Հայաստանի պաշտպանունակությունը բարձրացնելու համար շատ լուրջ միջոցներ ենք ձեռք բերել, այսօ՛ր արդեն շատ լուրջ միջոցներ ենք ձեռք բերել: Այդ մասին «Հայաստանը և խաղաղությունը ռիսկերի ու հնարավորությունների խաչմերուկում» քննարկման ժամանակ հայտարարեց վարչապետ Նիկոլ Փաշինյանը՝ անդրադառնալով հարցին, թե ինչու այդ միջոցները ձեռք չեն բերվել նախկինում:
«Պայմանական մի ամսաթիվ նշեմ: Ինչո՞ւ մենք այդ միջոցները ձեռք չենք բերել 2020 թվական հոկտեմբերի 6-ից առաջ: Մի՞թե մենք չէինք ուզում, մի՞թե մենք չէինք դիմում: Մենք դիմում էինք բոլորին, բայց մեզ ասում էին, որ մենք հրաժարվում ենք ձեզ վաճառել, որովհետև մենք համոզված չենք, որ դուք այդ սպառազինությունը տեղակայելու եք ձեր՝ միջազգայնորեն ճանաչված տարածքում: Ավելին, մենք կասկածներ ունենք, որ այդ միջոցները կարող են օգտագործվել ձեր՝ միջազգայնորեն ճանաչված տարածքից դուրս:
Եվ 2022 թվականին, երբ մենք Պրահայում հայտարարեցինք, Ադրբեջանի հետ արձանագրվեց, որ ՀՀ-ն և Ադրբեջանի Հանրապետությունը ճանաչում են միմյանց տարածքային ամբողջականությունը և ինքնիշխանությունն Ալմա Աթայի հռչակագրի հիման վրա, և ոչ միայն դա հայտարարեցինք, այլև մեր քաղաքականությունները վերաձևակերպեցինք այդ տրամաբանությամբ, ըստ էության, սպառազինության պաշտպանական միջազգային շուկան մեր առաջ բացվեց, որովհետև մենք ասացինք, որ ՀՀ բանակն իր ինքնիշխան տարածքից դուրս չի կիրառվելու, և մենք, ըստ էության, այդպիսի դե յուրե պարտավորություններ պատրաստ ենք ստանձնել:
Սա ի՞նչ է նշանակում: Սա նշանակում է, որ մենք հայտարարեցինք, հռչակեցինք, որ ՀՀ բանակը կարող է կիրառվել միայն պաշտպանական նպատակներով միայն ինքնիշխան, սեփական, միջազգայնորեն ճանաչված տարածքի ներսում,- ասաց Փաշինյանը և հավելեց.- Հետո պարզվեց, որ շատ դեպքերում կարիք չկա գնալ, դռներ ծեծել: Մեզ ասում են՝ մենք ձեզ կարող ենք առաջարկել սա, և սպառազինության պաշտպանական ամբողջ, գլոբալ շուկան ՀՀ-ի առաջ բացվեց»:
Երկրորդ նյուանսը կապված է ՀԱՊԿ-ի հետ, որովհետև ՀԱՊԿ-ի մասնակցությունը, ըստ Փաշինյանի, լրջագույն խոչընդոտ էր միջազգային շուկային հասանելիություն ունենալու համար: Իսկ 2022 թվականին նույնիսկ մի իրադրություն էր ստեղծվել, որ 100 մլն դոլարի վճարումներ էին արվել, որի դիմաց պետք է հայկական կողմը ստանար տեխնիկա և սպառազինություն, բայց մատակարարումները չէին իրականացվում:
«Այս իրադարձություններն են, որ մեզ հանգեցրել են եզրակացությունների, որ պարադիգմը պետք է փոխենք, որովհետև այն բանաձևերը, որով մենք ճանաչում ենք աշխարհը, այդ բանաձևերը չեն ապահովում մեզ համար ահրաժեշտ կենսական իրողությունների և իրադրությունների ստեղծում: Նաև դա էր պատճառը, և դա լեգիտիմ որոշում էր, որ մենք սառեցրինք մեր անդամությունը ՀԱՊԿ-ին»,- ասաց նա:
