ՂԱԶԱԽՍՏԱՆԻ ՍԵՆԱՏԸ ՎԱՎԵՐԱՑՐԵԼ Է ՀԱՅԱՍՏԱՆԻ ՀԵՏ ՀԱՄԱՁԱՅՆԱԳԻՐԸ
Ղազախստանի Սենատը վավերացրել է Հայաստանի հետ նավթամթերքի մատակարարման ոլորտում առևտրատնտեսական գործակցության մասին միջկառավարական համաձայնագիրը: Այն կնքվել էր Նուր Սուլթանում 2020 թ. հուլիսին։
Համաձայնագրով ներքին սպառման համար Ղազախստանից Հայաստան մատակարարվող նավթամթերքից արտահանման մաքսատուրքեր չեն գանձվելու: Ընդ որում՝ Հայաստան մատակարարվող ապրանքները ենթակա չեն վերաարտահանման ԵԱՏՄ և երրորդ երկրներ։
Սենատի կողմից վավերացումից հետո համաձայնագիրը ներկայացվել է Ղազախստանի նախագահի ստորագրմանը:
ԹՈՒՐՔԻԱՆ՝ ՇՎԵԴԻԱՅԻ ԵՎ ՖԻՆԼԱՆԴԻԱՅԻ ԱՆԴԱՄԱԿՑՈՒԹՅԱՆ ՄԱՍԻՆ
ՆԱՏՕ-ին Շվեդիայի և Ֆինլանդիայի անդամակցության գործընթացը չի շարունակվի, քանի դեռ Անկարայի պահանջները չեն կատարվել՝ հայտարարել է Թուրքիայի նախագահի պաշտոնական ներկայացուցիչը երկու երկրի պատվիրակությունների հետ բանակցություններից հետո։
«Մենք ցանկանում ենք, որ ահաբեկչական կազմակերպությունների դեմ կոնկրետ միջոցներ ձեռնարկվեն։ Ստոկհոլմի և Հելսինկիի ներկայացուցիչներին փաստեր ենք ներկայացրել, որ Քրդստանի աշխատավորական կուսակցությունը և սիրիական «Ժողովրդական ինքնապաշտպանության ուժերը» ահաբեկչական են։ Նաև բարձրացրել ենք ահաբեկչության մեջ կասկածվող անձանց Թուրքիա արտահանձնման հարցը»,- ընդգծել է Իբրահիմ Քալընը։
Պաշտոնական Անկարան պահանջել է նաև անհապաղ վերացնելԹուրքիա պաշտպանական արդյունաբերության արտադրանքի մատակարարման սահմանափակումները:
«Հելսինկիից և Ստոկհոլմից դրական ազդակներ ստացանք այդ հարցում»,- հավելել է պաշտոնյան։
Շվեդիայի ԱԳ նախարարը հայտարարել է, որ Անկարայի հետ բանակցությունները կշարունակվեն։
ԿՈՒԼԵԲԱՆ ԿՈՉ Է ԱՐԵԼ ԱՐԱԳԱՑՆԵԼ ԿԻԵՎԻՆ ՌԱԶՄԱԿԱՆ ԱՋԱԿՑՈՒԹՅՈՒՆԸ
Ուկրաինայի արտգործնախարար Դմիտրո Կուլեբան հայտարարել է, որ Կիևը Ռուսաստանի հետ դիվանագիտական բանակցությունները վերսկսելու համար նախապայմաններ չունի։
«Կիևի համար էմոցիոնալ առումով չափազանց դժվար է Մոսկվայի հետ նստել բանակցությունների սեղանի շուրջ։ Բայց մենք պատրաստ ենք կառավարել մեր զգացմունքները, եթե դա կօգնի խաղաղություն հաստատել», - պարզաբանել է Կուլեբան։
Արտգործնախարարը կոչ է արել Արևմուտքին արագացնել Կիևին ռազմական աջակցությունը, քանի որ հակառակ դեպքում իրավիճակը Դոնբասում ավելի կվատանա։
Նրա խոսքով՝ Կիևը ողջունում է իրավիճակի կարգավորման ցանկացած նախաձեռնություն, որը չի ենթադրում շփման գծերի ստեղծում և տարածքների զիջում։
ԵՄ ՈՐՈՇ ԵՐԿՐՆԵՐ ԿԻԵՎԻՆ ԱՌԱՋԱՐԿՈՒՄ ԵՆ ՏԱՐԱԾՔ ԶԻՋԵԼ. ՊՈԴՈԼՅԱԿ
Եվրամիության անդամ որոշ երկրներն Կիևին առաջարկում են զիջել տարածքի մի մասը՝ հրադադարի դիմաց՝ հայտարարել է Միխայլո Պոդոլյակը։
Ուկրաինայի նախագահի աշխատակազմի ղեկավարի խորհրդական խոսքով՝ Եվրոպան ցանկանում է վերսկսել բիզնես հարաբերությունները Ռուսաստանի հետ և դրա հա,ար Կիևին ստիպում է նոր «մինսկյան համաձայնագրեր» ստորագրել։
«Մենք վաճառքի չենք հանի մեր քաղաքացիներին ու ինքնիշխանությունը։ Արդյո՞ք պատերազմը սառեցնելու կոչ անողները կպահեն մեր տեղահանվածներին․․․ կասկածում եմ»,- նշել է Պոդոլյակը։
ԱՐԵՍՏՈՎԻՉԸ ՔՆՆԱԴԱՏԵԼ Է ԱՄՆ-ԻՆ ԵՎ ԳԵՐՄԱՆԻԱՅԻՆ
Ուկրաինայի նախագահի աշխատակազմի ղեկավարի խորհրդական Ալեքսի Արեստովիչը քննադատել է արևմտյան երկրներին, մասնավորապես՝ ԱՄՆ-ին և Գերմանիային՝ խոստացված զենքի մատակարարումներն ուշացնելու համար։
«Բեռլինն անուղղակիորեն մեղավոր է մարտի դաշտում ստեղծված իրավիճակի համար։ Մեր Զինված ուժերը վատ վիճակում են։ Պարտվել ենք ռուսական բանակին՝ տեմպերով։ Հնարավոր է՝ նրանք վերադառնան մեր երկրի հյուսիս և ուժեղացնեմ ճնշումը Խերսոն-Զապորոժիե գծի երկայնքով»,- մտահոգություն է հայտնել Արեստովիչը։
Նրա խոսքով՝ Եվրոպայում ձևավորվել է ռուսամետ երկրների բլոկ, որի կազմում են Գերմանիան, Հունգարիան, Իտալիան և Ֆրանսիան. Նրանք կարծում են, թե Ուկրաինան պետք է բանակցություններ սկսի Մոսկվայի հետ։
«Իսկ Եվրահանձնաժողովը համոզված է, որ Կիևը պետք է հաղթի։ Փաստորեն, Եվրոպան լուրջ ճգնաժամի մեջ է»,- համոզմունք է հայտնել պաշտոնյան։
Ավելի վաղ՝ Reuters գործակալությունը, վկայակոչելով իր աղբյուրները, հայտնել էր, որ Իտալիան, Հունգարիան և Կիպրոսը կոչ են արել մայիսի 30-31-ը կայանալիք ԵՄ գագաթնաժողովի եզրափակիչ փաստաթղթում ներառել Ուկրաինայում հրադադարի հաստատման և խաղաղ բանակցությունների վերսկսման մասին դրույթներ։
ՌԴ ՔԱՂԱՔԱՑԻՆԵՐԻ ՀԱՄԱՐ ՈՒԿՐԱԻՆԱ ՄՈՒՏՔԸ ԿԽՍՏԱՑՎԻ
Վոլոդիմիր Զելենսկին ողջունել է Ռուսաստանի քաղաքացիների համար վիզային ռեժիմ սահմանելու մասին միջնորդագիրը և հանձնարարել վարչապետ Դենիս Շմիգալին ուսումնասիրել այդ հարցը։
Կիևը բազմիցս խստացրել է Ռուսաստանի քաղաքացիների համար Ուկրաինա մուտքի գործընթացը։ Ի սկզբանե սահմանը հնարավոր էր հատել ներքին անձնագրերով, այնուհետև կարգը փոխվեց և պահանջվում էր արտասահմանյան անձնագիր: Ռուսաստանի հետ հնարավոր վիզային ռեժիմի հարցը բարձրացվում է 2014 թվականից։
ԻՐԱՆԸ ՉԱՓԱԶԱՆՑ ՄԵԾ ՊԱՀԱՆՋՆԵՐ ՈՒՆԻ. ԱՄՆ ՀԱՏՈՒԿ ՆԵՐԿԱՅԱՑՈՒՑԻՉ
Միջուկային գործարքին վերադառնալու շուրջ Իրանի հետ Վաշինգտոնի բանակցությունների ձախողման հավանականությունն շատ բարձր է։ Նման հայտարարությամբ է հանդես եկել Իրանի հարցով ԱՄՆ հատուկ ներկայացուցիչը։
«Մենք ձգտում ենք Գործողությունների համատեղ համապարփակ ծրագրին վերադառնալուն: Սակայն Իրանը չափազանց մեծ պահանջներ ունի, որոնց ԱՄՆ-ը չի համաձայնի»,- ասել է Ռոբերտ Մելլին։
