Կառավարության քննարկմանը ներկայացվեց «Համահայկական խաղերի համաշխարհային կոմիտե» ՀԿ-ին կառուցապատման իրավունքով տարածք տրամադրելու մասին Կառավարության որոշման մեջ լրացում կատարելու որոշման նախագիծը:
Փոխվարչապետ Տիգրան Խաչատրյանը նշեց, որ նախորդ տարվա օգոստոսին Կառավարությունը որոշում կայացրեց, որ Համահայկական խաղերի ավանին պետք է հողահատկացում կատարի և կառուցապատման իրավունքով 23 հա-ը գերազանցող չափով հող հատկացվեց: «Ծրագիրը շատ մեծամասշտաբ է՝ մի քանի փուլից է բաղկացած. հիմնականում պետք է իրականացվի հայ բարերարների հանգանակությունների հաշվին: Կառուցումը և երկարաժամկետ կայունությունը ապահովելու համար նախատեսվում է նաև, որ համահայկական խաղերի կոմիտեն պետք է այնտեղ տարբեր գործունեություն իրականացնելու հնարավորություններ ունենա այդ բարդ ենթակառուցվածքը զարգացնելու համար: Մենք առաջին փուլի քննարկման ընթացքում պարզեցինք, որ կառուցումը պետք է շարունակվի 5 տարի: Եթե մենք մտածում ենք 5 տարին հաջորդող ժամանակահատվածի տեսանկյունից, ապա տրամաբանական է, որ այն հարակից օգուտները, որ կարող է այդ համալիրի շահագործումից գեներացվել, և որոնք պետք է ուղղվեն կանոնադրական նպատակների իրականացմանը, թույլ կտան, որ 5-րդ տարուց հետո կազմակերպությունը իր դրամական միջոցներով շարունակի այդ միջավայրը պահպանել և զարգացնել: Կառավարությունը խոստանում է, որ ծախսերը կհատկացնի յուրաքանչյուր տարվա պետական բյուջեով, որոնք որ տարեկան մոտ 35 մլն դրամի չափ են»,- ասաց փոխվարչապետը:
Վարչապետ Նիկոլ Փաշինյանը նշեց. «Իմ դիտարկումն է, որ վերջին տարիներին Սփյուռքից ՀՀ ներդրումների էական ակտիվացում է նկատվում: Երեկ, մասնավորապես, մենք նաև Կոտայքի մարզ կատարած մեր շրջայցի ընթացքում ջերմատներից մեկում, որը Ֆանտան գյուղում էր, էլի Սփյուռքի գործարարներից էր ներդրում անում: Մենք տասնյակ ներդրումներ ունենք, այս նախագիծն էլ Սփյուռքի գործընկերների ներդրումային պատրաստակամությունն է, որոնք ներգրավված են Համահայկական խաղերի կազմակերպման գործում: Էլ չասեմ, որ այսօր Հայաստանում իրականացվող ամենախոշոր ներդրումային ծրագիրը Firebird ընկերության ներդրումային ծրագիրը, որը խոշոր է և ֆինանսական և բովանդակային առումով, և ունի ոչ միայն հայաստանյան, այլև տարածաշրջանային տրամաբանություն, ըստ էության, Սփյուռքի մեր գործարարների և մասնագետների և ներդրողների ներդրումն է, ինչը շատ կարևոր արձանագրում է: Ես մի բան պետք է ասեմ նաև, և դա, ըստ էության, տեղի է ունեցել ուղիղ եթերում: Երևանում, մասնավորապես, մեր շրջայցերի ընթացքում կուսակցական գծով ՔՊ-ի խմբով երբ որ մենք շրջում էինք, տասնյակ սփյուռքահայերի ենք հանդիպել, ովքեր անվերապահ աջակցություն են ցուցաբերում Հայաստանի Կառավարության վարած քաղաքականությանը: Սա շատ կարևոր արձանագրում է: Մեր իրականությունների ընկալման բանաձևումների հետ կապված՝ մենք պետք է շատ լուրջ վերանայումներ անենք, որովհետև մենք պետք է շատ հստակ կարողանանք գնահատել՝ ով ում է ներկայացնում ընդհանրապես, որովհետև մեր իրականության մեջ ընդունված է, որ ով ասես ում անունից ասես կարող է խոսել, որովհետև լեգիտիմության գործոնը միշտ չէ, որ առանձնահատուկ ուշադրության է արժանացել, և այսօր բազմաթիվ մարդիկ իրենց վերապահում են Սփյուռքի անունից խոսել, բայց ընդհանրապես Սփյուռքի, Սփյուռքի մարդկանց հետ որևէ կապ չունեն: ինչ-որ գրասենյակներ, խմբեր, ակումբներ կան, ովքեր իրենց վերապահում են Սփյուռքի անունից խոսել: Ես ուզում եմ պաշտոնապես ասել, որ այդ մարդիկ ընդհանրապես Սփյուռքը չեն, իրենք անհերքելիորեն Սփյուռքից են, բայց Սփյուռքը չեն: Իրենք Սփյուռքում այլևս այնքան ճնշող փոքրամասնություն են, որ ես միանշանակ ասում եմ, որ իրենք ընդամենը լուսանցքային կազմակերպություններ են, և Հայաստանի կառավարությունը այդ կազմակերպությունների հետ ավելի ու ավելի քիչ է գործ ունենալու և, ի վերջո, գործ չի ունենալու, որովհետև այդ կազմակերպությունները, ինչպես ասում են՝ «անունը կա, ամանումը չկա»: Սա է իրականությունը: Մարդկանց հետ շփումը, մարդկանց բազմության հետ շփումը ուրիշ բանի մասին է, անհատ անձանց, ովքեր ինչ-որ վկայականներ ունեն, չգիտես ում կողմից թողարկված, նրանց հետ շփումը բոլորովին ուրիշ բանի մասին է»:
Վարչապետը նշեց, որ մյուս թեման, որի մասին ցանկանում է խոսել, ներհայաստանյան թեմա է բացառապես: «Վերջերս մենք Արմավիրի մարզում էլ այդ թեմային անդրադարձանք, հիմա տեսեք, օրինակ, մեր երկրում կան հողատեսքերի որոշակի գնահատականներ. կան անտառային հողեր, մենք գնում ենք, մեր փաստաթղթերում անտառային հող է, արոտավայր է, հատուկ պահպանվող տարածք է, թղթի վրա դա այդպես է, բայց որ գնում ես, գետնի վրա նայում, իհարկե, այդտեղ չի կարելի ժխտել, որ հողատեսքերի որոշակի էկոհամակարգի մեջ նշանակությունները և այլն մասնագիտական փորձագիտական նրբությունները ես դնում եմ մի կողմ, բայց մենք այս քարտեզն էլ պետք է վերանայենք, որովհետև այն օրը գյուղերից մեկում շատ կոնկրետ բան են ասում, ցույց են տալիս տեղ, սա արոտավայր է, մեզ թույլ չի տրվում այստեղ ներդրում անել այն տրամաբանությամբ, որ այնտեղ արոտավայր է, բայց տեսնում ես՝ քար ու քըռ է, որևէ կենդանի չի կարող այնտեղ արոտ անել, հետևաբար մենք պետք է այդ տրամաբանությունից դուրս գանք: Այս նույն ծրագրի հետ կապված՝ դե յուրե ինքը անտառային և նույնիսկ արգելոցային նշանակության հող է, բայց երբ տեղում ուսումնասիրում ենք, տեսնում ենք, որ, ըստ էության, քար ու քըռի տրամաբանության մեջ գտնվող հող է: Այսպիսի իրավիճակներ մենք ունենք տարբեր տեղերում: Սա պրոբլեմ է, տնտեսական զարգացման այս փուլում պետք է շատ լուրջ, էլի եմ ասում, չվնասելով որևէ էկոհամակարգի, մենք պետք է այստեղ նորից վերագնահատում անենք, նոր քարտեզագրում անենք, նոր գոտիավորում անենք, որպեսզի կարողանանք տնտեսության զարգացման համար արհեստական խոչընդոտ չստեղծել»,- ասաց նա:
