Բուհերում կառավարման խնդիրները լուծելու համար Կառավարության որոշմամբ կրթական գերատեսչությունը փոփոխություն է կատարում երեք բուհի՝ Երևանի ու Շիրակի պետական, նաև Երևանի պետական մանկավարժական համալսարանների կանոնադրություններում: Նվազեցվել է խորհուրդների կազմը: 32-ի կամ 24-ի փոխարեն նախատեսվում է 20 անդամ, փոխվել է նաև բուհերի խորհուրդների ձևավորման սկզբունքը: Կառավարության այս որոշումը բուհերում միանշանակ չի ընդունվել: ԵՊՀ գիտխորհուրդը երեկ հայտարարություն է տարածել՝ նշելով, որ որոշումն ընդունվել է իրավական ու էթիկայի նորմերի խախտումներով: Հայտարարության մեջ ասվում է, որ edraft.am կայքում հանրային քննարկման ժամկետը մինչև մայիսի 14-ն է սահմանված եղել, այնինչ որոշումը 10 օր շուտ է ընդունվել և գաղտնի՝ առանց նիստ հրավիրելու:
Լուսինե Գրիգորյան (ՀՀ ԿԳՄՍՆ բարձրագույն և հետբուհական մասնագիտական կրթության վարչության պետի տեղակալ) - Գաղտնի որոշում չի կայացվել «Բարձրագույն կրթության մասին» օրենքում շատ է քննարկվել կառավարման հարցը և հոգաբարձուների ձևավորման հարցը, հրատապությունից ելնելով, անհրաժեշտ և արդյունավետ լուծման տարբերակն է: Նախկինի համեմատ հիմնադրի ներկայացուցիչները կազմելու են 11 անդամ, լիազոր մարմնի ներկայացուցիչները՝ 2, պրոֆեսորադասախոսական՝ 2, ուսանողները՝ 5 անդամ: