Տեղի հայության ջանքերով հաշված ժամերի ընթացքում, տասնյակ բեռնատարների գյուղմթերքը արագ, կազմակերպված իրացնելուց հետո Մոսկվայում «հայկական ծիրան» օպերացիան իր լուծման գագաթնակետին հասավ Վարդավառի տոնին, երբ Հայ Առաքելական Եկեղեցու Սուրբ Պայծառակերպություն տաճարում, օրվա խորհրդին համահունչ մատուցված պատարագից հետո, օրհնված մատաղի հետ ծիրանի հյուրասիրություն կազմակերպվեց մոսկվաբնակների համար:
Եզրաս արքեպիսկոպոս Ներսիսյան (Ռուսաստանի և Նոր Նախիջևանի հայոց թեմի առաջնորդ) - Մեր ժողովուրդը այս պահին դրսևորեց բացառիկ միասնական կամք՝ ցույց տալով իր սերն ու նվիրվածությունը մեր ժողովրդին և հայրենիքի ազգային շահերին և մեկ անգամ հաստատեց, որ իր քրիստոնեական հավատքի մեջ առաջնորդվում է մեծ մարդասիրությունից, բարիք գործելուց:
Մոտ տասը տոննա ծիրան ու դեղձ հայ արտահանողներից գնել ու մոսկվացիներին է բաժանում «Տաշիր» ընկերությունը: Ինքնակազմակերպվելով՝ հայրենակիցներին օգնության ձեռք են մեկնել նաև շատ տեղի հայ ակտիվիստներ: Այս օրերին արված հանգանակություններից ու անձնական միջոցներով տոննաներով գնել են միրգն ու հասցրել քաղաքի հիվանդանոցներ ու մանկատներ:
Կարեն Բաղդասարյան («Տաշիր գրուպ» ընկերության ներկայացուցիչ) -
Բոլորը կազմակերպված եկան, գնեցին, մեր թասիբով ժողովրդի համար: Արդեն 5 տոննա բաժանել ենք, սպասում ենք ևս 5 տոննայի:
Քոչարի պարելով, ջրվելով ու արևահամ միրգը վայելելով՝ հարյուրավոր մոսկվացիներ սատարում են հայ առևտրականին։ Վաղ առավոտից հայկական բերքի բաշխման բարեգործական միջոցառմանը եկեղեցու բակի ամբողջ երկայնքով ձգվող հերթում նաև բազմաթիվ ռուսներ իրենց աջակցությունն են հայտնում հայերին, որոնց «Ֆուդ սիթի» գյուղատնտեսական ապրանքների շուկայի սեփականատերերն ազգային ատելության հողի վրա սադրել էին՝ արգելելով մուտք գործել շուկա ու վաճառք իրականացնել:
Մարինա Ռուդիկ (Մոսկվայի բնակիչ) - Ստեղծված իրավիճակն ինքնին տհաճ է, ցավալի է, որ իրենց ընտանիքները կերակրող մարդկանց աշխատանքին խոչընդոտում են, բայց շնորհակալություն հայերին, որ այսպիսի ճանապարհ գտան կոնֆլիկտային հարցի լուծման համար, Աստված տա՝ ամեն ինչ բարեհաջող ավարտվի:
Իրինա Ֆեոդորովա (Մոսկվայի բնակիչ) - Այսօր եկել ենք մասնակցելու հրաշալի ազգային տոնին, համտեսելու թարմ հայկական ծիրան և ասելու, որ մենք Հայաստանի հետ ենք: Իհարկե, ցավալի է այդ քաղաքական ակցիան, որը խաղաղություն չի բերում, ի հեճուկս դրա, սակայն, հայերի համար այս սուրբ վայրում իրականացվող միջոցառումը միայն խաղաղություն ու բարիք կբերի:
Տեղի հայերն առցանց կոչ են անում բոյկոտել ադրբեջանական ապրանքը, այցելել միայն հայկական սպասարկման կենտրոններ, ռեստորաններ ու սրճարաններ: Եթե առաջին օրը թերահավատներ կային, թե, արկղերով գնելով, բեռնատարների՝ տոննաների հասնող ապրանքն ամբողջությամբ հնարավոր չի լինի իրացնել, ապա այսօր անգամ վարորդներն ու ներկրողներն այլևս չեն ցանկանում վերադառնալ «Ֆուդ սիթի», կրած վնասն էլ նախապես վճարած 75 հազար ռուբլի տեղի վճարն է եղել, հիմա գոհ են ու հպարտ՝ ժողովուրդն իրենց կողքին է, ծիրանն էլ հերթի տակ է վաճառվում, «Բուխտա» և «Մետաքսի ճանապարհ» անունը կրող տարածքներում էլ դեռ շատ ազատ տեղեր կան:
Էդգար Համբարձումյան (ակտիվիստ) - Գնացել էի մի արկղ գնելու «Բուխտայից», տեսա, որ լուսաբանելու կարիք կա, որովհետև մի ֆուռ էր կանգնած, միացրեցի սկսեցի նկարել, չէի կարծում, որ շատ դիտումներ կլինեն, բայց ի վերջո էսօր 500 հազար մարդ նայել է, շատերը գնացին, ֆուռերը եկան հասան, արագ կազմակերպեցինք:
Ռուսաստանում Հայաստանի դեսպանությունն ուշադրության կենտրոնում է պահում խնդիրն ու այն կարգավորելու ուղղությամբ մշտական կապ է պահպանում Մոսկվայի համապատասխան մարմինների հետ: Ներկրողներն ու անհատ ձեռնարկատերերը կարող են անվճար իրավաբանական օգնություն ստանալ, ապրանքն իրացնելու հնարավորություններ են ստեղծվել Մոսկվայում, Տուլայում, Վլադիմիրում, Դոնի Ռոստովում, Վորոնեժում և այլ քաղաքներում:
