ԱՀ ՊԲ հրամանատարի տեղակալ Արթուր Սարգսյանն ասուլիսի ընթացքում հայտնեց, որ Ադրբեջանի բանակն Արցախի Հանրապետության զինված ուժերի մարտակարգերին, մշտական տեղակայման վայրերին, զորամասերին, ինչպես նաև խաղաղ բնակավայրերին, այդ թվում՝ Ստեփանակերտին հասցրել է հրթիռա- հրետանային հարվածներ: Օգտագործել է օդուժ, այդ թվում՝ հարվածային ԱԹՍ-ներ:
«Այնուհետև հակառակորդի հատուկ նշանակության ստորաբաժանումները մոտոհրաձգային և զրահատանկային ստորաբաժանումների ուղեկցությամբ անցել են լայնածավալ հարձակման հարավային, հյուսիսային և հարավարևելյան ուղղությամբ: Այս պահին դեռ ընթնանում են թեժ մարտեր ամբողջ նշված ճակատներով: Հակառակորդն ունի կենդանի ուժի և զրահատեխնիկայի մեծ կորուստներ: Ճշտված տվյալներով՝ Պաշտպանության բանակի ստորաբաժանումները կիրառելով հակաօդային պաշտպանության միջոցներ՝ կարողացել են խոցել երեք ուղղաթիռ, շուրջ 20 ԱԹՍ, այդ թվում՝ հարվածային, 30 տանկ և հետևակի մարտական մեքենաներ:
Նախնական տվյալներով, ցավոք, ԱՀ զինված ուժերում նույնպես կան կորուստներ՝ 16 զոհ և 100-ից ավել վիրավորներ»,- ասաց Սարգսյանը:
Նա նշեց, որ Պաշտպանության բանակի անձնակազմը, յուրաքանչյուր սպա և զինվոր իր առջև դրված մարտական խնդիրը կատարում է պարտքի բարձր գիտակցումով և պատասխանատվությամբ: Սարգսյանի խոսքով՝ անձնակազմի բարոյահոգեբանական վիճակն այս պահին կայուն է և ապահովում է առաջադրված խնդիրների հետագա կատարումը: Նա նաև ընդգծեց, որ համոզված է՝ այս ընթացքում նույնպես կարողանալու ենք հակառաակորդին պարտադրելու, որ նա նորից աղերսի իր հերթական հրադադարն ու խաղաղությունը:
