Ընտրական գործընթացներում նոր փոփոխություններ են նախատեսվում: Ընտրական օրենսգրքում Քաղաքացիական պայմանագիր խմբակցության մի խումբ պատգամավորների լրացումները քննարկելու համար Ազգային ժողով էին այցելել ոլորտի պատասխանատուներն ու քաղհասարակության ներկայացուցիչները: Նախագծի համահեղինակ Վահագն Հովակիմյանն ընգծեց՝ փոփոխությունների փաթեթը միտված է գործող օրենսգրքի բացերը վերացնելուն: Դրանցից մեկն ի հայտ է եկել 70 հազարից պակաս բնակչություն ունեցող համայնքներում տեղի ունեցած ՏԻՄ ընտրությունների ընթացքում: Հովակիմյանի խոսքով՝ այստեղ ընտրությունն իրականացվել է մեկ քվեաթերթիկով և գրիչով, ինչը դարձել է անվավեր քվեաթերթիկների մեծ քանակի և ընտրախախտումների մասին առավել շատ ահազանգերի պատճառ:
Վահագն Հովակիմյան (ՀՀ ԱԺ պետական-իրավական հարցերի մշտական հանձնաժողովի նախագահի տեղակալ) - Առաջարկվում է, որ ամբողջ ՏԻՄ համամասնական ընտրակարքի դեպքում անցում կատարվի տարբեր քվեաթերթիկներին, ներդրվի այն մոդելը, որը կա ԱԺ ընտրությունների ժամանակ:
Նախագծի հեղինակները մտավախություն ունեն, որ թեկնածուների թվի շատ լինելու դեպքում տեխնիկական խնդիրներ կառաջանան քվեաթերթիկների պատրաստման հետ կապված: Առաջարկում են թեկնածուների համար ինքնաբացարկի ժամանակահատվածի նոր շեմ սահմանել:
Վահագն Հովակիմյան - Առաջարկվում է, որ կուսակցություններն ու կուսակցության ցուցակի առաջին 3 համարները ինքնաբացարկ տալու հնարավորություն ունենան ընտրություններից մինչև 15 օր առաջ, մնացած թեկնածուների դեպքում, իրենց 10 օրը պահպանվում է:
Օրենքի նախագծի մեկ այլ փոփոխությամբ էլ՝ հասարակական կազմակերպության անդամը չի կարողանա առաջադրվել Կենտրոնական ընտրական հանձնաժողովի անդամի պաշտոնում: Այս դրույթի հետ համաձայն չեն քաղհասարակության ներկայացուցիչները: Դանիել Իոաննիսյանը մեջբերում է միավորումների ազատությունը սահմանափակելու Սահմանադրական հիմքերը:
Դանիել Իոաննիսյան («Իրազեկ քաղաքացիների միավորում» հ/կ ծրագրերի համակարգող)
Միավորումների ազատությունը կարող է սահմանափակվել միայն օրենքով` պետական անվտանգության, հասարակական կարգի, առողջության և բարոյականության կամ այլոց հիմնական իրավունքների և ազատությունների պաշտպանության նպատակով»:
Վահագն Հովակիմյանը հակադարձում է՝ միավորումների ազատության որևէ սահմանափակում չկա:
Վահագն Հովակիմյան - Այստեղ ընդամենը խոսքն այն մասին է, որ պաշտոնավարման լիազորություններ իրականացնելիս ԿԸՀ անդամը, ինչպես չի կարող լինել քաղաքական պաշտոն զբաղեցնող, այնպես էլ չի կարող լինել հ/կ անդամ, որոհվետև կարող է առաջացնել շահերի բախում: Երբ տվյալ հասարակական կազմակերպությունը դիտորդական առաքելություն իրականացնի, կարող է այդ նույն շահերի բախումն առաջանալ:
Օրենքի նախագծի որոշ դրույթների հետ անհամաձայնություն ունի նաև Կենտրոնական ընտրական հանձնաժողովի նախագահը: Տիգրան Մուկուչյանն առաջարկում է վերախմբագրել ՏԻՄ ընտրությունների ընթացքում ընտրական տեղամասերում տեսախցիկների տեղադրման պահանջը:
Տիգրան Մուկուչյան (ՀՀ ԿԸՀ նախագահ) - Ես չեմ բացառում, որ վաղը ՏԻՄ ընտրություններով պայմանավորված, երբ, օրինակ՝ ընդամենը մեկ համայնքում համամասնական ընտրակարգով ընտրություն է ու այդտեղ պետք է տեղադրվեն տեսախցիկներ, որևէ մի կազմակերպության մոտ հետաքրքրություն չառաջանա, ու ինքը կառաջացնի լրջագույն խնդիր, որ այդ պարտականությունն ուղղակիորեն չկատարվեց:
Ընտրական օրենսգրքում փոփոխությունների փաթեթն ամբողջացնելուց հետո այն կներկայացվի խորհրդարանի գլխադասային հանձնաժողովի քննարկմանը:
Հեղինակ՝ Նորայր Շողիկյան