Ադրբեջանի և Ռուսաստանի միջև դաշնակցային գործակցությունը կայունացնող դեր կխաղա տարածաշրջանային հարցերում՝ Ադրբեջանի արտգործնախարարի հետ հանդիպումից հետո համատեղ մամուլի ասուլիսում հայտարարել է Սերգեյ Լավրովը:
Սերգեյ Լավրով (ՌԴ ԱԳ նախարար) - Վերահաստատել ենք մեր հավատարմությունը Հայաստանի, Ռուսաստանի և Ադրբեջանի ղեկավարների հայտարարությունների բոլոր դրույթների անվերապահ իրականացմանը: Խոսել ենք Հարավային Կովկասում տրանսպորտային և տնտեսական կապերի ապաշրջափակման հարցով բանակցային գործընթացի մասին: Հուսով ենք՝ շուտով երեք երկրի փոխվարչապետները կկարողանան կոնկրետ պայմանավորվածություններ ձեռք բերել Ադրբեջանի հիմնական տարածքի և Նախիջևանի միջև երկաթուղային հաղորդակցության վերականգնման մասին։ Ընդգծել ենք հայ-ադրբեջանական սահմանի սահմանազատման հարցերով հանձնաժողովի աշխատանքների ակտիվացման անհրաժեշտությունը: Ռուսաստանը պատրաստ է այդ հարցում խորհրդատվական օգնություն տրամադրել։
Լավրովը հավելել է՝ Մոսկվան պատրաստ է նպաստել նաև Բաքվի և Երևանի միջև խաղաղության պայմանագրի կնքմանը, կազմակերպել Հայաստանի և Ադրբեջանի ԱԳ նախարարների բանակցությունները, բայց շատ համառորեն չի պնդի իր առաջարկները: ՌԴ ԱԳ նախարարի խոսքով՝ ռուսական կողմը կարող է ակտիվ մասնակցություն ունենալ նաև, իր ձևակերպմամբ, ադրբեջանական տարածքների հետկոնֆլիկտային վերականգնման գործընթացին։
Ջեյհուն Բայրամովը նույնպես ընդգծել է եռակողմ հայտարարությունների կարևորությունը։ Ադրբեջանցի դիվանագետը հերթական անգամ մեղադրել է Հայաստանին խաղաղության պայմանագրի շուրջ աշխատանքներն իբր խափանելու համար:
Ջեյհուն Բայրամով (Ադրբեջանի ԱԳ նախարար) - Այժմ զբաղվում ենք առցանց դիվանագիտությամբ. խաղաղ համաձայնագրի նախագծի վերաբերյալ մեկնաբանություններով ենք փոխանակվում։ Պարոն Լավրովի հետ խոսել ենք նաև Լաչինի ճանապարհին զարգացումների մասին: Հարկավոր է լսել Ադրբեջանի քաղաքացիական հասարակության օրինական պահանջները: Մեր դիրքորոշումը հետևյալն է՝ եռակողմ հայտարարությունները պետք է իրականացվեն։ Հայաստանը միաժամանակ ակտիվ քարոզչությունն է տանում՝ աղավաղելով ճանապարհին առկա վիճակի մասին տեղեկությունները՝ փորձելով իրարանցում ստեղծել այս հարցի շուրջ՝ ընդ որում՝ հրաժարվում է քննարկել որևէ բան:
ԼԱՉԻՆԻ ՄԻՋԱՆՑՔՈՒՄ ԱՆՑԱԿԵՏԵՐԻ ՍՏԵՂԾՈՒՄ ՆԱԽԱՏԵՍՎԱԾ ՉԷ. ԼԱՎՐՈՎ
Բայրամովը նաև վստահեցրել է, թե ադրբեջանական կողմն ապահովում է Լաչինի միջանցքի գործունեության վերաբերյալ իր ստանձնած պարտավորությունները:
Լավրովն էլ մեկնաբանելով Իլհամ Ալիևի Մյունխենում բարձրաձայնած առաջարկը, Հայաստան-Ադրբեջան սահմանին՝ Լաչինի միջանցքում, անցակետ տեղադրելու վերաբերյալ՝ հղում է կատարել 2020 թվականի եռակողմ հայտարարությանը:
Սերգեյ Լավրով - Լաչինի միջանցքի գործարկման ռեժիմը պետք է համապատասխանի նոյեմբերի 9-ի եռակողմ հայտարարությանը, ինչը նշանակում է, որ անհրաժեշտ է ապահովել ճանապարհով քաղաքացիական և հումանիտար բեռների, քաղաքացիական անձանց ազատ տեղաշարժը։ Հենց դրան էլ փորձում ենք հասնել մեր շփումներում, նախևառաջ՝ խաղաղապահ զորախմբի գծով: Անցակետերի ստեղծում հայտարարությամբ նախատեսված չէ, սակայն կան տեխնիկական միջոցներ, որոնց շնորհիվ հնարավոր է վերացնել այն մտահոգությունները, թե միջանցքը չի ծառայում իր նպատակներին։
ԵՄ-Ն ՉԱՐԱՇԱՀՈՒՄ Է ՀՀ ԵՎ ԱԴՐԲԵՋԱՆԻ ՀԵՏ ՀԱՐԱԲԵՐՈՒԹՅՈՒՆՆԵՐԸ. ԼԱՎՐՈՎ
Նախարարները պատասխանել են նաև Հայաստանում Եվրամիության քաղաքացիական առաքելության տեղակայման վերաբերյալ հարցին: Ռուսաստանի գլխավոր դիվանագետը նշել է, որ դրա արդյունավետությունը կասկածի տեղիք է տալիս: Լավրովը պնդել է՝ ԵՄ-ն բացահայտորեն չարաշահում է Հայաստանի և Ադրբեջանի հետ հարաբերությունները:
Բայրամովն էլ հայտարարել է, թե իբր Հայաստանում ԵՄ առաքելության աշխատանքի սկզբից ի վեր Երևանի դիրքորոշումը դարձել է «ավելի դեստրուկտիվ»։ Նրա խոսքով, Բաքուն համաձայն չէ այն պնդումներին, թե ԵՄ առաքելությունը կապ չունի Ադրբեջանի հետ։ «Այս առաքելությունը շոշափում է Ադրբեջանի օրինական շահերը։ Ուշադիր հետևելու ենք՝ ինչպես է անցնելու այս առաքելությունը»,- ասել է Բայրամովը:
Ասուլիսի ժամանակ անդրադարձ է եղել նաև այն հարցին, որ Ադրբեջանը միջպետական արբիտրաժային վարույթ է նախաձեռնել Հայաստանի դեմ՝ Երևանից ֆինանսական փոխհատուցում պահանջելով Արցախի էներգետիկ ռեսուրսերը ապօրինի շահագործելու համար։ Բայրամովն ընդգծել է՝ այս հարցը որևէ կապ չունի Հայաստան-Ադրբեջան կարգավորման գործընթացի հետ։
ՏԱՐԱԾԱՇՐՋԱՆԻ ԱՆՎՏԱՆԳՈՒԹՅՈՒՆԸ՝ ԼԱՎՐՈՎ-ԱԼԻԵՎ ՔՆՆԱՐԿՄԱՆ ԱՌԱՆՑՔՈՒՄ
Ռուս-ադրբեջանական երկկողմ գործակցությանը, ինչպես նաև Հայաստանի և Ադրբեջանի միջև հարաբերությոոնների կարգավորմանը վերաբող հարցերը փետրվարի 27-ին ՌԴ ԱԳ նախարարը քննարկել էր նաև Ադրբեջանի նախագահ Իլհամ Ալիևի հետ: ՌԴ գլխավոր դիվանագետն ընդգծել էր, որ տարածաշրջանային անվտանգության հարցը ռուս-ադրբեջանական օրակարգի առանցքային թեմաներից է:
Սերգեյ Լավրով - Շատ միջազգային, այդ թվում` տարածաշրջանից հեռու գտնվող գործընկերներ, լրջորեն հետաքրքրված են Հայաստանի ու Ադրբեջանի միջև հարաբերությունների կարգավորման հարցում առաջընթացի գրանցմամբ: Մենք, ինչպես բազմիցս նշել է նախագահ Պուտինը, ողջունում ենք բոլոր ջանքերը, որոնք նպաստում են իրավիճակի կայունացմանը:
Ադրբեջանի նախագահն իր հերթին կարորել էր Ռուսաստանի առանձնահատուկ դերը հայ-ադրբեջանական հարաբերությունների կարգավորման գործընթացում:
Իլհամ Ալիև (Ադրբեջանի նախագահ) - Կարծում եմ, որ Ռուսաստանը՝ որպես մեր բարեկամ, դաշնակից և հարևան, առանձնահատուկ դեր ունի Ադրբեջանի և Հայաստանի միջև միջպետական հարաբերությունների կարգավորման գործընթացին աջակցելու հարցում։ Նախորդ տարի այս ուղղությամբ կարևոր ջանքեր են գործադրվել, փաստաթղթեր են ընդունվել, որոնք սահմանում են ապագա խաղաղության պայմանագրի հայեցակարգային բնույթը։
Ալիևը հույս է հայտնել, որ Երևանի և Բաքվի հարաբերությունների կարգավորման առումով 2023-ը բեկումնային կլինի:
