ԲՈՂՈՔԻ ԱԿՑԻԱ ՎՐԱՍՏԱՆՈՒՄ. ԿԱՆ ՁԵՐԲԱԿԱԼՎԱԾՆԵՐ
Վրաստանի խորհրդարանի շենքի մոտ անցած բողոքի ակցիայի տասնյակ ցուցարարներ են ձերբակալվել, նրանց մի մասը վարչական կալանքի է ենթարկվել՝ խուլիգանության և ոստիկանին չենթարկվելու համար։ Քաղաքացիներն իրենց բողոքն են հայտնել՝ «օտարերկրյա գործակալների մասին» օրենսդրական նախաձեռության հետ կապված: Երեկ էլ ընդդիմադիր որոշ պատգամավորներ փորձել են տապալել օրինագծի քննարկումը, նրանց միջև ծեծկռտուք է սկսվել։
«Օտարերկրյա ազդեցության թափանցիկության մասին» օրինագիծը խորհրդարան է ներկայացրել ընդդիմադիր «Ժողովրդի ուժ» շարժումը: Իշխող «Վրացական երազանքը» աջակցում է նախագծին: Դրա համաձայն՝ առաջարկվում է ստեղծել ռեեստր այն հասարակական կազմակերպությունների, ԶԼՄ-ների և սուբյեկտների համար, որոնք ֆինանսավորման ավելի քան 20 տոկոսը ստանում են արտերկրից: Ընդդիմադիր «Միացյալ ազգային շարժում» կուսակցության ներկայացուցիչները պնդում են, որ օրինագիծը Վրաստանին շեղում է եվրաինտեգրման ճանապարհից և նպատակ ունի ճնշելու այլախոհությունը:
Պետքարտուղարության խոսնակը հայտարարել է, որ ԱՄՆ-ին, ՄԱԿ-ին և ԵՄ-ին անհանգստացնում է «օտարերկրյա գործակալների մասին» օրինագիծը, Նեդ Փրայսը կոչ է արել Վրաստանի կառավարությունը լսել սեփական քաղաքացիների մտահոգությունները:
ՌՈՒՍԱԿԱՆ ՈՒԺԵՐԸ ԳՐԵԹԵ ՇՐՋԱՓԱԿԵԼ ԵՆ ԲԱԽՄՈՒՏԸ. ՊՐԻԳՈԺԻՆ
«Վագներ» մասնավոր ռազմական ընկերության ղեկավար Եվգենի Պրիգոժինը հայտարարել է, որ ռուսական ուժերը գրեթե շրջափակել են Բախմուտը: Նրա խոսքով՝ մնացել է վերցնել ընդամենը 1 ճանապարհ: Պրիգոժինը դիմել է Վոլոդիմիր Զելենսկիին, կոչ արել թույլ տալ ուկրաինացի զինծառայողներին և Բախմուտի բնակիչների լքել քաղաքը:
Ավելի վաղ՝ Ուկրաինայի ազգային անվտանգության և պաշտպանության խորհրդի քարտուղար Ալեքսի Դանիլովը հայտարարել էր, որ Բախմուտում իրավիճակը շատ ծանր է, սակայն ռուսական կողմի կորուստներն ավելի շատ են, քան ուկրաինական կողմինը: Փոխվարչապետ Իրինա Վերեշչուկն էլ տեղեկացրել է, որ չնայած ակտիվ ռազմական գործողությունների գոտուց հարկադիր տարհանման հորդորներին՝ Բախմուտում հազարավոր բնակիչներ հրաժարվում են լքել իրենց տները: Մինչդեռ մոտակա գյուղերի բնակիչներն աստիճանաբար տարհանվում են:
Բախմուտի համար այժմ կատաղի մարտեր են ընթանում: Փորձագետների համոզմամբ՝ այն կարևոր տրանսպորտային հանգույց է Դոնբասում գտնվող ուկրաինական զորքերին մատակարարումների տեսանկյունից։
ԲԼԻՆՔԵՆԸ՝ ՇՎԵԴԻԱՅԻ ԵՎ ՖԻՆԼԱՆԴԻԱՅԻ՝ ՆԱՏՕ-ԻՆ ԱՆԴԱՄԱԿՑԵԼՈՒ ՄԱՍԻՆ
ԱՄՆ իշխանություններն ակնկալում են, որ Շվեդիան և Ֆինլանդիան հնարավորինս արագ կկարողանան անդամակցել ՆԱՏՕ-ին՝ հայտարարել է ԱՄՆ պետքարտուղարը։ Էնթոնի Բլինքենը նշել է՝ Շվեդիայի արտաքին գործերի նախարարի հետ հանդիպմանը հաստատել է, որ Միացյալ Նահանգների կարծիքով սկանդինավյան երկու երկրները պատրաստ են միանալ դաշինքին:
2022 թվականին Ֆինլանդիան և Շվեդիան դիմել են Հյուսիսատլանտյան դաշինքին միանալու համար, սակայն Անկարան արգելափակել է գործընթացը՝ պահանջելով ահաբեկչական ճանաչել Քրդստանի աշխատավորական կուսակցությունը և արտահանձնել Թուրքիայում ահաբեկչության համար մեղադրվող անձանց։ Թուրքիայի և Շվեդիայի միջև հարաբերությունները սրվեցին Ստոկհոլմում Ղուրանի այրումից հետո։ Ռեջեփ Էրդողանը հայտարարեց՝ հակաթուրքական գործողություններից հետո Շվեդիան չպետք է ակնկալի, որ Անկարան կաջակցի այդ երկրին՝ ՆԱՏՕ-ին անդամակցելու հարցում։ Այս պահին կողմերի միջև քննարկումները շարունակվում են:
ՀՈՒՆԱՍՏԱՆՈՒՄ ԲԱԽՎԵԼ ԵՆ ՄԱՐԴԱՏԱՐ ԵՎ ԲԵՌՆԱՏԱՐ ԳՆԱՑՔՆԵՐԸ
Հունաստանում մարտի 1-ին մարդատար և բեռնատար գնացքների բախման հետևանքով զոհերի թիվը հասել է 60-ի, կան անհետ կորածներ՝ տեղեկացնում են տեղական լրատվամիջոցները:
Հունական արհմիությունները և երիտասարդական կազմակերպությունները բողոքի ցույց են անցկացրել Աթենքում Hellenic Train գնացքների օպերատորի գրասենյակի դիմաց, որին պատկանում էր վթարի ենթարկված մարդատար գնացքը: Մի շարք քաղաքների երկաթուղիների աշխատակիցներն էլ գործադուլ են հայտարարել՝ ընդդեմ անվտանգության հնացած համակարգի։
Դժբախտ պատահարից հետո Hellenic Train երկաթուղային կայարանի ղեկավարը ձերբակալվել է, նա մեղադրվում է մեծ թվով մարդկանց անզգուշությամբ մահ պատճառելու համար: Երկրում երկրում եռօրյա սուգ է հայտարարված:
