ԱԴՐԲԵՋԱՆՑԻ ԶԻՆԾԱՌԱՅՈՂՆԵՐՆ ԱՌԱՋԽԱՂԱՑՄԱՆ ՓՈՐՁ ԵՆ ԿԱՏԱՐԵԼ
Ադրբեջանը շարունակում է տարբեր սադրանքների միջոցով խնդիրներ ստեղծել Արցախի բնակչության համար և Հայաստանի հետ սահմանին: Հայաստանի ԱԱԾ սահմանապահ ծառայության հաղորդմամբ` առավոտյան` ժամը 8:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են արել՝ Հայաստանի տարածքում դրոշ տեղադրելու նպատակով: Հայկական կողմը կանխել է այդ փորձը:
Տելեգրամյան ալիքներում տարածված տեսանյութերում երևում է, թե ինչպես են ադրբեջանցիները ժամը 12-ի սահմաններում երկրո՛րդ անգամ անխոչընդոտ մոտենում կամրջի եզրին և իրենց դրոշը բարձրացնում: Ընդ որում, այդ գործընթացին հետևում է Ռուսաստանի խաղաղապահ առաքելության ղեկավար Լենցովը, իսկ խաղաղապահները կենդանի պատ են կազմում: Քիչ անց ռուսները մոտեցնում են նաև զրահատեխնիկա: Ավելի ուշ, հայկական կողմը լիկվիդացրել է ադրբեջանական դրոշը:
ՏԵՂԻ ՀԱՏՎԱԾՈՒՄ ԿՐԱԿԻ ՀԵՏԵՎԱՆՔՈՎ ՎԻՐԱՎՈՐՎԵԼ Է ԱԱԾ ՍԾ ԶԻՆԾԱՌԱՅՈՂ
Հայաստանի պաշտպանության նախարարությունը հայտնել է, որ ժամը 11:45-ին Ադրբեջանի զինված ուժերի ստորաբաժանումները կրակել են Տեղի հատվածում տեղակայված հայկական դիրքերի ուղղությամբ՝ կիրառելով նաև ականանետ: Դրա հետևանքով, ինչպես հայտնել է Ազգային անվտանգության ծառայությունը, վիրավորվել է ԱԱԾ սահմանապահ ծառայության զինծառայող:
ԱԴՐԲԵՋԱՆՆ ԱՐԳԵԼԵԼ Է ՀՈՒՄԱՆԻՏԱՐ ՓՈԽԱԴՐՈՒՄՆԵՐԸ ԼԱՉԻՆԻ ՄԻՋԱՆՑՔՈՎ
Ինչպես հայտնում է Արցախի տեղեկատվական շտաբը՝ Ադրբեջանն արգելել է բոլոր հումանիտար փոխադրումները Լաչինի միջանցքով: Կարմիր խաչի միջազգային կոմիտեի կողմից 25 բուժառու և նրանց հարազատներ տեղափոխվում էին Արցախից Հայաստան, սակայն միջանցքում գործող ապօրինի անցակետում արգելվել է մեքենաների հետագա տեղաշարժը՝ նրանց ստիպելով վերադառնալ Ստեփանակերտ: Բացի այդ, չեղարկվել է այսօր նախատեսված Ստեփանակերտ-Գորիս-Ստեփանակերտ երթուղով տասնյակ անձանց ուղևորափոխադրումը հումանիտար հրատապ կարիքներից ելնելով, որը պետք է տեղի ունենար ռուս խաղաղապահների կողմից: Կասեցվել է նաև հումանիտար բեռնափոխադրման նպատակով Գորիս մեկնող ռուս խաղաղապահների բեռնատարների շարժը:
Արցախի իշխանությունն արձանագրել է, որ Լաչինի միջանցքում տեղադրված ապօրինի անցակետն ինքնին մեծագույն վտանգ ու խոչընդոտ է Արցախի և Հայաստանի միջև ազատ տեղաշարժի ապահովման հարցում: Այսօրվա միջադեպը վերստին հաստատում է այդ վտանգների ու խոչընդոտների առկայությունը: Ստեփանակերտը վերահաստատել է դիրքորոշումը, որ անհապաղ պետք է ապահովվի 2020թ. նոյեմբերի 9-ի եռակողմ հայտարարությամբ նախատեսված Լաչինի միջանցքի ռեժիմը՝՝ առանց ադրբեջանական որևէ միջամտության ու կատարվի ՄԱԿ Արդարադատության միջազգային դատարանի փետրվարի 22-ի որոշումը:
ԱԴՐԲԵՋԱՆԸ ՇԱՐՈՒՆԱԿՈՒՄ Է ԱՊԱՏԵՂԵԿՈՒԹՅՈՒՆ ՏԱՐԱԾԵԼ
Ադրբեջանական կողմը երեկ էլ կրակել էր Արցախի Մարտունու շրջանի Մաճկալաշեն և Ճարտար համայնքներում գյուղատնտեսական աշխատանքներ կատարող բնակիչների ուղղությամբ: Այդ փաստը Բաքուն փաստը փորձել էր հիմնավորել` խեղաթյուրելով իրականությունը, թե իբր տեղում ինժեներական աշխատանքներ են իրականացվել: Ստեփանակերտը հերքել է այդ լուրերը, նաև անդրադարձել Բաքվի տարածած այն ապատեղեկությանը, թե Պաշտպանության բանակի ստորաբաժանումներն առավոտյան կրակել են Արցախի Մարտունու շրջանի օկուպացված տարածքներում տեղակայված ադրբեջանական դիրքերի ուղղությամբ։
ԱԴՐԲԵՋԱՆՑԻՆԵՐՆ ԱՎԵՐԵԼ ԵՆ ՀԱԼԻՎՈՐԻ ԿԱՄՈՒՐՋԸ
Ռազմական սադրանքներին զուգահեռ` ադրբեջանական կողմը հերթական վանդալիզմն է իրականացրել: «Կովկասի ժառանգության մշտադիտարկում» կայքը հրապարակել է արբանյակի արած լուսանկարներ, թե ինչպես են ադրբեջանցիներն ավերել Հալիվորի կամուրջը։ Այն գտնվում է Հադրութի շրջանի Մեծ Թաղեր գյուղից 2 կմ հարավ-արևմուտք` Իշխանագետի վրա: 1835թ-ի կառույցը Իշխանագետի և նրա վտակների վրայի 6 կամուրջներից մեկն է:
Հեղինակներ` Նորայր Շողիկյան, Նիկոլայ Ավետիսյան
