Ունենք ծրագիր՝ անձնական տվյալների պաշտպանության նոր, անկախ մարմին ստեղծելու, որը կհամապատասխանի Եվրոպայի 108+ կոնվենցիային և ԵՄ համապատասխան կարգավարումներին: Այդ մասին ԱԺ մշտական հանձնաժողովների համատեղ նիստին ասաց ՀՀ արդարադատության նախարար Սրբուհի Գալյանը՝ պատասխանելով «Հայաստան» խմբակցության պատգամավոր Գառնիկ Դանիելյանի այն հարցին, թե վերջին շրջանում մարդու անձնական կյանքին առնչվող տեսանյութեր են տարածվում համացանցում՝ խախտելով մարդու իրավունքները:
«Անձնական տվյալների պաշտպանության առանձին և անկախ մարմին ունենալու անհրաժեշտությունը բխում է իրականում ԵՄ ստանդարտներից, և միայն ստանդարտներին չէ, որ պետք է նայենք: Մենք պետք է նայենք սոցիալական անհրաժեշտությանը, թե կարիք ունե՞նք նման մարմիններ ձևավորելու, թե՞ չէ:
Ձեր կողմից բարձրաձայնված խնդիրները խոսում են այն մասին, որ մենք նման անկախ, ինքնավար մարմնի կարիք ունենք այս պահին, և այդ ուղղությամբ աշխատանքներն արդեն ձեռնարկել ենք, հայեցակարգը մշակված է, շուտով՝ այս ամսվա վերջ, Կառավարությունում հայեցակարգը պետք է քննարկենք»,-ասաց նա:
Ինչ վերաբերում է պատգամավորի մեկ այլ մտահոգության, այն է՝ հարուցված քրեական գործերի մասով երկակի ստանդարտների կիրառմանը, Գալյանը հաստատեց՝ կան արարքներ, որոնք համարվում են անձնական կյանքին միջամտող և քրեորեն հետապնդելի, բայց վարույթների վերաբերյալ որևէ տեղեկության չի տիրապետում:
