոր է, բայց գաղափարական հենքն ու կամքը ամենից կարևոր են:
Երիտասարդական կառույցի խորհրդի անդամների ընտրության արդյունքները կհրապարակվեն վաղը:
Հեղինակ` Լիանա Խաչատուրյան
