Հայաստանի Հանրապետության նախագահի պաշտոնում ընտրվելուց հետո Վահագն Խաչատուրյանը առաջին պաշտոնական այցով հարևան Վրաստանում է։ Դիվանագիտական հարաբերությունների 30-ամյակի առթիվ կատարած այցի օրակարգն ընդգրկուն է։ Առաջին հանդիպումը` Օրբելիանի պալատում` նախագահ Սալոմե Զուրաբիշվիլիի հետ։
Զուրաբիշվիլին Խաչատուրյանին դիմավորեց նստավայրի մուտքի մոտ։ Պատվո պահակախումբը հնչեցրեց Հայաստանի Հանրապետության օրհներգը։
Երկու երկրների օրհներգներն ունկնդրելուց հետո նախագահներն ուղևորվեցին առանձնազրույցի։ Դրան հաջորդեց պատվիրակությունների ընդլայնված կազմով հանդիպումը։
Շուրջ 1 ժամ տևած հանդիպումներից հետո արդեն նախագահները հայտարարեցին` չնայած կարճ ժամանակին` քննարկել են երկկողմ և արտաքին օրակարգի բազմաթիվ հարցեր։ Մինչև մանրամասներին անդրադառնալը Սալոմե Զուիաբիշվիլին ընդգծեց` այն, որ դիվանագիտական հարաբերությունների 30-ամյակի տարում Հայաստանի նախագահն իր առաջին պաշտոնական այցը կատարել է Վրաստան, խոսում է երկրների սերտ և բարեկամական հարաբերությունների մասին։
Սալոմե Զուրաբիշվիլի (Վրաստանի նախագահ) - Այս 30 տարում մեր երկու երկրներն անցել են բավականին բարդ ժամանակաշրջանով։ Մեր հարաբերությունները միշտ եղել են բարիդրացիական, և դա արտացոլում է մեր բազմադարյա պատմությունը: Այն կշարունակվի դարերով` բարեկամաբար և փոխադարձ իրար լրացնելով և գործակցելով:
Վահագն Խաչատուրյանը շնորհակալություն հայտնեց գործընկերոջը` ջերմ ընդունելության և արդյունավետ քննարկումների համար, ընդգծեց` հայ-վրացական հարաբերությունների դինամիկ զարգացում է արձանագրվում, իսկ կառավարության ծրագրում այդ հարաբերությունները որակվում են որպես առանձնահատուկ-բարիդրացիական:
Վահագն Խաչատուրյան (ՀՀ նախագահ) - Հարաբերությունների նման որակումը պայմանավորված է ամենաբարձր մակարդակով երկկողմ հարաբերությունների պարբերական բնույթով, միջգերատեսչական ակտիվ շփումներով, ամենատարբեր ոլորտներում փոխգործակցության տեմպի աճով, և, որ շատ կարևոր է՝ վերոնշյալ գործընթացները հիմնված են լիակատար փոխվստահության և հարգանքի վրա:
Վրաստանի նախագահը նշեց` այժմ տարածաշրջանն ու հարևան երկրները գտնվում են նոր մարտահրավերների ու հնարավորությունների առջև։ Այս համատեքստում Զուրաբիշվիլին քննադատեց Ուկրաինայում Ռուսաստանի գործողությունները` ասելով` տարածաշրջանի ապագան կախված է խաղաղ միջավայրից: Անդրադարձավ նաև Հայաստանի և Ադրբեջանի միջև բամակցություններին` հույս հայտնելով, որ դրանք հաջողությամբ կշարունակվեն։
Սալոմե Զուրաբիշվիլի - Ողջունում ենք Եվրամիության ներգրավվածությանը այս գործընթացին: Գիտենք, որ այս բանակցությունների արդյունքներից կախված է այս տարածաշրջանում լիակատար խաղաղության հաստատումը, և այդ խաղաղության հաստատումից են կախված տնտեսական զարգացումը և բոլոր նոր ծրագրերը, որոնք վերաբերում են այս տարածաշրջանին և ստեղծում են ապագայի մեծ հեռանկարներ:
Առանձնազրույցի և ընդլայնված կազմով քննարկման ընթացքում նախագահները կարևորել են բարձր տեխնոլոգիական բնագավառում գործակցությունը։
Վահագն Խաչատուրյան - Մեր երկրների զարգացման ապագան միայն դա կարող է լինել: Մեր տարածաշրջանային հնարավորություններն ու համատեղ գործակցությունը մեծ հնարավորություն կտան նաև հաջողություններ ձեռք բերել: Ինչու ոչ, նաև մեր փորձը փոխանակել, որովհետև ամեն մեկս այդ բնագավառում մեր յուրահատուկ ճանապարհն ենք ընտրել:
Երկկողմ գործակցության շրջանակում Խաչատուրյանն ու Զուրաբիշվիլին քննարկել են նաև տրանսպորտի, կապի, հաղորդակցության և հումանիտար հարցեր։
Վահագն Խաչատուրյան - Քննարկել ենք ենթակառուցվածքային ծրագրերի վերաբերյալ հարցեր, որոնք միտված են` ապահովելու տրանսպորտային և հաղորդակցության միջազգային նախագծերում անհրաժեշտ ներգրավվածությունը: Օրինակ, ինչպիսին է՝ Պարսից ծոց-Սև ծով միջազգային տրանսպորտային միջանցքը:
Հայկական ծագումով Վրաստանի քաղաքացիները ևս ուշադրության կենտրոնում են. Զուրաբիշվիլին ընգծում է` նրանք պետք է պահպանեն իրենց մշակույթը, լեզուն և կարողանան ակտիվ մասնակցել երկրի կյանքին։
Սալոմե Զուրաբիշվիլի - Այս առումով ջանքերը չեն թուլանա՝ հայկական և ադրբեջանական ծագման քաղաքացիների խաղաղ գոյակցումը այս երկրում խոսում է երկրում ստեղծված ներողամտական պայմանների մասին և օրինակ է Կովկասի տարածաշրջանի ու ավանդույթների շարունակության համար:
Ավարտելով ելույթը` Զուրաբիշվիլին Հայաստանին և Վրաստանին խաղաղություն, բարեկեցություն և զարգացում մաղթեց, Խաչատուրյանն էլ վստահություն հայտնեց` քննարկված հարցերն արդյունք կունենան` նոր որակ ու բովանդակություն հաղորդելու հայ-վրացական հարաբերություններին։
Պաշտոնական այցի երկրորդ օրվա ընթացքում Խաչատուրյանը կհանդիպի Վրաստանի վարչապետ Իրակլի Ղարիբաշվիլիի, խորհրդարանի նախագահ Շալվա Պապուաշվիլիի հետ, Հայաստանի նախագահին կհյուրընկալի նաև համայն Վրաստանի կաթողիկոս-պատրիարք Իլյա երկրորդը։
Հեղինակ` Նորայր Շողիկյան
