Մեքենաների տեխզննության գործընթացի ընթացակարգերում փոփոխություններ են նախատեսվում: Կառավարությունը հուլիսի 23-ի նիստում հավանություն տվեց «Ճանապարհային երթևեկության անվտանգության ապահովման մասին» և մի շարք այլ օրենքներում ու օրենսգրքերում փոփոխությունների ու լրացումների նախագծերի փաթեթին, որով նախատեսվում են այդ փոփոխությունները: Այն առաջիկայում կներկայացվի ԱԺ-ի քննարկմանը: 1lurer.am-ը նախատեսվող փոփոխությունների վերաբերյալ զրուցեց «Ճանապարհային երթևեկության անվտանգություն և վերահսկողություն» ՀԿ նախագահ Սերգեյ Ղահրամանյանի հետ:
Ղահրամանյանը նշեց, որ նախատեսվող փոփոխություններով արդիական կլինի ոչ թե տեխզննության կտրոն ունենալը, այլ էլեկտրոնային շտեմարաններում մեքենայի տեխզննություն անցնելը կամ չանցնելը: «Նախագծով նախատեսվում է, որ հիմնականում սպասարկման ոլորտի մեքենաների համար տարեկան երկու անգամ է տեխզննություն պահանջվելու, իսկ մարդատար, անձնական օգտագործման մեքենաների համար 4-10 տարվա մեքենաները կարող են տեխզննություն իրականացնել երկու տարին մեկ անգամ: 10 տարի և ավելի տարիքի մեքենաները՝ ամեն տարի, ինչպես պահանջում է գործող օրենքը»- տեղեկացրեց Սերգեյ Ղահրամանյանը:
Նոր արտադրության մեքենան մինչև 4 տարի տեխզննություն չի անցնելու, իսկ երբ նոր է ներմուծվում մեքենան, պետք է անպայման տեխզննություն իրականացվի ճանապարհային ոստիկանության հաշվառման-քննական ստորաբաժանումներում:
«Ինչպես նշեցի, հստակ պահանջներ են դրվում տեխզննության կայանների վրա, որոնք պետք է վարեն էլեկտրոնային քարտադարաններ, որոնցում պետք է հստակ արտացոլվի, թե որ մեքենան երբ է անցել տեխզննություն, ինչպես նաև սխալ տեղեկությունների կամ գործընթացը թերի իրականացնելու դեպքում կան հստակ պատիժներ, ընդհուպ մինչև լիցենզիայից զրկում: Այդ կայանները պետք է լիցենզավորում ստանան: Դա, բնականաբար, կառավարության հավելյալ այլ որոշումներ է պահանջում, որը մինչև այս ամբողջ փաթեթը ուժի մեջ մտնելը, կարծում եմ, կառավարությունը կիրագործի»,- ասաց Ղահրամանյանը:
Ղահրամանյանը ենթադրում է, որ տեխզննության կտրոնները, գուցե, ընդհանրապես դուրս գան և ամեն ինչ դառնա էլեկտրոնային: «Ճանապարհային երթևեկության անվտանգություն և վերահսկողություն» ՀԿ ներկայացուցչի խոսքով՝ ավտոպատահարների հետ կապված վարչարարության փոփոխություն ևս նախատեսվում է:
«Եթե բացահայտվում է, որ վթարը տեղի է ունեցել այնպիսի գործոնի արդյունքում, երբ մեքենան տեխզննություն չի անցել կամ անցնելիս արատը չի արձանագրվել, այդ դեպքում հատուցում չի պահանջվում: Եթե տեխզննության համար պարտադիր ներկայացվող մեխանիզմներից մեկը չի աշխատել, և տեխզննություն չի անցել, դրա հետևանքով է վթար տեղի ունեցել, իրենց համար փոխհատուցում չի կատարվում: Այսինքն՝ եթե մեքենան վթարվում է, անկախ ամեն ինչից, եթե մեղավորությունը տեխնիկական մասով է, և վարորդը գիտակցել է այդ ամենը, դրա հետևանքով փոխհատուցում տեղի չի ունենա: Մինչև այժմ ինձ նման դեպք հայտնի չէ, որ նման իրավիճակում փոխհատուցում չտան: Այսինքն՝ սա ևս հավելյալ դրդապատճառ է, որ մեքենաները պատշաճ տեխզննություն իրականացնեն, բայց նաև պետք է գիտակցենք, որ այս տեխզննությունը միգուցե նաև «դաժան» երևույթ լինի, քանի որ մեքենաներ կլինեն, որոնք շահագործման ենթակա չեն լինի, և սա կբերի իր հետ սոցիալական որոշակի խնդիրներ հասարակության համար»,- ասաց Ղահրամանյանը՝ նշելով, որ հատկապես Երևանից դուրս քիչ չեն այն մեքենաները, որոնք վատ վիճակում են կամ նույնիսկ ընդհանրապես հաշվառումից հանված են:
Ճանապարհային ոստիկանությունից էլ 1lurer.am-ի հետ զրույցում նշեցին, որ նախագիծը ներկայացրել է ՀՀ տարածքային կառավարման և ենթակառուցվածքների նախարարությունը, և երբ արդեն օրենքն ուժի մեջ մտնի, անհրաժեշտության դեպքում կմեկնաբանեն նաև ճանապարհային ոստիկանությունից:
Տեղեկացնենք, որ նախագծի հիմնավորումներում նշված է, որ տեխնիկական զննության կտրոնի տրամադրման պահանջը հանելու դեպքում վերահսկողությունը կիրականացվի էլեկտրոնային շտեմարանի և արատորոշման քարտի միջոցով: Տեխնիկական զննության արատորոշման քարտը կներառի անհրաժեշտ տեղեկատվություն տրանսպորտային միջոցի, տեխնիկական զննության, ինչպես նաև կրկնակի տեխնիկական զննություն անցնելու վայրի, օրվա, ժամի, տեխնիկապես սարքին ճանաչվելու կամ հայտնաբերված թերությունների վերաբերյալ: Այն նաև տպագրվելու և տրամադրվելու է տրանսպորտային միջոցի սեփականատիրոջը կամ տնօրինողին: Նախագծով նաև նշվում է, որ դրա առկայությունը բավարար է տեխնիկական զննություն անցնելու կամ չանցնելու վերաբերյալ վերահսկողություն իրականացնելու համար: Արատորոշման քարտը լրացվելու է էլեկտրոնային եղանակով:
