Իրանի ԶՈւ Գլխավոր շտաբի պետ, բրիգադային գեներալ Մոհամադ Բաղերին ՌԴ պաշտպանության նախարար Սերգեյ Շոյգուի հետ ունեցած հեռախոսազրույցի ընթացքում նշել է, որ Իրանի միլիոնավոր ժողովուրդը սգո արարողության ընթացքում վերջին հրաժեշտը տալով նահատակ գեներալ Ղասեմ Սոլեյմանիին՝ ցույց է տվել, որ վրեժխնդրության ժամանակը, տեղը և ձևն Իրանն ինքը կորոշի:
Այս մասին հաղորդում է Fars գործակալությունը և հայտնում, որ գեներալ Բաղերին Ղասեմ Սոլեյմանի նահատակությունը դիտարկել է՝ որպես Արևմտյան Ասիայի տարածաշրջանում խոշոր վերափոխումների սկիզբ:
«Իրանը և Ռուսաստանը, աշխարհի բոլոր ազատ և ինքնիշխան պետությունները պետք է դիմակայեն Միացյալ Նահանգներին և թույլ չտան, որ նրանք կրկնեն նման գործողությունները»,- հեռախոսազրույցի ընթացքում ասել է Բաղերին:
Ռուսաստանի պաշտպանության նախարար Սերգեյ Շոյգուն ցավակցություն հայտնելով Իրանի ժողովրդին, կառավարությանը և Իրանի Զինված ուժերին՝ նշել է, որ գեներալ-գնդապետ Սոլեյմանին ազգային հերոս է և շատ կարևոր դեր է խաղացել Սիրիայում ու Իրաքում ահաբեկչության ջախջախման գործում:
Նշելով, որ գեներալ Սոլեյմանիի դեմ գործված ահաբեկչությունն աննախադեպ գործողություն էր միջազգային հարաբերություններում, Շոյգուն ևս մի անգամ շեշտել է, որ սա համաշխարհային պրակտիկայում առաջին դեպքն էր, երբ մի երկիր փաստացի ահաբեկչություն է իրականացնում և առանց պատճառաբանության սպանում է մեկ այլ պետության պաշտոնյային երրորդ երկրի տարածքում:
