ՀՀ էկոնոմիկայի նախարարի տեղակալ Տաթևիկ Սարգսյանը նոյեմբերի 28-ին մասնակցել է «Նորարարական անասնապահություն. կենդանիների նախրաքաշ, բուծում և շուկաներ (INLIMA)» ծրագրի մեկնարկային միջոցառմանը։
Ինչպես հայտնում են էկոնոմիկայի նախարարությունից, ծրագրի նպատակն է նպաստել Հայաստանում անասնապահության ոլորտի կայուն կառավարման և կենսապահովման բարելավմանը կենդանիների կազմակերպված նախրաքաշի, բուծման և շուկաների հասանելիության միջոցով։ Այն իրականացվելու է «Ռազմավարական զարգացման գործակալություն» (ՌԶԳ) ՀԿ-ի կողմից՝ Ավստրիական զարգացման և համագործակցության ծրագրային միավոր Ավստրիայի զարգացման գործակալության ֆինանսավորմամբ:
Ծրագրի իրականացման արդյունքում ակնկալվում են հետևյալ արդյունքները՝ կենդանիների նախրաքաշի համակարգված կառավարում, ԽԵԿ-ի բուծման և վերարտադրողական տեխնոլոգիաների զարգացում, կաթի և մսի շուկաների հասանելիության բարելավում։ Ծրագրով «Գյումրիի սելեկցիոն կայան» ՓԲԸ֊ի բազայի վրա նախատեսվում է տոհմակայանի հիմնում, որը կնպաստի ՀՀ֊ում բուծվող տավարի տոհմային հատկանիշների և մթերատվության բարձրացմանը։
«Գյումրիի սելեկցիոն կայանում տոհմակայանի հիմնման նախաձեռնությունը շատ կարևոր է անասնաբուծության ոլորտի կայուն զարգացման համար, քանի որ տոհմային կենդանիների բարելավված գենետիկան ուղիղ ազդեցություն է ունենում ինչպես կաթի, մսի քանակի ավելացման, այնպես էլ արտադրողականության աճի, ներքին և արտաքին շուկաներում մրցունակության բարձրացման համար»,- նշել է Տաթևիկ Սարգսյանը։
Ծրագրի զուտ բյուջեն՝ ներառյալ բոլոր կողմերի ներդրումները, կազմում է 2,925,255 եվրո, իսկ Գյումրիի տոհմակայանի հիմնման համար նախատեսված զուտ ենթակառուցվաքային ներդրումը կազմում է շուրջ 320,000 եվրո, որը չի ներառում վերապատրաստումների և փորձի փոխանակման համար ներդրումները։
Ծրագրի ավարտին նախատեսվում է ունենալ՝ տոհմակայանի հիմնում և 15000 և ավելի կովերի արհեստական սերմնավորում, 23 արոտավայրային ենթակառուցվածքների հիմնում և 60-ից ավելի հեկտար բարելավված արոտավայրեր, 10 ՓՄՁ աջակցություն, 3 նախրաքաշի քարտեզ և 50-ից ավելի ենթակառուցվածքների նախագծեր։
Միջոցառման ընթացքում ստորագրվել է փոխըմբռնման հուշագիր ՀՀ էկոնոմիկայի նախարարության և «Ռազմավարական զարգացման գործակալություն» ՀԿ-ի միջև: Փաստաթուղթը ստորագրել են ՀՀ էկոնոմիկայի նախարարի տեղակալ Տաթևիկ Սարգսյանը և ՌԶԳ-ի նախագահ Մկրտիչ Այվազյանը։
