ԿԱՐԳԱՎՈՐՄԱՆ ՋԱՆՔԵՐԸ ԽԱՓԱՆՈՒՄ ԵՆ ԱՐԵՎՄՏՅԱՆ ԵՐԿՐՆԵՐԸ. ԶԱԽԱՐՈՎԱ
ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ընթացքում անդրադարձել է Հայաստան-Ադրբեջան հարաբերությունների կարգավորման գործընթացին՝ արձագանքելով Ռուսաստանի կողմից այն խափանելու վերաբերյալ Արևմուտքից հնչող մեղադրանքներին:
Մարիա Զախարովա (ՌԴ ԱԳՆ պաշտոնական ներկայացուցիչ) - Հայ-ադրբեջանական կարգավորման ջանքերը խափանում են հենց արևմտյան երկրները՝ ԱՄՆ-ի գլխավորությամբ: Մինսկի խմբի ձևաչափը պատմության գիրկն ուղարկեցին ամերիկացի և ֆրանսիացի համանախագահները: Նրանք մտացածին պատրվակով 2022 թվականի փետրվարից դադարեցրին շփումը ռուս գործընկերոջ հետ։ Հաշվի առնելով այս փաստը՝ մենք կենտրոնացել ենք Երևանին և Բաքվին եռակողմ ձևաչափերով օգնություն տրամադրելու վրա՝ հիմնվելով ամենաբարձր մակարդակով ձեռք բերված համաձայնությունների վրա։ Ինչ վերաբերում է ԱՄՆ-ի միջնորդությանը, ապա նրանց կողմից իրական քայլեր չենք տեսնում: Նրանց միջնորդությունը հավելյալ արժեք չունի:
Զախարովան անդրադարձել է խաղաղության պայմանագրի շուրջ բանակցային գործընթացին, հավատացրել՝ Մոսկվան շարունակում է այդ հարցում օգնություն ցուցաբերել կողմերին։
Մարիա Զախարովա - Վերջերս ՌԴ ԱԳՆ հատուկ ներկայացուցիչ Իգոր Խովաևը արդյունավետ շփումներ ունեցավ Երևանում և Բաքվում։ Թե՛ հայկական, թե՛ ադրբեջանական կողմերը հաստատել են, որ շահագրգռված են Ռուսաստանի միջնորդությամբ։ Հաշվի առնելով խաղաղության պայմանագրի թեմայի զգայունությունը՝ չեմ անդրադառնա խորհրդակցությունների մանրամասներին, կարող եմ ևս մեկ անգամ հաստատել մեր պատրաստակամությունը՝ Մոսկվայում կազմակերպելու Հայաստանի և Ադրբեջանի արտգործնախարարների հանդիպումը։
ՌԴ ԱԳՆ պաշտոնական ներկայացուցիչը խոսել է նաև Ռուսաստան-Ադրբեջան հարաբերությունների մասին: Նա հիշեցրել է, որ 2022 թվականի փետրվարի 22-ին ստորագրվել է Ռուսաստանի և Ադրբեջանի միջև դաշնակցային համագործակցության մասին հռչակագիրը, այն որակել «պատմական փաստաթուղթ»: Զախարովայի խոսքով՝ հռչակագիրը նախանշել է Բաքու-Մոսկվա երկարամյա գործընկերության հիմնական ուղղությունները։
«Ռուսաստանի և Ադրբեջանի դաշնակցային հարաբերությունները կայունացնող գործոն են ինչպես տարածաշրջանային, այնպես էլ միջազգային մակարդակով»,- հավելել է պաշտոնյան:
Պատասխանելով լրագրողի հարցին՝ արդյոք նախարար Սերգեյ Լավրովը նախատեսում է փետրվարի վերջին այցելել Բաքու՝ Զախարովան նշել է՝ այցը նախապատրաստական փուլում է, մանրամասներ կհաղորդեն, երբ այն համաձայնեցվի։
ԵՄ-Ն ԲԱՔՎԻՆ ԿՈՉ Է ԱՐԵԼ ԱՊԱՀՈՎԵԼ ԼԱՉԻՆՈՎ ՏԵՂԱՇԱՐԺԻ ԱԶԱՏՈՒԹՅՈՒՆԸ
Եվրամիությունը 2022 թվականի դեկտեմբերի սկզբից ուշադիր հետևում է իրադարձությունների զարգացմանը Լաչինի միջանցքում և ուսումնասիրում դրանց մարդասիրական հետևանքները՝ հայտարարել է ԵՄ արտաքին քաղաքականության բարձր ներկայացուցիչ Ժոզեպ Բորելը:
«Եվրամիությունը լրջորեն անհանգստացած է՝ ինչ տառապանքներ են պատճառում տեղի բնակչությանը ազատ տեղաշարժի շարունակական սահմանափակումը և կենսական նշանակության ապրանքների մատակարարման խափանումները։ ԵՄ-ն Ադրբեջանին կոչ է արել իր իրավասության շրջանակում միջոցներ ձեռնարկել՝ ապահովելու միջանցքի երկայնքով տեղաշարժի ազատությունն ու անվտանգությունը՝ նոյեմբերի 9-ի եռակողմ հայտարարությամբ ստանձնած պարտավորություններին համապատասխան։ Ռուսաստանը և երթուղին վերահսկող ռուսական խաղաղապահ առաքելությունը նույնպես պատասխանատու են Լաչինի միջանցքի գործարկման համար՝ նույն եռակողմ հայտարարության համաձայն»։
Բորելը նշել է՝ Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի միջոցով, սերտ կապի մեջ է կողմերի հետ։
ԵՄ բարձր ներկայացուցիչը նաև հայտնել է, որ հայ-ադրբեջանական հակամարտության հետևանքները վերացնելու նպատակով մոբիլիզացված՝ ԵՄ մարդասիրական ֆինանսավորումը 2022 թվականի համար կազմել է 3,6 մլն եվրո։ Այդ գումարը տրամադրվել է Կարմիր խաչին՝ միակ միջազգային մարդասիրական կազմակերպությանը, որն ի վիճակի է տեղում գործունեություն ծավալել։ Բորելը հավելել է՝ 2020 թվականի հակամարտությունից ի վեր Եվրամիությունը ռազմական գործողություններից տուժած առավել խոցելի բնակչությանը աջակցելու համար մոտ 27 միլիոն եվրոյի մարդասիրական օգնություն է հատկացրել:
ԱՄՆ-Ը ՈՂՋՈՒՆՈՒՄ Է ԽԱՂԱՂՈՒԹՅԱՆ ՀԱՍՆԵԼՈՒ ՑԱՆԿԱՑԱԾ ՋԱՆՔ. ՊԱՏԵԼ
ԱՄՆ վարչակազմը շարունակում է Հարավային Կովկասում խաղաղության հասնելու փորձերը, այդ հարցի վրա կենտրոնացած է նաև պետքարտուղար Էնթոնի Բլինքենը՝ հայտարարել է ԱՄՆ պետքարտուղարության խոսնակի տեղակալը։ «Մենք ողջունում ենք ցանկացած ջանք, որը կօգնի մեզ հասնել ամուր խաղաղության»,- հավելել է Վեդանտ Պատելը։
Պատասխանելով ԵԱՀԿ Մինսկի խմբի նոր համանախագահ, Կովկասի հարցերով ԱՄՆ պետքարտուղարի ավագ խորհրդական Լուիս Բոնոյի՝ տարածաշրջան հնարավոր այցի մասին հարցին՝ Պատելը նշել է՝ նման այցի համար որևէ խոչընդոտ չկա, լրացուցիչ կհայտարարեն, եթե Բոնոն որոշի մեկնել տարածաշրջան:
ԳԱՖԱՐՈՎԱՆ՝ ԵՄ ԴԻՏՈՐԴԱԿԱՆ ԱՌԱՔԵԼՈՒԹՅԱՆ ՏԵՂԱԿԱՅՄԱՆ ՄԱՍԻՆ
Հայ-ադրբեջանական սահմանին ԵՄ դիտորդական առաքելության տեղակայումը կարող է խանգարել Հայաստան-Ադրբեջան կարգավորման գործընթացին, դրանից հարկավոր է խուսափել՝ հայտարարել է Ադրբեջանի խորհրդարանի խոսնակ Սահիբա Գաֆարովան։ Նա նշել է, որ իր այդ դիրքորոշումը հայտնել է նաև Ռուսաստանում անցկացրած հանդիպումների ժամանակ:
Ավելի վաղ՝ Մոսկվայում Գաֆարովայի հետ հանդիպմանը Ռուսաստանի Պետդումայի խոսնակ Վյաչեսլավ Վոլոդինն էլ համոզմունք էր հայտնել, թե եվրոպական կառույցների, մասնավորապես՝ «Եվրախորհրդարանի և ԵԽԽՎ-ի դերակատարումը ղարաբաղյան հակամարտության կարգավորման հարցում կարող է նոր խնդիրներ առաջացնել»:
