Ազգային ժողովի երկու ընդդիմադիր խմբակցությունների պատգամավորներին բացակայությունների պատճառով մանդատից զրկելու որոշում դեռ չկա՝ հայտարարեց ԱԺ նախագահ Ալեն Սիմոնյանը, բայց...
Ալեն Սիմոնյան (ՀՀ ԱԺ նախագահ) - Տրամադրված եմ այդ հարցով դիմել ԱԺ խորհրդին: Ընդհանուր առմամբ, որոշում չկա, սա ամրագրենք, ես խոսում եմ իմ տրամադրվածության մասին։ Կարծում եմ՝ չի կարելի՝ երբ ուզեն՝ գալ նիստի, երբ ուզեն՝ չգալ։ Առավել ևս, որ այդ պատգամավորները վաղուց անցել են թույլատրելի սահմանները:
Ես նման հայտարարություններ անելու իրավունք չունեմ, որովհետև հիմա Արցախի հարցով բանակցային գործընթաց կա՝ շեշտեց Ալեն Սիմոնյանը՝ պատասխանելով հարցին՝ Արցախը լինելո՞ւ է Ադրբեջանի կազմում, թե՞ ոչ: Օրենսդրի ղեկավարի կարծիքով՝ իր կողմից նմանատիպ արտահայտությունները կարող են վնասել բանակցային գործընթացը:
Ալեն Սիմոնյան - Ամեն րոպե իրավիճակ է փոխվում։ Հիմա Հայաստանն ասում է, որ այնտեղ կա Արցախի բնակչություն, որն ունի իրավունքներ, և այդ իրավունքից է պետք բխեցնել կարգավիճակը:
ԱԺ նախագահը ընդդիմության՝ նախարարություններով շրջայցն ու Արցախի հարցով տեսակետ պահանջելը գործողություն անելու իմիտացիա է որակում:
Ալեն Սիմոնյան - Ընդդիմությունը նման հարցադրում անելու բազմաթիվ հնարավորություններ ունի առանց շոուներ կազմակերպելու, այս դահլիճում Կառավարության հետ հարցուպատասխանի ժամանակ, հնարավորություն ունի գրավոր դիմելու:
ԸՆԴԴԻՄՈՒԹՅՈՒՆԸ ՓԱԿՈՒՂՈՒՄ Է. ԱԺ ՆԱԽԱԳԱՀ
Սիմոնյանի գնահատմամբ՝ արդեն բոլորի համար պարզ է, որ ընդդիմությունը շատ ծանր վիճակում է գտնվում՝ փակուղում է, իսկ իշխանությունը նրանց այդ ծանր վիճակից դուրս գալու հարցում չի օգնի, ավելին՝ կառավարող ուժը թույլ է տալու, որ փողոց դուրս եկած ընդդիմությունը «մաշեցնի» իր բոլոր հնարավորությունները:
Ալեն Սիմոնյան - Իշխան Սաղաթելյանը բեմից անընդհատ ինչ-որ ժամանակներ է ասում, ասում է՝ 72 ժամ, հետո՝ օրեր մնացին, ժամեր մնացին, մի քիչ էլ դիմացեք: Իրենք չեն հասկանում, որ հենց այդ բառերով իրենց մատնում են, որ «տուպիկի» առաջ են կանգնած և փորձում են այդ «տուպիկից» ինչ-որ ելք գտնել, բայց ամեն անգամ իրենց երթերը, ցույցերը, ելույթները լսելով՝ ապշում եմ, թե ոնց կարելի է անընդմեջ ընդդիմության կողմից արված 20-30 տարվա սխալների ցիկլի մեջ մնալ ու կրկնել: Ես նրանց հաջողություն եմ մաղթում, նրանց դա պետք կգա:
Հունիսի 3-ին ընդդիմության հրավիրած արտահերթ նիստին իշխանությունը չի մասնակցի: Ալեն Սիմոնյանը հիշեցրեց՝ ընդդիմությունը հայտարարել է, որ այլևս խորհրդարան չի վերադառնա, իսկ փողոցային պայքարի տարբերակն ընտրած ընդդիմության այդ քայլը նա ԱԺ վերադառնալու փորձ է համարում, որով ընդդիմությունը ցանկանում է դուրս գալ իր իսկ կողմից իր համար ստեղծված վատ իրավիճակից: Արտահերթ նիստի օրակարգի թեմայից՝ հայ-ադրբեջանական ու հայ-թուրքական հարաբերությունների քննարկումից, իրենք չեն խուսափում, բայց վստահ են, որ Արցախը փրկում են գործով, ոչ թե Երևանի կենտրոնով շրջապտույտներ անելով:
Ալեն Սիմոնյան - Կամ, ուրիշ բան ասեմ՝ 1998 թ․-ից ի վեր որևէ մեկը խոսե՞լ է Արցախի՝ Ադրբեջանի կազմում չլինելու մասին։ Այդ թվականից Արցախի՝ Ադրբեջանի կազմում լինելու տեսական հավանականությունը եղել է բոլոր իշխանությունների օրակարգում՝ Մադրիդյան սկզբունքները, Մեղրին Արցախով փոխարինելու սկզբունքները:
Օրենսդիր մարմնի ղեկավարը ևս մեկ անգամ շեշտեց՝ Արցախի խնդրի, բանակցությունների հետ կապված բոլոր հարցերում իշխանությունը մաքսիմալ թափանցիկ է գործում:
Հեղինակ՝ Անի Օհանյան
