Թուրքիայում երեք ոստիկան զոհվել է, 8 ոստիկան և անվտանգության 1 աշխատակից՝ վիրավորվել «Իսլամական պետություն» խմբավորման անդամների դեմ գործողության ընթացքում՝ հայտնել է Թուրքիայի ներքին գործերի նախարար Ալի Ելիքայան: Նրա խոսքով՝ ոչնչացվել է 6 ահաբեկիչ, որոնք բոլորը Թուրքիայի քաղաքացի են եղել։
Գործողությունն իրականացվել է Յալովա քաղաքից ոչ հեռու գտնվող տանը, որտեղ, ենթադրաբար, թաքնվել են «Իսլամական պետության» անդամները։ Կասկածյալները կրակ են բացել ոստիկանների ուղղությամբ: Տնից տարհանվել են 5 կին և 6 երեխա:
Լրատվամիջոցների փոխանցմամբ՝ տուժածները տեղափոխվել են հիվանդանոց, նրանց վիճակը բավարար է:
Նախորդ շաբաթ Թուրքիայում ձերբակալվել է «Իսլամական պետության» 115 ենթադրյալ անդամ: Ստամբուլի գլխավոր դատախազության տվյալով՝ այդ անձինք ծրագրել էին հարձակումներ իրականացնել Սուրբծննդյան և ամանորյա տոների ժամանակ։
