Ազգային ժողովի Ֆինանսավարկային և բյուջետային ու Առողջապահության հարցերի մշտական հանձնաժողովների համատեղ նիստն այսօր լարված մթնոլորտում անցավ: Քննարկվեց կորոնավիրուսով պայմանավորված բյուջետային ծախսերի հաշվեքննության վերաբերյալ Հաշվեքննիչ պալատի ընթացիկ եզրակացությունը: Մինչ Հաշվեքննիչ պալատի 7-րդ վարչության պետ Խաչիկ Փափազյանը կներկայացներ եզրակացությունը՝ «Քաղաքացիական պայմանագիր» խմբակցության պատգամավոր Արսեն Թորոսյանն ասաց, թե իր համար տարօրինակ է, որ հաշվեքննությանը ներկա չէ համապատասխան վարչությունը համակարգող պալատի անդամ Աբրամ Բախչագուլյանը:
Արսեն Թորոսյան (ՀՀ ԱԺ «Քաղաքացիական պայմանագիր» խմբակցության պատգամավոր) - Կարող է` մոլորվել է, օրինակ, Ֆրանսիայի հրապարակում, եթե չի մոլորվել, ուրեմն այստեղ պիտի լիներ: Եվ հասկանալու համար, թե ոնց ենք առաջ գնալու, կուզենամ հասկանալ, թե ոնց ենք առաջ գնալու:
Արձագանքելով՝ պալատի նախագահ Ատոմ Ջանջուղազյանն ասաց, որ քննարկումը ոչ մի տեղ չի տանի, եթե բովանդակության փոխարեն փորձեն հասկանալ, թե ովքեր են այդ բովանդակությունը ձևավորել:
Ատոմ Ջանջուղազյան (ՀՀ հաշվեքննիչ պալատի նախագահ) - Պալատը կոլեգիալ մարմին է, և պալատի որոշմամբ հաստատվել է այն եզրակացությունը, որը այսօր ներկայացված է այս հարթակում քննարկման համար, ընդ որում` դա մինչ այդ էլ հրապարակային փաստաթղթի է վերածվել և հրապարակվել է պալատի պաշտոնական կայքէջում: Ինչու պալատի անդամ համակարգողը ներկա չէ, սա առաջին դեպքը չէ, որ քննարկվում է և որոշվում է, թե ովքեր պիտի ներկա լինեն, և ով պիտի ներկայացնի, թույլ տվեք` որոշումը կայացնի պալատը պարոն Թորոսյան: Իսկ մոլորվել-չմոլորվելու վերաբերյալ դատողությունը թողնում եմ ձեզ:
Կառավարության պահուստային ֆոնդից համավարակի կանխարգելման և բուժման նպատակով 2020-ին հատկացվել է շուրջ 26.5 մլրդ դրամ՝ ներկայացեց Փափազյանը:
Խաչիկ Փափազյան (ՀՀ հաշվեքննիչ պալատի 7-րդ վարչության պետ) - Հաշվեքննություն իրականացնող խումբը եզրահանգել է, որ համավարակի կանխարգելման և բուժման նպատակով համարժեք պլանավորման աշխատանքներ չեն իրականացվել, հատկացված ֆինանսավորման համար չեն սահմանվել ծախսային ուղղություններ և ոչ ֆինանսական արդյունքային ցուցանիշներ, որոշումների կայացման գործընթացում չեն կիրառվել սահմանված հաշվետվողականության մեխանիզմները:
Ֆինանսավարկային և բյուջետային հարցերի հանձնաժողովի նախագահ Գևորգ Պապոյանը հետաքրքրվեց, թե արդյո՞ք լավ բան չեն տեսել, որ եզրակացության մեջ ներառեն, քանի որ միայն վատ բաներ են ներառվել:
Ջանջուղազյանն էլ նշեց՝ պետք չէ հաշվեքննիչ պալատի արձանագրությանը վերաբերվել որպես հակառակորդի արձանագրման:
Ատոմ Ջանջուղազյան - Լավ բաները շատ են, բայց եկեք այն տրամաբանությամբ չառաջնորդվենք, որ երբ, օրինակ, ավիավթարի մասին դատողություն է արվում և ասվում է, որ այսքան զոհ է եղել, ասենք, բայց այսքան էլ ավիաուղևորափոխադրումներ են տեղի ունեցել, որոնք բարեհաջող տեղ են, չէ, հասել: Այո, դուք իրավացի եք, ընդամենը 152 մլն դրամի շեղման մասին է խոսքը, միայն էն գործոնով պայմանավորված, որ բավարար չափով հսկողություն չի իրականացվել:
Եզրակացությանն անդրադարձավ առողջապահության նախարար Անահիտ Ավանեսյանը՝ ընդգծելով համավարակը նոր էր. ընդգրկուն, և շատ բարդ է արդյունքների վերաբերյալ գնահատականներ տալը:
Անահիտ Ավանեսյան (ՀՀ առողջապահության նախարար) - Մենք չէինք պլանավորել քովիդ, չէինք պլանավորել արդյունքային ցուցանիշներ բուժվածների, վարակվածների և այլն, ինչը անհնարին էր, ինչ ենք արել՝ պլանավորել ենք մեր գործողությունները, թե ինչպես ենք արձագանքելու մարտահրավերին:
Արսեն Թորոսյանն ասաց, թե Ջանջուղազյանի պատասխաններից տպավորություն է, որ կարևորը թղթաբանությունն է, այլ ոչ թե պացիենտների բուժումը:
Ատոմ Ջանջուղազյան - Եթե, օրինակ, 136 մլն դրամի բարեկարգումը՝ շենքի արտաքին երեսպատումը փոխելը համարում եք, որ թղթաբանությանն է վերաբերում, ապա դուք իրավացի եք:
Առողջապահության նախարարը եզրափակելով նշեց՝ իրենք չեն ընդունում այն եզրահանգումները, որոնք խեղաթյուրում են կորոնավիրուսային համավարակի դեմ պայքարի ամբողջ ընթացքում գերատեսչության վարած քաղաքականությունն ու արդյունքները:
Քննարկումը, որը կազմակերպվել էր 2 կողմերի տեսակետները լսելու համար՝ այսպիսով ավարտվեց:
Հեղինակ` Նիկոլայ Ավետիսյան
