ՖԻՆԼԱՆԴԻԱՆ ԴԱՐՁԱՎ ՆԱՏՕ-Ի 31-ՐԴ ԱՆԴԱՄԸ
Ֆինլանդիան դարձավ ՆԱՏՕ-ի 31-րդ անդամը: Երկրի արտաքին գործերի նախարարը ստորագրել է ՆԱՏՕ-ին միանալու մասին փաստաթուղթը։ Ֆինլանդիայի արտգործնախարարության դիմաց երկրի դրոշի հետ այսօր ծածանվում է արդեն Հյուսիսատլանտյան դաշինքի դրոշը: Ֆինլանդիայի դրոշն ավելացվել է նաև ՆԱՏՕ-ի կնետրոնակայանում՝ մյուս անդամ երկրների դրոշների կողքին: «Այսօր մեծ օր է Ֆինլանդիայի համար» ՝ հայտարարել է Ֆինլանդիայի պաշտպանության նախարարը՝ ընդգծելով, որ իր երկիրը երկար ու քրտնաջան աշխատել է լիարժեք անդամակցության հասնելու համար:
Անտի Կայկոնեն նշել է, որ հաջորդ նպատակը ՆԱՏՕ-ին Շվեդիային լիիրավ անդամակցությունն է: Նա հույս է հայտնել, որ այդ երկիրը ևս շուտով կդառնա հյուսիսատլանտյան դաշինքի անդամ: ՆԱՏՕ-ի գլխավոր քարտուղարը նույնպես հույս է հայտնել, որ դաշինքին Շվեդիայի անդամակցության պահը հեռու չէ: «Մենք կապահովենք, որ Շվեդիան նույնպես դառնա լիիրավ անդամ»՝ նշել է Ենս Ստելտենբերգը: ՆԱՏՕ-ի գլխավոր քարտուղարն անդրադարձել է նաև Ֆինլանդիայի տարածքում դաշինքի զորքերի տեղակայման թեմային, շեշտել՝ Հյուսիսատլանտյան դաշինքը ոչ մի զորք չի տեղակայի Ֆինլանդիայում՝ առանց այդ երկրի թույլտվության։ Նա ընդգծել է, որ Ֆինլանդիայի անդամակցությունը ՆԱՏՕ-ին տալիս է զարգացած ռազմական արդյունաբերություն և պրոֆեսիոնալ բանակ։ Ստոլտենբերգն ընդգծել է, որ այդ երկրի վրա այսուհետ կտարածվի Վաշինգտոնի պայմանագրի 5-րդ հոդվածը, որի համաձայն՝ հարձակումը դաշինքի անդամ երկրներից որևէ մեկի վրա նշանակում է հարձակում ողջ դաշինքի վրա: «Այսպիսով, Ֆինլանդիան ՆԱՏՕ-ից կստանա անվտանգության երկաթյա երաշխիքներ»,- ասել է գլխավոր քարտուղարը։
ՖԻՆԼԱՆԴԻԱՅԻ ՄՈՒՏՔԸ ՆԱՏՕ ԻՐԱՎԻՃԱԿԻ ՀԵՐԹԱԿԱՆ ՍՐՈՒՄՆ Է. ՊԵՍԿՈՎ
ՆԱՏՕ-ին Ֆինլանդիայի անդամանկցության փաստին անդրադարձել են Մոսկվայից: Ֆինլանդիայի մուտքը ՆԱՏՕ՝ իրավիճակի հերթական սրումն է։ Դաշինքի ընդլայնումը ոտնձգություն է Ռուսաստանի անվտանգության դեմ՝ հայտարարել է Ռուսաստանի նախագահի մամուլի խոսնակ Դմիտրի Պեսկովը՝ ընդգծելով, որ ռուսական կողմին ստիպում են հակաքայլեր ձեռնարկել։ Պեսկովը նշել է սակայն, որ Ֆինլանդիայի իրավիճակը արմատապես տարբերվում է Ուկրաինայի իրավիճակից։
Ռուսաստանի արտգործնախարարությոնը նույնպես հայտարարություն է տարածել, որում ասվում է, թե Մոսկվան հարկադրված է լինելու պատասխան միջոցներ ձեռնարկել՝ ինչպես ռազմատեխնիկական, այնպես էլ այլ բնույթի, որպեսզի կասեցվեն երկրի ազգային անվտանգության սպառնալիքները։ Ռուսաստանի հյուսիս-արևմտյան սահմաններին պաշտպանական ենթակառուցվածքների շինարարության կոնկրետ քայլերը կախված կլինեն Հյուսիսատլանտյան դաշինքին Ֆինլանդիայի ինտեգրման պայմաններից, ներառյալ ՆԱՏՕ-ի ռազմական ենթակառուցվածքների Ֆինլանդիայի տարածքում տեղակայումից:
Ռուսաստանի պաշտպանության նախարար Սերգեյ Շոյգուն էլ նշել է, որ Ֆինլանդիայի անդամակցությունը ՆԱՏՕ-ի ռազմական դաշինքին և ՆԱՏՕ-ի՝ սեփական մարտունակությունը բարձրացնելու ձգտումը, մեծացրել են հակամարտությունների վտանգը։ Շոյգուն նաև հայտնել է, որ բելառուսական գրոհային ինքնաթիռներից որոշները ստացել են հնարավորություն թշնամական թիրախներին հարվածել միջուկային զենքով, բացի այդ, բելառուսական զորքերին տրվել է «Իսկանդեր Մ» համակարգը, որը հնարավորություն է տալիս օգտագործել միջուկային հրթիռներ։
ԲՈՐԵԼԸ ՊԼԱՆԱՎՈՐՈՒՄ Է ՀԱՋՈՐԴ ՇԱԲԱԹ ԱՅՑԵԼԵԼ ՉԻՆԱՍՏԱՆ
Չինաստանը բարոյական պարտավորություն ունի նպաստելու Ուկրաինայում խաղաղության հաստատմանը և չպետք է աջակցի Ռուսաստանն՝ հայտարարել է ԵՄ արտաքին քաղաքականության ղեկավար Ժոզեպ Բորելը՝ Բրյուսելում ԱՄՆ պետքարտուղար Էնթոնի Բլինքենի հետ հանդիպումից հետո: ԵՄ-ի դիվանագիտության ղեկավարը նաև հայտնել է, որ պլանավորում Է Չինաստան այցելել հաջորդ շաբաթ։ Եվրահանձնաժողովի ղեկավարն այսօր Պեկին կժամանի Ֆրանսիայի նախագահի հետ, Իսպանիայի վարչապետն այնտեղ է եղել անցած շաբաթ, և ես նույնպես կմեկնեմ հաջորդ շաբաթ»,- ասել է Բորելը՝ ամփոփելով Բլինքենի հետ երկկողմ բանակցությունները։ ԱՄՆ-ը և ԵՄ-ն շարունակում են համագործակցել՝ համոզվելու, որ Ուկրաինան կարող է պաշտպանել իրեն: Եվրոպացի գործընկերները 13 միլիարդ դոլար են հատկացրել Ուկրաինային ռազմական օգնության համար, միլիարդավոր դոլարների մարդասիրական և տնտեսական օգնություն, օգնել են ուկրաինացի փախստականներին»,- նշել է ԱՄՆ պետքարտուղարը: Բլինքնեը նաև ընդգծել է, որ Վաշինգտոնն ու Բրյուսելը քննարկել են ռուսական էներգիայից եվրոպայի կախվածությունը նվազագույնի հասցնելու ուղինեը: ԱՄՆ-ի պետքարտուղարի խոսքով վերջին մեկ տարվա ընթացքում Միացյալ Նահանգները և Եվրոպան ավելի բարձր մակարդակի են հասցրել էներգետիկ անվտանգության համագործակցությունը:
ԲՈՒԴԱՊԵՇՏՆ ՈՒ ԲՈՒԽԱՐԵՍՏԸ ԲՆԱԿԱՆ ԳԱԶ ԵՆ ԱԿՆԿԱԼՈՒՄ ԲԱՔՎԻՑ. ՍԻՅԱՐՏՈ
Հունգարիայի արտաքին գործերի նախարար Պետեր Սիյարտոն Ռումինիայի էներգետիկայի նախարար Վիրջիլ Դանիել Պոպեսկուի հետ հանդիպումից հետո հայտարարել է, որ Բուդապեշտն ու Բուխարեստն ակնկալում են բնական գազ ստանալ Ադրբեջանից:«Հունգարիայի և Ռումինիայի ճակատագրերը փոխկապակցված են բնական գազի մատակարարման անվտանգության տեսանկյունից, քանի որ, մի կողմից, մենք հույս ունենք Ադրբեջանից բնական գազ ստանալ, մյուս կողմից, սպասում ենք ծովային հանքավայրերից արդյունահանման մեկնարկին»,- ասել է Սիյարտոն: Նա տեղեկացրել է, որ Հունգարիան և Ռումինիան ավելացրել են երկու երկրների գազատար համակարգերը միացնող ենթակառուցվածքի հզորությունը մինչև 2,5 միլիարդ խորանարդ մետր: Բացի դրանից՝ որոշում է ընդունվել նոր խողովակաշարի կառուցման մասին, որը կարող է սևծովյան բնական գազը հասցնել մինչև Հունգարիայի սահման:
