ԱԺ «Իմ քայլը» խմբակցության պատգամավոր Հայկ Կոնջորյանը այսօր BBC-ի հետ հարցազրույցի ընթացքում հույս է հայտնել, որ Մոսկվայում Հայաստանի, Ռուսաստանի և Ադրբեջանի արտաքին գործերի նախարարների միջև հումանիտար հրադադարի մասին ձեռք բերված համաձայնությունը հնարավոր կլինի լիարժեքորեն հաստատել և ամուր պահել։
Հայկ Կոնջորյան (ՀՀ ԱԺ «Իմ քայլը» խմբակցության պատգամավոր) - Ցավոք, հրադադարի մեկնարկի պահից կարճ ժամանակ անց Ադրբեջանը նորից դիմել է ռազմական սադրանքների և հարձակումների, սակայն մենք աշխատում ենք դիվանագիտական և քաղաքական խողովակներով հրադադարի ռեժիմը ամրապնդելու համար: Հրադադարի հաստատումն առաջին քայլն է արյունահեղությունը կանգնեցնելու համար։ Ադրբեջանը, Թուրքիայի անմիջական աջակցությամբ, ուղղակի սպառնալիք է Լեռնային Ղարաբաղի հայության համար։ Արդեն հայտնի փաստ է, որ Թուրքիան միջազգային ահաբեկիչների է ուղարկել Ադրբեջան՝ կռվելու Լեռնային Ղարաբաղի դեմ։
Փաստացի, Ադրբեջանը, Թուրքիան և ահաբեկիչները ձեռք ձեռքի տված կռվում են ոչ միայն հայերի, այլև ամբողջ տարածաշրջանի դեմ։ Հակամարտությունը պետք է կարգավորվի Արցախի հայության ինքնորոշման իրավունքի սկզբունքի հիման վրա։ Լեռնային Ղարաբաղը հայության պատմական հայրենիքն է, որտեղ հայերը մշտապես կազմել են բնակչության 80 և ավելի տոկոսը, և ԼՂ հայությունը ինքը պետք է որոշի սեփական ճակատագիրը՝ առանց որևէ սահմանափակումների իրացնելով իր անօտարելի իրավունքները։
