ՌԴ-Ն ԵՎ ՈՒԿՐԱԻՆԱՆ ԻՐԱԿԱՆԱՑՐԵԼ ԵՆ ԳԵՐԻՆԵՐԻ ՓՈԽԱՆԱԿՈՒՄ
Ռուսաստանի պաշտպանության նախարարությունը տեղեկացրել է, որ ուկրաինական գերությունից 45 զինվորական է վերադարձել:
«Բոլոր ազատվածներին ցուցաբերվում է անհրաժեշտ բժշկական և հոգեբանական օգնություն, նրանք կտեղափոխվեն Ռուսաստանի պաշտպանության նախարարության բժշկական հաստատություններ՝ բուժում և վերականգնում անցնելու համար»,- ասված է հաղորդագրության մեջ:
Ուկրաինայի նախագահի գրասենյակի ղեկավար Անդրեյ Երմակն էլ հայտնել է գերությունից 45 ուկրաինացի զինծառայողի և երկու քաղաքացիական անձի վերադարձի մասին:
ԶԵԼԵՆՍԿԻՆ ԷՐԴՈՂԱՆԻ ՀՐԱՎԵՐՈՎ ԿԱՅՑԵԼԻ ԹՈՒՐՔԻԱ
Ուկրաինայի նախագահ Վոլոդիմիր Զելենսկին էլ հայտարարել է, որ ԱՄՆ-ի և եվրոպական երկրների ղեկավարների հետ զրույցներում առաջարկել է ավելի վաղ սկսել հակահարձակումը և փորձել է դրա համար զենք ձեռք բերել: Զելենսկին այսօր այցելել է Սոֆիա և Բուլղարիայի վարչապետ Նիկոլայ Դենկովի հետ ստորագրել պաշտպանության ոլորտի գործակցության խորացմանն ուղղված հուշագիր: Նա Բուլղարիային հրավիրել է մասնակցելու Ուկրաինայի վերականգնմանը:
Թուրքիայի լրատվամիջոցների տվյալով էլ՝ Զելենսկին Էրդողանի հրավերով հուլիսի 7-ին կայցելի Թուրքիա և Ստամբուլում կհանդիպի թուրք գործընկերոջը։ Հանդիպումը կկայանա Վիլնյուսում ՆԱՏՕ-ի գագաթնաժողովին ընդառաջ։
ՆԵԹԱՆՅԱՀՈՒՆ ԱՌԱՋԻԿԱՅՈՒՄ ՀԱՎԱՆԱԲԱՐ ԿՄԵԿՆԻ ԹՈՒՐՔԻԱ. ԿՈՀԵՆ
Իսրայելի արտգործնախարար Էլի Կոհենը խոսել է Իսրայելի և Թուրքիայի միջև հարաբերություններում «նոր դարաշրջանի մասին»: Նա հայտարարել է, որ առաջիկայում Իսրայելի վարչապետ Նեթանյահուն հավանաբար կմեկնի Թուրքիա՝ նախագահ Էրդողանի հետ հանդիպում անցկացնելու համար: Կոհենն անդրադարձել է նաև Թել Ավիվում Ադրբեջանի դեսպանատան բացմանը՝ այն անվանելով «եզակի ձեռքբերում», քանի որ Ադրբեջանը շիա իսլամական առաջին պետությունն է, որը դիվանագիտական ներկայացուցչություն է բացել Իսրայելում:
ԲԼԻՆՔԵՆԸ ՀԵՌԱԽՈՍՈՎ ԶՐՈՒՑԵԼ Է ԹՈՒՐՔԻԱՅԻ ԱԳ ՆԱԽԱՐԱՐԻ ՀԵՏ
ԱՄՆ պետքարտուղար Էնթոնի Բլինքենը հեռախոսազրույց է ունեցել Թուրքիայի արտգործնախարար Հաքան Ֆիդանի հետ, քննարկել Վիլնյուսում կայանալիք ՆԱՏՕ-ի գագաթնաժողովը: Այդ մասին հայտնել են ԱՄՆ պետքարտուղարության մամուլի ծառայությունը։ Բլինքենն ընդգծել է ՆԱՏՕ-ի միասնության կարևորությունը և կոչ արել Թուրքիային աջակցելու Շվեդիայի անդամակցությանը դաշինքին։ Քննարկվել է նաև Սևծովյան հացահատիկային նախաձեռնության ընդլայնման կարևորությունը:
ԱՐԴՅՈՒՆԱՎԵՏ ՔՆՆԱՐԿՈՒՄ ԵՄ ՈՒՆԵՑԵԼ ԱԼԻԵՎԻ ՀԵՏ. ԱԲԴՈԼԼԱՀԻԱՆ
Իրանի արտաքին գործերի նախարար Հոսեյն Ամիր Աբդոլլահիանը Twitter-ի իր միկրոբլոգում գրել է, որ Բաքվում կառուցողական, հանգամանալից և արդյունավետ քննարկում է ունեցել Ադրբեջանի նախագահ Իլհամ Ալիևի հետ:
«Ակնկալվում է, որ այս հստակ և անկեղծ երկխոսության արդյունքները նոր գլուխ կբացեն երկու բարեկամ, եղբայրական և հարևան երկրների՝ Իրանի և Ադրբեջանի հարաբերություններում և կհիասթափեցնեն երկու երկրների թշնամիներին ու չարակամներին»,- նշել է Իրանի ԱԳ նախարարը։
Աբդոլլահիանը Բաքվում մասնակցել է Չմիավորման շարժման համակարգող բյուրոյի նախարարական հանդիպմանը, որի շրջանակում էլ հանդիպում է ունեցել Ալիևի հետ։ Օրակարգում են եղել տարածաշրջանային զարգացումները, Բաքու-Թեհրան երկկողմ հարաբերությունները:
Իրանի գլխավոր դիվանագետն ընդգծել է, որ Թեհրանն աջակցում է Հարավային Կովկասում վեճերի խաղաղ կարգավորմանը և տարածաշրջանում հաղորդակցությունների բացմանը: Սակայն Աբդոլլահիանը ևս մեկ անգամ շեշտել է՝ Իրանը դեմ է և միշտ դեմ է եղել տարածաշրջանում սահմանների փոփոխությանը: