Նոյեմբերի 9-ի եռակողմ հայտարարությունը այդ ժամանակ Լեռնային Ղարաբաղում բռնությանը վերջ դնելուն միտված քայլ էր: «Ալ Ջազիրա» հեռուստաընկերությանը տված հարցազրույցում նշել է Հայաստանի վարչապետը: Նիկոլ Փաշինյանը շեշտել է՝ այդ հայտարարությունում Լեռնային Ղարաբաղի հարցին անդրադարձ չկա, բայց երկրի ղեկավարը հույս է հայտնել, որ առաջիկայում հիմնախնդիրը կրկին քննարկելու հնարավորություն կլինի: Վարչապետը խոսել է նաև Հայաստանի և Ադրբեջանի միջև սահմանազատման հանձնաժողովի աշխատանքի մասին:
Նիկոլ Փաշինյան (ՀՀ վարչապետ) - Վերջերս Հայաստանի և Ադրբեջանի միջև սահմանազատման հանձնաժողով ենք կազմել, և այդ աշխատանքը շարունակելը շատ կարևոր է։ Ընդամենը մեկ հանդիպում է տեղի ունեցել, բայց արդեն համաձայնություն ունենք, որ երկրորդը տեղի ունենա Մոսկվայում, երրորդը` Բրյուսելում: Հույս ունենք՝ մեր միջազգային գործընկերների աջակցությամբ և, իհարկե, երկկողմ աշխատանքի շնորհիվ, մեզ կհաջողվի դելիմիտացիա իրականացնել:
Լրագրողը հետաքրքրվել է՝ ինչպիսին կլինի դիրքորոշումը, եթե այդ հանձնաժողովը որոշի, որ Լեռնային Ղարաբաղի ամբողջ տարածքը պետք է պատկանի Ադրբեջանին: Վարչապետը շեշտել է՝ սահմանազատման հանձնաժողովը իրականում որևէ կապ չունի Լեռնային Ղարաբաղի խնդրի հետ:
Նիկոլ Փաշինյան - Մենք Ադրբեջանի հետ հաղորդակցության տարբեր հարթություններ ունենք, որոնցից մեկը սահմանազատման աշխատանքներին է վերաբերում: Նաև շատ կարևոր է նշել սահմանի անվտանգության հարցը, որը նույնպես այս հանձնաժողովի մանդատի ներքո է, որովհետև մենք պետք է պահպանենք կայունություն և անվտանգություն ամբողջ սահմանի երկայնքով։
Երկրորդ հարթությունը Հայաստանի և Ադրբեջանի միջև հարաբերությունների կարգավորումն է։ Կա ևս մեկ հարթություն, որը տարածաշրջանային, տրանսպորտային և տնտեսական հաղորդակցությունների բացման մասին է։ Բայց, իհարկե, ամենահրատապ հարցը Հայաստանի և Ադրբեջանի միջև և տարածաշրջանային խաղաղության համար Լեռնային Ղարաբաղի հարցն է։
ՌԴ-Ն ՀՀ-Ի ՌԱԶՄԱՎԱՐԱԿԱՆ ԳՈՐԾԸՆԿԵՐՆ ՈՒ ԴԱՇՆԱԿԻՑՆ Է. ՓԱՇԻՆՅԱՆ
Լրագրողի դիտարկմամբ՝ Ադրբեջանի հետ խաղաղության մասին խոսակցությունը զայրացնում է ընդդիմությանը, իսկ Ռուսաստանը, որն այս հայտարարության հովանավորն է, «Ալ Ջազիրայի» մեկնաբանմամբ, համարվում է Հայաստանի դեմ դավադրության մեջ ներգրավված և ավելի շատ աջակցում է Ադրբեջանին։
Նիկոլ Փաշինյան - Գիտեք, որ Ռուսաստանը Հայաստանի ռազմավարական գործընկերն ու դաշնակիցն է, բայց Ռուսաստանը շատ մտերիմ պետություն է նաև Ադրբեջանի համար։ Եվ այս պարագայում մենք տեսնում ենք Ռուսաստանի դերը որպես եռակողմ հայտարարության երաշխավոր:
ՈՒԿՐԱԻՆԱԿԱՆ ՃԳՆԱԺԱՄԻ ՏՆՏԵՍԱԿԱՆ ՀԵՏԵՎԱՆՔՆԵՐԸ
Ուկրաինայի շուրջ ստեղծված իրավիճակի վերաբերյալ: Վարչապետ Փաշինյանի խոսքով՝ տեսնում ենք աշխարհակարգի փլուզում:
Նիկոլ Փաշինյան - Եվ ոչ մեկը չգիտի՝ ինչպիսին կլինի հաջորդ աշխարհակարգը, և, իհարկե, մենք աջակցում ենք երկխոսության ու խաղաղ ճանապարհով բոլոր խնդիրների լուծմանը:
Վարչապետի խոսքով՝ իրավիճակը Երևանի համար հաճելի չէ նաև տնտեսական առումով։ Բայց առաջին եռամսյակում Հայաստանին հաջողվել է 8.6% տնտեսական աճ արձանագրել։
Նիկոլ Փաշինյան - Ուկրաինայում տեղի ունեցող դեպքերից հետո շատ մարդիկ և բիզնեսներ Ռուսաստանից տեղափոխվել են Հայաստան, քանի որ մենք չեզոք տնտեսական գոտի ունենք, և թե՛ Հայաստանը, թե՛ Ռուսաստանը Եվրասիական տնտեսական միության անդամ են: Այս իրավիճակում մենք հույս ունենք, և, կարծում եմ, ի վիճակի կլինենք կառավարել տնտեսական իրավիճակը։ Բայց, իհարկե, ոչ միայն Ռուսաստանի տնտեսական վիճակն է ուղղակիորեն ազդել Հայաստանի տնտեսության վրա, այլև գլոբալ տնտեսական լարվածությունը՝ կապված, օրինակ՝ սննդի մատակարարման, գնաճի և շատ այլ գործոնների հետ։ Բայց այս պահին Հայաստանի տնտեսական ցուցանիշները բավականին դրական են:
ԵՐԵՎԱՆԸ ՓՈՐՁՈՒՄ Է ՈՒՂԻՂ, ԱԶՆԻՎ ԵՎ ՎՍՏԱՀԵԼԻ ԳՈՐԾԸՆԿԵՐ ԼԻՆԵԼ
Արդյոք Հայաստանը ենթարկվո՞ւմ է որևէ ճնշման Մոսկվայի կամ Արևմուտքի կողմից: Վարչապետ Փաշինյանը չի ժխտում՝ մեր երկրի և կառավարության վիճակը բավականին զգայուն է, բայց Ռուսաստանի, եվրոպական և արևմտյան գործընկերների, իր հարևանների համար Երևանը փորձում է ուղիղ, ազնիվ և վստահելի գործընկեր լինել։
Նիկոլ Փաշինյան - Դա այնքան էլ հեշտ չէ, բայց, կարծում եմ՝ ղեկավարները նախատեսված են հենց այսպիսի իրավիճակների համար, և մեր պարտականությունն է` կառավարել այն ու պահպանել պատշաճ հարաբերություններ մեր գործընկերների հետ և ոչ մեկին չդավաճանել:
ՎԱՐՉԱՊԵՏԻ ԱՆԴՐԱԴԱՐՁԸ ՀԱՅ-ԹՈՒՐՔԱԿԱՆ ՀԱՐԱԲԵՐՈՒԹՅՈՒՆՆԵՐԻՆ
Թուրքիայի հետ Հայաստանի հարաբերությունների մասին: Փաշինյանի խոսքով՝ երկխոսությունն ինքնին արդեն շատ դրական է, շոշափելի արդյունքներ արձանագրելու հույս կա։
Նիկոլ Փաշինյան - Չեմ կարող ասել, որ մենք դեռ որևէ արդյունք չենք գրանցել, որովհետև երկխոսության մեկնարկից հետո Հայաստանի ու Թուրքիայի միջև ուղիղ չվերթեր են սկսվել, բայց դա նախկինում էլ կար։ Ես հույս ունեմ, որ ի վիճակի կլինենք դիվանագիտական հարաբերություններ հաստատել և բացել սահմանը, որն արդեն 30 տարի փակ է:
ՀՀ-Ի ՀԱՄԱՐ ԱՆԸՆԴՈՒՆԵԼԻ ԵՆ ՄԻՋԱՆՑՔԻ ՄԱՍԻՆ ՁԵՎԱԿԵՐՊՈՒՄՆԵՐԸ
Հայաստանի համար անընդունելի են այսպես կոչված միջանցքի մասին ձևակերպումները, և դա Երևանի համար կարմիր գիծ է, քանի որ մեր տարածաշրջանում, եռակողմ հայտարարության համաձայն՝ կա մի միջանցք, և դա Լաչինի միջանցքն է:
Նիկոլ Փաշինյան - Բայց մեր եռակողմ հայտարարության մեջ ունենք մեկ այլ դրույթ, որը հաղորդակցությունների բացման մասին է։ Նկատի ունեմ երկաթուղիներ, ճանապարհներ, և մենք պատրաստ ենք, իրականում արդեն քննարկում ենք տարածաշրջանային հաղորդակցությունները բացելու հարցը՝ երկուստեք ինքնիշխանության և սահմանների անքակտելիության հարգանքի սկզբունքով:
ՀՀ-Ն ՎՐԱՍՏԱՆԻ ԵՎ ԻՐԱՆԻ ՀԵՏ ՇԱՏ ԼԱՎ ՀԱՐԱԲԵՐՈՒԹՅՈՒՆՆԵՐ ՈՒՆԻ
Հայաստանն իր չորս հարևան երկրներից Վրաստանի ու Իրանի հետ շատ լավ հարաբերություններ ունի:
Նիկոլ Փաշինյան - Հիմա աշխատում ենք Իրանի և Հայաստանի միջև հաղորդակցությունները զարգացնելու ուղղությամբ, և այժմ ռազմավարական մի մայրուղու կառուցման փուլում ենք, որը կոչվում է Հյուսիս-հարավ և կապում է Վրաստանի հետ մեր սահմանն Իրանի հետ սահմանին։ Մենք հույս ունենք, որ այդ ծրագրի արդյունքում մեր տնտեսական հարաբերությունները Իրանի հետ կզարգանան:
Վարչապետի խոսքով՝ Հայաստանում շատ ջերմ վերաբերմունք կա նաև արաբական աշխարհի նկատմամբ:
