Ազգային ժողովն ընդունեց այսօր քննարկված նախագծերը:
Երկրորդ ընթերցմամբ քննարկման ներկայացված «Պաշտպանության մասին» օրենքում լրացումներ կատարելու և կից ներկայացված օրենքների նախագծերի փաթեթն ընդունվեց միաձայն՝ 67 կողմ ձայնով:
Նշենք՝ նախագծով օրենսդրորեն սահմանվում է «աշխարհազոր» եզրույթը՝ որպես ՀՀ-ի վրա զինված հարձակման, դրա անմիջական վտանգի առկայության կամ ռազմական գործողությունների պայմաններում ՀՀ զինված պաշտպանությանը կամավորության սկզբունքով քաղաքացիների մասնակցության համակարգ:
ԱԺ-ն երկրորդ ընթերցմամբ 69 կողմ ձայնով ընդունեց Քրեական օրենսգրքում փոփոխություններ կատարելու օրենքի նախագիծը:
Ըստ այդմ՝առաջարկվում են կարգավորումներ Քրեական օրենսգրքի մի շարք հոդվածներով։ Նշված օրենդրական նախաձեռնությունը կատարվում է ռազմական դրության կամ պատերազմի ժամանակ առավել խիստ պատժաչափեր նախատեսելու համար։
«Ռազմական դրության իրավական ռեժիմի մասին» օրենքում լրացումներ կատարելու մասին օրինագիծը ևս ընդունվեց միաձայն՝ 69 կողմ ձայնով:
Օրինագծով նախատեսվում է կարգավորել ռազմական դրության ժամանակ ֆիզիկական և իրավաբանական անձանց գույքի օգտագործման անհրաժեշտություն առաջանալու պարագայում այն օգտագործման վերցնելու հետ կապված հարաբերությունները, ընթացակարգը և երաշխիքները, գույքին հասցված վնասի դեպքում փոխհատուցման պայմանները:
