Վարչապետ Նիկոլ Փաշինյանը տիկնոջ՝ Աննա Հակոբյանի հետ, հանրապետության նախագահ Վահագն Խաչատուրյանը, ինչպես նաև մի շարք բարձրաստիճան պաշտոնյաներ այցելել են Հայաստանի հանրային հեռուստաընկերություն: Վարչապետի հուշամեդալով է պարգևատրվել Հայկական հեռուստատեսության առաջին հաղորդավարուհի, ՀԽՍՀ ժողովրդական արտիստ, Հանրային հեռուստաընկերության խորհրդի անդամ Նառա Շլեպչյանը:
Հուշամեդալով պարգևատրվել է նաև հեռուստաընկերության պրոդյուսեր Էլմիրա Արսենյանը: Վարչապետի շնորհակալագրեր են ստացել Հանրայինի երկարամյա աշխատակիցներ Ալվարդ Լազարյանը, Արսեն Նազարյանը, Անիչկա Հունանյանը և Սմբատ Սարգսյանը:
Նիկոլ Փաշինյան (ՀՀ վարչապետ) - Մեր կյանքի յուրաքանչյուր փուլում մենք մեզ հիշում ենք Հանրային հեռուստատեսության հեռուստադիտողի դերում: Եվ այսօր ես շատ ուրախ եմ, որ պիտի առիթ ունենանք մեր գնահատանքի տուրքը տալու Հանրային հեռուստատեսության այն աշխատակիցներին, ովքեր այս տարիների ընթացքում առավել կարևոր դերակատարում են ունեցել: Եվ պիտի հույս ունենամ, որ, ահա, Հանրային հեռուստատեսությունը պիտի շարունակի Հայաստանի Հանրապետության հեռուստատեսության ոլորտի, լրագրության ոլորտի, հանրային քննարկումների ոլորտի նշանավոր և նշանակալի դեմքերով հանդես գալ: Այդ դեմքերը նաև պիտի ձևավորվեն Հանրային հեռուստատեսությունում, և նրանք պետք է դառնան մեր հանրության հետ խոսելու, երկխոսելու կարևոր մունետիկներ:
Հանրապետության նախագահը հեռուստատեսության հնաբնակներին՝ Արտավազդ Եղոյանին, Կարեն Քոչարյանին և Հասմիկ Մարգարյանին, պարգևատրել է Մովսես Խորենացու մեդալով:
Մովսես Խորենացի մեդալակիր Արտավազդ Եղոյանն ասում է՝ հեռուստատեսությունում հայտնվելու որևէ ակնկալիք չի ունեցել: Ուզել է դերասան դառնալ, մայրը մղել է դեպի բժշկություն, իսկ հայրը՝ ինժեներություն: Բայց ինքը հաղթել է: Եվ ինքնագործ թատերական խմբից սկսված, ֆիլմերի թարգմանությամբ շարունակված ճանապարհը նրան մի օր բերել է հեռուստատեսություն:
Արտավազդ Եղոյան (հեռուստամեկնաբան) - Գիտեք, ես միշտ աշխատելիս չեմ մտածել, որ ինչ-որ պարգևի պիտի արժանանամ, և ընդհանրապես, դա սխալ է, երբ որևէ մեկը ինչ-որ բան անում է պարգևի համար, բայց մի գաղտնիք պիտի բացեմ. երբ պարգև ես ստանում, մի տեսակ հոգիդ փառավորվում է: Ասում ես` վերջապես նկատեցին: Հեռուստատեսային գործունեության ամենամեծ մրցանակը իմ սիրելի հեռուստադիտողի ջանն ու ղուրբանն է: Ընդունում եմ՝ սա լավ է, սա հարգանքի նշան էր, բայց այն, ինչ տալիս է ինձ իմ հեռուստադիտողը, հազար հատ սրանից էլ լինի, տեղը չի բերի:
Ալվարդ Լազարյանը հեռուստատեսությունում է արդեն 32 տարի: Կադրից ու եթերից դուրս` տիկին Ալվարդը մեկիկ-մեկիկ հավաքել է այսօր արդեն պատմություն դարձած հարուստ արխիվն ու ոսկե ֆոնդը:
Ալվարդ Լազարյան (Հանրային հեռուստաընկերության թվային արխիվի ավագ արխիվավար) - Գրիչով գրելուց սկսած մինչև այսօրվա համակարգչային՝ այս թվայնացման աշխատանքները իմ ձեռքի տակով անցել են: Մի նյութը քանի անգամ նայել, դրել ու վերցրել եմ, տվել ենք օգտագործելու: Ամբողջ արխիվը իմ ուղեղի մեջ է:
Պարգևատրման արարողությունից հետո Շոտլանդիա-Հայաստան ֆուտբոլային հանդիպումն էր: Տարիների ընդմիջումից հետո Առաջին ալիքը վերադարձրել է Ֆուտբոլի Հայաստանի ազգային հավաքականի խաղերը հեռարձակելու իրավունքը: Բաց երկնքի տակ` Հանրայինի բակում, մինչև խաղի մեկնարկը նախախաղային քննարկում էր, որին հյուրերն ու հանրայինի թիմը հետևել են տեղում, իսկ հեռուստադիտողը` ուղիղ եթերում: Ապա արդեն ֆուտբոլային հանդիպումն էր, որին ներկաները հետևեցին մեծ էկրանով՝ ուղիղ հեռարձակմամբ:
Հեղինակ` Աննա Զախարյան
