2-րդ բանակային կորպուսի հրամանատար գեներալ-մայոր Արայիկ Հարությունյանը և գնդապետ Վիգեն Սիմոնյանը կմնան կալանքի տակ: Դատարանը երկարաձգեց նրանց խափանման միջոցը: Ամբաստանյալները մեղադրվում են մարտական հերթապահության կրման կանոնները խախտելու համար, նրանք անցնում են Գեղարքունիքում Ադրբեջանի կողմից ՀՀ տարածքների օկուպացման գործով: Նիստը տեսանկարահանել «Լուրերին» չթույլատրվեց. դեմ էին ամբաստանյալները:
Գեղարքունիքի մարզի ընդհանուր իրավասության դատարանի Սևանի նստավայրում առաջին դատական նիստին Արայիկ Հարությունյանի պաշտպան Դավիթ Մելքոնյանը նշեց՝ մեղադրանքում նկարագրված մարտական դիրքեր չտեղադրելու հանգամանքը որևէ կապ չունի մարտական հերթապահության կրման կանոնների պահպանման հետ:
Դավիթ Մելքոնյան (Արայիկ Հարությունյանի պաշտպան) - Նախաքննության մարմինը մարտական դիրքը նույնականացրել է մարտական հերթապահության հետ, մինչդեռ մարտական հերթապահության կրման կանոնները կարող են խախտել միայն մարտական դիրքում:
Արայիկ Հարությունյանի պաշտպան Դավիթ Մելքոնյանը բացարկի, ինքնաբացարկի, ապա քրեական հետապնդումը դադարեցնելու միջնորդություններ ներկայացրեց:
Դավիթ Մելքոնյան - Տասնյակ վկաների ցուցմունքներ կամ ամբողջությամբ նույնանում են, նույնական են ոչ միայն ցուցմունքների տեքստային շարադրանքը, այլ նաև ցուցմունքում թույլ տրված տառասխալներն ու տպագրական վրիպակները: Տպավորություն է ստեղծվում, որ քննիչը նախապես ունեցել է ցուցմունքի տեքստը և հարցաքննվողներին պարզապես ստորագրել է տվել այն:
Դատախազը, ըստ պաշտպանական կողմի, տեսնելով, որ մասսայական ցուցմունքների կրկնօրինակում է եղել, աչք է փակել: Ըստ կողմի՝ դատախազն այս գործով անաչառ և անկողմնակալ չէ, ուստի բացարկի միջնորդություն ներկայացրին:
Միջնորդության վերաբերյալ դիրքորոշում հայտնեց հանրային մեղադրողը:
Գևորգ Մղդեսյան (հանրային մեղադրող) - Պաշտպանները մեծ պաթոսով, խառը գույներով ներկայացրին նախաքննության կատարման ընթացքը: Ըստ էության` միջնորդության մեջ ամեն ինչից խոսվեց, բացի կոնկրետ փաստերից, թե հստակ քրեական դատավարության օրենսգրքի որ կետն է խախտվել:
Մեղադրողն ասաց՝ կատարված տառասխալները և նույնական լինելը հիմնականում վերաբերում են ոչ թե պատասխաններին, այլ հարցերին:
Գևորգ Մղդեսյան - Չեմ բացառում, որ պատասխանները կարող են լինել նույնական, բայց այն պատճառով, որ հարցաքննվել են այնպիսի անձինք, ովքեր 24 ժամ տարիներ ի վեր կենցաղ են կիսել:
Դատարանը մերժեց բացարկի միջնորդությունը: Այս որոշումից հետո էլ պաշտպանն ինքնաբացարկի միջնորդություն ներկայացրեց նախագահող դատավոր Արամ Մարտիրոսյանին: Ըստ նրա՝ գործով ենթադրյալ խախտում տված քննիչն ու դատավորը համակուրսեցիներ են:
Դավիթ Մելքոնյան - Մեր ունեցած տեղեկություններով` դուք ունեք մոտ, ընկերական հարաբերություններ և հանդիսանում եք ընկերներ, այդ թվում նաև Ֆեյսբուքում: Հետևաբար, դուք կանխակալ վերաբերմունք ունեք դատավարության մասնակիցներից մեկի՝ քննիչ Աշոտ Վարդանյանի նկատմամբ:
Մեղադրողն առարկեց միջնորդության դեմ:
Գևորգ Մղդեսյան - Մի փոքր զավեշտալի իրավիճակ է ստացվում, եթե չեմ սխալվի, 1 ժամ 55 րոպե առաջ Դուք հարցրիք` իմ վերաբերյալ ինքնաբացարկի միջնորդություն ունեք, թե չէ, ոչ մի ձայն չեղավ, հենց դատախազի նկատմամբ պետք է բացարկը բավարարվեր կամ մերժվեր, 1 ժամ 55 րոպե հետո հիշեցին, որ Դուք հանդիսացել եք քննիչ Աշոտ Վարդանյանի... բայց որ հանկարծ բավարարեիք միջնորդությունը, դա չէր հիշվելու, լինելու էիք անաչառ, անկողմնակալ դատարան:
Դատարանն այս միջնորդությունը եւս մերժեց, նշեց՝ քննիչի հետ թեև համակուրսեցիներ են եղել, սակայն նրա հետ ավելի քան 2 տարի շփում չեն ունեցել և չի էլ իմացել` որտեղ է աշխատում:
Պաշտպանի երրորդ միջնորդությունն էլ Արայիկ Հարությունյանի նկատմամբ քրեական հետապնդումը դադարեցնելուն էր վերաբերում, որը դատարանը կրկին մերժեց:
Վիգեն Սիմոնյանի պաշտպանն էլ միջնորդեց գնդապետի նկատմամբ ընտրել խափանման միջոցների համակցություն, այդ թվում` գրավ՝ 5 մլն դրամի չափով: Նշեց՝ Վիգեն Սիմոնյանի խնամքին է ընտանիքը, ունի առողջական խնդիրներ, դատարանին ներկայացրեց մի շարք պատվոգրեր: Ըստ Սիմոնյանի պաշտպանի՝ գործի նախաքննությունը տևել է 2 տարի, իսկ Սիմոնյանին մեղադրանք ներկայացվել՝ 2 ամիս առաջ:
Արթուր Պետրոսյան (Վիգեն Սիմոնյանի պաշտպան) - Այս ամբողջ ընթացքում Վիգեն Սիմոնյանը հնարավորություն ունեցել է, և մեղադրողի նշած հեղինակությունը թույլ էր տալիս, որպեսզի նա միջամտեր: Բայց էդ ամբողջ ընթացքում նա որևէ կերպ չի առնչվել:
Մեղադրողը մինչդեռ պնդեց՝ գնդապետը, ինչպես գեներալ-մայորը, հանցանքի կատարման ժամանակ գործել է ի պաշտոնե, և կան նրան կալանքի տակ պահելու հիմքեր:
Գեներալ մայոր Արայիկ Հարությունյանը նիստի ընթացքում նաև հանդես եկավ ելույթով, և պաշտպանը հրապարակեց գաղտնի տեղեկություն, բայց այդ ամենը դատարանը որոշմամբ կատարվեց դռնփակ ռեժիմում: Այն տևեց մոտ 4 ժամ:
