ՄՊՀ նախագահ Գեղամ Գևորգյանը ԱԺ-ում լրագրողների հետ զրույցում անդրադարձավ ՊՇՌ թեստերի գներին։
«Չենք կարող ինտերվենցիա ունենալ այն շուկայում, որտեղ չկա գերիշխող դիրք։ Եթե չկա շուկայում մի տնտեսվարող սուբյեկտ, որը գերիշխող դիրք ունի, նույնիսկ եթե գինը սահմանում է x կամ y, այստեղ Մրցակցության պաշտպանության հանձնաժողովն ինտերվենցիա չի կարող ունենալ»,- ասաց Գևորգյանը։
Նա ավելացրեց, որ օրենքով սահմանված դրույթ չկա, ըստ որի՝ ՄՊՀ-ն գին սահմանելու իրավասություն ունի։
«Ուսումնասիրություն արել ենք, որ տեսնենք՝ գերիշխող դիրք կա՞, թե՞ չկա։ Հիմա երկրորդ փուլի ուսումնասիրությունն ենք սկսել, որտեղ այս առումով օդանավակայանի կողմից իրականացվող ծառայություններն ենք դիտարկում։ Հիմա ես այսօր տվյալ չեմ հրապարակի, որ վարույթի վրա ազդեցություն չթողնեմ, նաև տնտեսվարող սուբյեկտները մեր խոսքի այլ դիրքորոշումներ չունենան, բայց կարծում եմ՝ ամենաշատը 1-2 ամսվա ընթացքում դուք ամբողջ պատկերը կտեսնեք, թե ի՞նչ է տեղի ունեցել ՊՇՌ թեստերի շուկայում, գների դինամիկան ինչպե՞ս է փոխվել, ինչո՞ւ բարձրացան, ինչո՞ւ իջան գները, օդանավակայանն ի՞նչ ծառայություն մատուցեց»,- ասաց Գևորգյանը։
