Ռոբերտ Քոչարյանի և Արմեն Գևորգյանի գործով ապացույցներից մեկը քննվեց դռնփակ կարգով: Թե ինչ պատճառով` հայտնի չէ, քանի որ պաշտպանական կողմի միջնորդությունը նույնպես այդ ռեժիմում քննվեց:
Մինչ դռնփակ նիստի անցնելը պաշտպանների և դատավոր Աննա Դանիբեկյանի միջև անհամաձայնություններ եղան։ Պաշտպանական կողմը նիստից անմիջապես առաջ երեք միջնորդություն էր ներկայացրել դատարան՝ Ռոբերտ Քոչարյանի խափանման միջոցը փոփոխելու, Արմեն Գևորգյանին երկրից բացակայելու թույլտվություն տալու, ինչպես նաև նախաքննության ընթացքում քննիչի կողմից հավաքված ապացույցները անթույլատրելի ճանաչելու մասին:
Դատարանը, սակայն, որոշեց սկզբում հետազոտել ապացույցները, ապա քննել այս միջնորդությունները: Պաշտպանական կողմը առարկեց դատարանի գործողությունների դեմ:
Հովհաննես Խուդոյան (Ռոբերտ Քոչարյանի պաշտպան) - Իմ ներկայացրած միջնորդությունը վերաբերում է հենց հետազոտության ենթակա ապացույցներին, կոնկրետ առաջինը, կարծում եմ` տրամաբանական է, որ դրա հարցը քննարկվի:
Դատարանը գտնում է, որ ավելի արդյունավետ կլինի այդ միջնորդությունը քննարկել հենց այդ ապացույցը հետազոտելուց հետո՝ հակադարձեց դատավորը.
«Հարգելի մեղադրողներ, խնդրեմ, սկսեք ապացույցները»:
Երբ մեղադրողը սկսեց հրապարակել այն, Արմեն Գևորգյանի պաշտպան Լուսինե Սահակյանը հինգ րոպե ընդմիջում խնդրեց խորհրդակցության համար։
Գևորգ Բաղդասարյան (մեղադրող դատախազ) - Պաշտպանական կողմի գործողություններն ակնհայտորեն ուղղված են ապացույցների հետազոտմանը խոչընդոտելուն: Էս միջնորդություններն էլ ձևական են:
Նիստը ընդմիջելու խնդրանք այս անգամ էլ Քոչարյանի պաշտպաններից Հայկ Ալումյանը ուներ:
Հայկ Ալումյան (Ռոբերտ Քոչարյանի պաշտպան) - Ես ուզում եմ ընդմիջում, հիմա չբացատրեմ` ինչու, որովհետև այդպիսի անհրաժեշտություն ունեմ, հիմա միկրոֆոնից հեռու ասել, որ, օրինակ, ունեմ որոշակի անհրաժեշտություն բնական կարիքները հոգալու:
Նիստը ընդմիջելու անհրաժեշտություն դատարանը չի տեսնում, հայտարարեց Դանիբեկյանը, ինչից հետո պաշտպաններ Հայկ Ալումյանը, Լուսինե Սահակյանը և Հովհաննես Խուդոյանը դուրս եկան նիստերի դահլիճից:
Ռոբերտ Քոչարյան - Անիմաստ լարվածություն եք ստեղծում:
Դատավորը նշեց, որ եթե պաշտպանները մեկ րոպեից չվերադառնան, նիստը կհետաձգվի։ Մեղադրող կողմը նկատեց, որ պաշտպանների գործողություններն ուղղված են ապացույցների հետազոտումը բացառելուն:
Մեկ րոպե անց պաշտպանները վերադարձան, ապա միջնորդեցին ապացույցներից մեկը քննել դռնփակ կարգով, ինչը բավարարվեց: Մի քանի ժամ տևած դռնփակ նիստից հետո դատարանը արդեն դռնբաց նիստում քննեց պաշտպանական կողմի միջնորդությունները:
Գևորգյանի պաշտպան Լուսինե Սահակյանը միջնորդեց թույլատրել իր պաշտպանյալին մայիսի 17-ից 20-ը մեկնել Փարիզ մասնակցելու ԵԽԽՎ հանձնաժողովի նիստերին:
Լուսինե Սահակյան (փաստաբան) - Այլ հարցերի հետ մեկտեղ Արմեն Գևորգյանը պատրաստվում է քննարկման առարկա դարձնել Արցախում ստեղծված հումանիտար աղետի հետևանքով երեխաների իրավունքների ոտնահարման դեպքերը, բացի դրանից՝ Ադրբեջանի մշտական շարունակական ահաբեկչական հռետորաբանությունը և դրա ազդեցությունը երեխաների իրավունքների վրա:
Մեղադրողներն այս միջնորդության դեմ չառարկեցին, լսելով կողմերին` դատարանը բավարարեց միջնորդությունը և թույլատրեց Գևորգյանին ժամանակավորապես բացակայել երկրից:
Այնուհետև պաշտպանը նշեց՝ արտերկիր մեկնելիս Գևորգյանը լուրջ խնդիրների է բախվել՝ վճարումների հետ կապված: Նա միջնորդեց արգելանքից հանել Գևորգյանի հաշվեհամարը, իսկ եթե դատարանը անհնար կհամարի, ապա առնվազն թույլատրի նոր հաշվեհամար բացել: Դատարանն այս միջնորդությունը մասնակի բավարարեց.
«Թույլատրել Արմեն Գևորգյանին բացել հաշիվ, որը կսպասարկի ԱԺ-ից ստացված գործուղման ծախսերը, միևնույն ժամանակ դատարանը որոշեց թույլատրել բանկին փոխանցել պետական բյուջեից Արմեն Գևորգյանի գործուղման համար նախատեսված գումարները»:
Մյուս միջնորդությունն էլ վերաբերում էր Ռոբերտ Քոչարյանի նկատմամբ որպես խափանման միջոց ընտրված գրավը վերացնելուն, որը ընտրվել էր Վերաքննիչ դատարանի որոշմամբ: Հայկ Ալումյանը նշեց՝ Վերաքննիչը՝ հաշվի էր առել նաև այն, որ նախկինում Քոչարյանը զբաղեցրել է նախագահի պաշտոնը:
Նույն մեղադրանքն է առաջադրվել նաև ՀՀ երրորդ նախագահ Սերժ Սարգսյանին: Այս երկու գործերը խափանման միջոցը ընտրելու տեսանկյունից նույնական են: Երկու մեղադրյալներին էլ վերագրվում է միևնույն անձից նույնական գումարների ստացում, երկու մեղադրյալներն էլ Հայաստանի Հանրապետության նախկին նախագահներ են:
Սերժ Սարգսյանի նկատմամբ կաշառքի գործով որպես խափանման միջոց է ընտրված ստորագրությունը, որն, ըստ պաշտպանի, ծառայել է նպատակին: Պաշտպանը միջնորդեց՝ եթե դատարանը գրավը չվերացնի, ապա խափանման միջոց ընտրի ստորագրությունը:
Հաշվի առնելով, որ պաշտպանական կողմը միջնորդությունը հիմնավորող լրացուցիչ նյութեր պետք է ներկայացնի, ուստի քննությունը հետաձգվեց մինչև մայիսի 24-ը:
Հեղինակ` Տաթև Խաչատրյան
