ԱՄՆ նախագահ Դոնալդ Թրամփը կարծիք է հայտնել, որ ռուս-ուկրաինական ճգնաժամի լուծումը կախված է իր դիրքորոշումից: POLITICO-ին տված հարցազրույցում խոսելով Ուկրաինայի նախագահի հետ առաջիկա հանդիպման մասին՝ Թրամփը նշել է՝ նա ոչինչ չունի, մինչև ես չհաստատեմ դա:
Միևնույն ժամանակ, Թրամփն ակնկալում է, որ Վոլոդիմիր Զելենսկու հետ հանդիպումը լավ կընթանա: ԱՄՆ նախագահը նաև նշել է, որ նախատեսում է զրուցել իր ռուս գործընկեր Վլադիմիր Պուտինի հետ:
Ըստ Politico-ի՝ բացի անվտանգության երաշխիքներից՝ Թրամփ-Զելենսկի հանդիպման ընթացքում կքննարկվի նաև Զապորոժիեի ատոմակայանի կառավարումը և Դոնբասի նկատմամբ վերահսկողությունը:
New York Post-ի հետ զրույցում էլ Թրամփը լավատեսություն է հայտնել Զելենսկու հետ իր առաջիկա հանդիպման արդյունքում խաղաղության համաձայնագրի կնքման առնչությամբ։
«Կարծում եմ՝ մենք լավ հնարավորություն ունենք»,- ասել է նա։
Թրամփի կարծիքով՝ ինչպես Ուկրաինան, այնպես էլ Ռուսաստանը ցանկանում են դա անել: ԱՄՆ նախագահը ևս մեկ անգամ հիշեցրել է, որ ութ հակամարտություն է լուծել, սակայն այս մեկն ամենաբարդն է:
