Իրեն ԵՄ գործընկեր համարող պետությանը նման հայտարարությունները պատշաճ չեն՝ Եվրախորհրդարանում «Լեռնային Ղարաբաղի շրջափակման հումանիտար հետևանքները» թեմայով քննարկման ժամանակ անդրադառնալով Ադրբեջանի նախագահ Իլհամ Ալիևի` ԼՂ-ում ստեղծված իրավիճակի վերաբերյալ վերջին հայտարարություններին` ասաց Եվրապատգամավոր Մարինա Կալյուրանդը:
Նա Բաքվին կոչ արեց հարգել միջազգային պարտավորությունները, դադարեցնել Լաչինի միջանցքի շրջափակումը, սկսել բանակցություններ խաղաղության համաձայնագրի շուրջ:
Իր դեմ «վհուկների որս» սկսած ադրբեջանցի պաշտոնյաներին նա ասաց. «Ինձ չեք ահաբեկի և չեք լռեցնի, ձեր հարձակումները ձեր թուլությունն են բացահայտում»:
Նատալի Լուազոյի կարծիքով` սա անգամ շրջափակում չէ, ավելին է, քան շրջափակումը, շանտաժից ավելի է, էթնիկ զտում է:
«Իսկ մենք` եվրոպացիներս, ի՞նչ ենք անում. ոչինչ, ավելին, քան ոչինչ»,- նշեց նա:
Վիոլա ֆոն Կրամոն-Տաուբադելի խոսքով` բռնությունը ծնում է ավելի շատ բռնություն:
«Ինչո՞ւ պետք է Կովկասը թշնամանքի տարածք լինի, եթե կարող է բարեկեցության տարածք լինել: ԵՄ-ն կարող է և պետք է կայուն խաղաղություն բերի երկու երկրին, քանի որ մեր շահն է տեսնել խաղաղ և բարեկեցիկ Կովկաս»,- ասաց նա:
Բերտ-Յան Ռայսենը նկատեց՝ իրավիճակը ԼՂ-ում գնալով վատանում է, նշեց` պետք է ավելի շատ դիտորդներ ուղարկել տարածաշրջան, ավելի շատ ճնշում գործադրել Բաքվի կառավարության նկատմամբ, խաղաղության բանակցություններ պետք է լինեն, հստակ երաշխիքներ լինեն ԼՂ բնակչության համար:
Նրա գնահատմամբ` ո՛չ Կովկասը, ո՛չ ԵՄ-ն չեն շահի նոր լարվածությունից:
«ԼՂ-ում մարդիկ սոված են և ցրտի մեջ, նրանց օդային կամուրջ է պետք ԵՄ կամ ՌԴ կողմից: ՄԱԿ-ի և ԵԱՀԿ հետ պետք է կանխել այս աղետը»,- հայտարարեց Մարտինա Միխելսը:
Կլեմեն Գրոշելն առաջարկ հնչեցրեց ռուս խաղաղապահներին փոխարինել ՄԱԿ-ի խաղաղապահներով:
«Եթե լինում է բնական աղետ` հրդեհ, ջրհեղեղ, երկրաշարժ, լինում է արձագանք, բայց մենք տեսնում ենք` ինչպիսի խոշտանգման են ենթարկվում հարյուր հազարավոր մարդիկ. հայերը ԼՂ-ում երեք տարբերակ ունեն` հրաժարվել իրենց ինքնությունից, հեռանալ կամ այն նույն ճակատագրին արժանանալ, ինչ 1915-ին Թուրքիայում եղավ հայերի նկատմամբ: Օդային կամուրջը նվազագույնն է, որ մենք պիտի անենք ու պիտի անենք մինչև շաբաթվա ավարտը»,- հայտարարեց Էմանուիլ Ֆրագկոսը:
Ֆաբիո Մասիմո Կաստալդոն կարևորեց մոնիթորինգի ծառայության տեղակայումը նաև Լաչինի միջանցքում:
«Օդային կամրջով պետք է մարդասիրական առաքումների հասանելիություն ապահովենք, եթե Բաքուն դա չապահովի, պետք է պատրաստ լինենք կտրուկ համարժեք պատժամիջոցներ ընդունել ոճրագործության մեղավորների նկատմամբ»,- ասաց նա` ընդգծելով, որ սննդի հասանելիության խոչընդոտումը պատերազմական հանցագործություն է:
Հանձնակատար Ադինա Իոանա Վելանը կոչ արեց վերադառնալ բանակցություններին, դադարեցնել քաղաքացիական բնակչության նկատմամբ ճնշումը:
«ԵՄ-ն պատրաստ է օգնել բոլոր այն ջանքերին, որոնց նպատակն է վստահության ամրապնդումը և մտահոգությունները երկխոսությամբ հաղթահարելը»,- ասաց նա:
