Վարչապետ Նիկոլ Փաշինյանը պարետատան նիստին հեռավար կարգով մասնակցելուց հետո հանդես եկավ բրիֆինգով, որին մասնակցեցին նաև Երևանի «Նորք» ինֆեկցիոն հիվանդանոցի տնօրեն Մհեր Դավիդյանցը և Երևան քաղաքի վարչության ՊՊԾ գնդի 5-րդ հատուկ գումարտակի ծառայության տեսուչ, ոստիկանության ավագ լեյտենանտ Վաղինակ Մինասյանը:
Վարչապետը ճեպազրույցը սկսեց վատ նորությամբ․ Հայաստանում այս պահի դրությամբ շուրջ 200 կորոնավիրուսով վարակված կա, որ սպասում է հոսպիտալացվելու իր հերթին։
«Այսինքն՝ այսօր արդեն մեր առողջապահական համակարգն այնքան ծանրաբեռնված է աշխատում, որ հոսպիտալիզացիայի ենթակա հիվանդներին չենք հասցնում տեղավորել հիվանդանոցներում։ Ավելին՝ մենք արդեն ունենք դեպք, որ բժշկական ուշացման պատճառով մարդ է մահացել կորոնավիրուսից»,- նշեց վարչապետը՝ հավելելով, որ ուշացման պատճառը երկակի է։
Վարչապետը նշեց նաև, որ երկու մահվան դեպք է գրանցվել այնպիսի հիվանդների մոտ, որոնք պետք է գտնվեին վերակենդանացման բաժանմունքում, բայց եղել են ընդհանուր բաժանմունքում՝ վերակենդանացման բաժանմունքում տեղ չլինելու պատճառով։
«Այսօր պարետատան նիստին մենք ընդհուպ մոտեցանք որոշում կայացնելու՝ հայտարարել տոտալ և անվերապահ արգելափակում, բայց քննարկումների արդյունքում մենք տեսանք, որ որոշումը չի բերելու ցանկալի արդյունքների ոչ միայն այն պատճառով, որ դրա տնտեսական հետևանքները կլինեն ծանր, բայց առավելևս այն պատճառով, որ համոզված ենք, որ այդ կարանտինը չի պահվելու այն որակով, որը կարող է մեզ բերել ցանկալի արդյունքների։
Որովհետև գործ ունենք հակահամաճարակային կանոնների այնպիսի չպահպանման հետ, որ եթե մենք հիմա Հայաստանի բնակավայրերի հատվածները փակենք, այդ հանդիպումները և խնջույքները տեղափոխվելու են շենքեր, և արդյունքում՝ մենք հարված ենք հասցնելու տնտեսությանը և արգելափակումների բացումից հետո վերադառնալու ենք 600-800 դեպքի։ Իսկ եթե տեսականորեն մենք համարենք, որ ժողովուրդը իրավիճակի լրջությունն այնքան է գնահատել, որ կպահի կարանտինը, ուրեմն այդ հնարավորությունը մենք ունենք այս պահին և հիմա»,- նշեց վարչապետը՝ արձանագրելով, որ հասել ենք կրիտիկական վիճակի և քայլում ենք դժոխքի միջով։
Լուծման միակ տարբերակն էլ, ըստ վարչապետի՝ համընդհանուր, տոտալ հակահամաճարակային շարժումն է Հայաստանի Հանրապետությունում, և երբ մեզնից յուրաքանչյուրը առաջնորդվի կանխավարկածով, որ ինքը վարակված է և չպետք է վարակի մյուսներին, և երբ մեզնից յուրաքանչյուրը առաջնորդվի կանխավարկածով, որ հիվանդանոցային օգնության կարիք կարող են ունենալ ինքն ու իր ընտանիքի ցանկացած անդամ։
Վարչապետը հավելեց, որ ԱՀԿ-ն վերանայել է դիմակներ կրելու արդյունավետության մասին իր նախկինում հնչեցրած կարծիքը, և այն հիմա լիովին համապատասխանում է Կառավարության կայացրած որոշումներին։
«Հակահամաճարակային շարժման կարևորագույն խնդիրներից մեկը պետք է լինի հակաքարոզչությունը չեզոքացնելը հակահամաճարակային գործողությունների վերաբերյալ և իրականացնել տոտալ աջակցություն Կառավարությանը իր քայլերի մեջ։ Մենք այս իրավիճակից ունենք միայն մի ելք, թեկուզ դժոխքի միջով քայլելով՝ մենք կարող ենք դուրս գալ, և դա կարող ենք անել հակահամաճարակային կանոնները պահպանելու և ակտիվ մասնակցություն ցուցաբերելու միջոցով»,- նշեց վարչապետը։
Փաշինյանն ասաց, որ զարմանում է, որ մինչև հիմա ստանում է լուսանկարներ, որոնցում երևում են բազմամարդ հուղարկավորություններ այն պարագայում, երբ տասնյակից ավելի բնակավայրեր են փակվել հենց հուղարկավորության պատճառով։
«Հասել ենք այն եզրին կամ արդեն իսկ հատել ենք այն եզրը, որից այն կողմ դժոխային իրավիճակ է, բայց ուզում եմ ասել նաև Կառավարության անելիքը այս իրավիճակում։ Կառավարությունը անում է երկու քայլ, երկու ուղղությամբ․ ուղիղ, անկեղծ, առանց որևէ մութ անկյուն թողնելու խոսել, հաղորդակցվել ժողովրդի հետ և ներկայացնել ճշմարտությունը։ Երկրորդը՝ բոլոր հնարավոր միջոցները ձեռնարկվում են կորոնավիրուսային մահճակալային, հիվանդանոցային և վերակենդանացման տեղեր ավելացնելու համար»,- նշեց վարչապետ Նիկոլ Փաշինյանը։
