Հայ-վրացական հարաբերություններում դինամիկ զարգացում է արձանագրվում՝ նախագահ Վահագն Խաչատուրյանի պաշտոնական այցի շրջանակում ընդգծում են թե՛ պաշտոնյաները, թե՛ հասարակական գործիչները: Մշակույթ, տնտեսություն, բարձր տեխնոլոգիաներ. քննարկվող թեմաների շրջանակը լայն է: Նախագահի այցի երկրորդ օրվա առանցքում վարչապետ Իրակլի Ղարիբաշվիլիի հետ հանդիպումն է:
Վրաստանի վարչապետը Վահագն Խաչատուրյանին դիմավորեց կառավարության շենքում, որտեղ տեղի ունեցավ երկու երկրների պատվիրակությունների ընդլայնված կազմով հանդիպումը: Խաչատուրյանն ու Ղարիբաշվիլին քննարկեցին Հայաստանի և Վրաստանի հետաքրքրությունների շրջանակում գտնվող օրակարգային հարցերը: Անդրադարձան երկկողմ հարաբերություններին:
Երկկողմ գործակցության զարգացմանն ուղղված քայլերը Հայաստանի նախագահը քննարկեց նաև Վրաստանի խորհրդարանի նախագահ Շալվա Պապուաշվիլիի հետ։ Վրաստանի խորհրդարանի խոսնակն ընդգծեց՝ առանձնահատուկ գնահատում է, որ Հայաստանի նախագահն իր առաջին պաշտոնական այցի համար ընտրել է Վրաստանը:
Շնորհակալություն հայտնելով ջերմ ընդունելության և հյուրընկալության համար` Վահագն Խաչատուրյանը հայտնեց՝ Հայաստանը բարձր է գնահատում և մեծապես կարևորում է հայ-վրացական հարաբերությունները։
Հանդիպման ընթացքում պաշտոնյաներն անդրադարձան տարածաշրջանային անվտանգության և կայունության ամրապնդման հարցերին: Նշեցին՝ և՛ Հայաստանը, և՛ Վրաստանը շահագրգռված են երկարատև և կայուն խաղաղության հաստատմամբ, քանի որ դա է տարածաշրջանի զարգացման հիմնական և ամենակարևոր գրավականը։
Հանդիպման ավարտին Հանրապետության նախագահ Վահագն Խաչատուրյանը գրառում կատարեց Վրաստանի խորհրդարանի պատվավոր հյուրերի գրքում:
Վրաստան կատարած այցի երկրորդ օրը նախագահ Վահագն Խաչատուրյանն այցելեց Խոջիվանքի գերեզմանատուն, որտեղ ամփոփված են հայ գրողների և հասարակական գործիչների աճյունները: Նախագահը ծաղիկներ խոնարհեց ամենայն հայոց բանաստեղծ Հովհաննես Թումանյանի և դրամատուրգ Գաբրիել Սունդուկյանի շիրմաքարերին:
Խաչատուրյանն այցելեց նաև Թբիլիսիի «Հերոսների» հրապարակ, ծաղկեպսակ դրեց հավերժական կրակի մոտ:
Սիմոն Ջանաշիայի անվան Ազգային թանգարանում շրջայցի ընթացքում էլ նախագահին ներկայացվեցին Վրաստանի հնագույն պատմության որոշ դրվագներ:
Հայաստանն ու Վրաստանը շատ ընդհանրություններ ունեն և պետք է միասին գտնեն խնդիրների լուծումը՝ ներկայացնելով պաշտոնական այցի նպատակը` նշեց նախագահը:
Վահագն Խաչատուրյան (ՀՀ նախագահ) - Նույն խնդիրներն են, նույն պրոբլեմները, կենսամակարդակի էական տարբերություններ չկան, բայց միասին որ հարցերը կարող ենք լուծել, հարցեր քննարկել, սկսած տրանսպորտային խնդիրներից, որ ունենք, հիմա իրար հետ պետք է այդ հարցը լուծել: Նույն կամրջի կառուցման հետ կապված. հիմա ավարտում ենք, էլի միասին ենք անում, ու նոր ծրագրեր:
Վահագն Խաչատուրյանն այցը կարևոր քայլ համարեց, ընդգծեց ընդունելության բարձր մակարդակն ու անմիջական վերաբերմունքը:
Վահագն Խաչատուրյան - Միշտ այսպես է եղել. անձամբ ես, երբ որպես քաղաքացի եկել եմ, երբևէ օտար չեմ զգացել ինձ Թբիլիսիում: Հիմա ինձ մի քիչ հեռացրել են այդ անմիջական շփվելու հնարավորությունից, բայց պաշտոնական մակարդակում այդ անմիջականությունը կա:
Ամփոփելով առաջին պաշտոնական այցը` նախագահ Վահագն Խաչատուրյանը վստահություն հայտնեց՝ այն նոր խթան կլինի Հայաստանի և Վրաստանի հարաբերությունների առավել ամրապնդման և խորացման համար:
Հեղինակ` Նորայր Շողիկյան
