Հեռուստատեսության և ռադիոյի հանձնաժողովը դեկտեմբերի 12-ին գումարել է իր հերթական նիստը։
Օրակարգում ընդգրկված էր 4 հարց՝
-
«Ինթերնելշնլ մեդիա հոլդինգ» ՍՊ ընկերության նկատմամբ վարչական ակտի ընդունում (սեփական նախաձեռնությամբ հարուցված թիվ 57 վարչական վարույթի եզրափակիչ փուլ).
-
«Ալֆա մեդիա հաուզ» ՍՊ ընկերության նկատմամբ վարչական ակտի ընդունում (սեփական նախաձեռնությամբ հարուցված թիվ 58 վարչական վարույթի եզրափակիչ փուլ).
-
«Օդակ» ՍՊ ընկերության նկատմամբ վարչական ակտի ընդունում (սեփական նախաձեռնությամբ հարուցված թիվ 59 վարչական վարույթի եզրափակիչ փուլ).
-
«Օլլնեթ» ՍՊ ընկերության նկատմամբ վարչական ակտի ընդունում (սեփական նախաձեռնությամբ հարուցված թիվ 63 վարչական վարույթի եզրափակիչ փուլ):
Օրակարգը հաստատելուց հետո հանձնաժողովը որոշում է կայացրել «Ինթերնելշնլ մեդիա հոլդինգ», «Ալֆա մեդիա հաուզ» և «Օդակ» ՍՊԸ-ների նկատմամբ կիրառել վարչական տույժ՝ 100000-ական դրամ տուգանք։
«Տեսալսողական մեդիայի մասին» օրենքի 6-րդ հոդվածի 3-րդ մասի համաձայն՝ հեռարձակողների անվանումներն էկրանային ցուցադրման ժամանակ օտար լեզուներով օգտագործելու դեպքում հայերեն անընդհատ տառադարձությունը պարտադիր է: «Ինթերնելշնլ մեդիա հոլդինգ» ՍՊ ընկերության կողմից հեռարձակվող «Եվրոմեդիա24» տեսալսողական ծրագիրը, «Ալֆա մեդիա հաուզ» ՍՊ ընկերության կողմից հեռարձակվող «Ալֆա նյուզ» տեսալսողական ծրագիրը, ինչպես նաև «Օդակ» ՍՊ ընկերության կողմից հեռարձակվող «Սոնգ ԹիՎի» տեսալսողական ծրագիրը խախտել են վերոնշյալ օրենքը։
Հանձնաժողովն արձանագրում է, որ հեռարձակողները փաստացի ընդունել են իրավախախտման փաստն առ այն, որ էկրանային ցուցադրման ժամանակ ծրագրերի անվանումները նշվել են օտար լեզվով, սակայն ներկայացված բացատրությունները բավարար հիմք չեն կարող հանդիսանալ սահմանված իրավախախտումները չարձանագրելու և ընկերությունների նկատմամբ վարչական պատասխանատվության միջոցներ չկիրառելու համար։
Օրակարգային վերջին հարցը վերաբերում էր «Օլլնեթ» ՍՊ ընկերության նկատմամբ վարչական ակտի ընդունմանը։ Ընկերության կողմից ներկայացված վերահաղորդվող տեսալսողական ծրագրերի ցանկում, բացի փաստացի վերահաղորդվող ծրագրերից, առկա չեն եղել НТВ և ТHT տեսալսողական ծրագրերը։ Ցանցային օպերատորը Հանձնաժողով է ներկայացրել պարզաբանում, որով հայտնել է, որ այդ ծրագրերը վերահեռարձակվել են փորձնական տարբերակով։
Վերոգրյալի համատեքստում Հանձնաժողովը ևս մեկ անգամ արձանագրում է, որ ցանցային օպերատորի լիցենզիա ստացած անձի համար օրենքի 49-րդ հոդվածի 1-ին մասով պարտավորություն է սահմանված Հայաստանի Հանրապետության տարածքում և նրա սահմաններից դուրս գործող հեռարձակողների տեսալսողական ծրագրերը վերահաղորդել տեսալսողական ծրագրերի դիստրիբյուտորի կամ հեռարձակողի հետ պայմանագրի հիման վրա, իսկ «Օլլնեթ» ՍՊ ընկերության կողմից վերը նշված տեսալսողական ծրագրերը վերահաղորդվել են առանց համապատասխան իրավական հիմքերի՝ պայմանագրերի:
Արդյունքում՝ Հանձնաժողովը որոշում է կայացրել «Օլլնեթ» ՍՊ ընկերության նկատմամբ կիրառել վարչական տույժ («Տեսալսողական մեդիայի մասին» օրենքի 57-րդ հոդվածի 6-րդ մաս)՝ 50000 դրամի չափով:
Վերոնշյալ որոշումներն ուժի մեջ մտնելու պահից երկամսյա ժամկետում կարող են բողոքարկվել Հեռուստատեսության և ռադիոյի հանձնաժողով կամ ՀՀ վարչական դատարան:
