Ընդհանրապես ներքաղաքական բառիս բուն և փոխաբերական իմաստով քաղաքական ժողովրդավարական դեբատները նեգատիվ դեր չեն խաղում արտաքին քաղաքականության մեջ, բայց ինչ մենք ունենք Հայաստանում, դա ներքաղաքական կյանքի հետ կապ չունի, դա արտաքին քաղաքական դրսևորումներ են Հայաստանի ներսում: Մեր ընդդիմության մի հսկայական հատվածի կամ ամենաակտիվ հատվածի խոսույթները և քաղաքականությունը մշակվում են Հայաստանից դուրս: Այդ մասին ԱԺ-ում հայտարարեց վարչապետ Նիկոլ Փաշինյանը՝ պատասխանելով ԱԺ ՔՊ խմբակցության պատգամավոր Շիրակ Թորոսյանի հարցին:
«Իրենք ներքաղաքական կյանքի հետ ոչ մի կապ չունեն, իրենց կապը արտաքին քաղաքական օրակարգերի հետ է, և իրենք արտաքին քաղաքականության ներքին արգելակներն են, իսկ ժողովրդավարական կյանքը ժողովրդավարական երկրին և ժողովրդավարական կառավարությանը չի կարող թուլացնել: Ընդդիմության սեգմենտում մենք ունենք արտաքին էմիսարներ, որոնք կատարում են արտաքին հանձնարարականներ: Դա, կարծում եմ, ակնհայտ է: Հարցը, որը քննարկվում է այդ հարաբերությունների մեջ, եթե ներքաղաքականի կոնտեքստում նայենք, մի բանի մասին է՝ ՀՀ-ն պե՞տք է լինի անկախ պետություն, թե՞ չպետք է լինի անկախ պետություն: Խաղաղության օրակարգն էլ սրա հետ կապ ունի, որովհետև խաղաղությունն ինքը անկախության գործոն է, կոնֆլիկտը կախվածության գործոն է:
Ներքին դաշտում գործող որոշ արտաքին ուժեր դժգոհ են նրանից, որ Հայաստանը հաղթահարել է այդ իրավիճակը, հիմա մեզ փորձելու են հետ քաշել, այստեղ ինչպես միշտ վճռական խոսքը ժողովրդինն է լինելու, և ես համոզված եմ, որ ժողովուրդը չի կարող ինքն իր դեմ գործել»,- նշեց Փաշինյանը:
Նրա խոսքով՝ Հայաստանում և Հայաստանից դուրս կան մարդիկ, ուժեր, որ ասում են՝ Հայաստանը կործանվում է, իրենք ուրիշ երկրի մասին են խոսում, իրենք Հայաստանը չեն ճանաչում:
«Այսօր շատ ծանր, շատ բարդ պրոցեսների արդյունքում ՀՀ-ն և ՀՀ առաջնորդությունը և ժողովուրդը գտնվում են ուրիշ հարթության մեջ, իրենք ուրիշ կինոյի մեջ են, մենք՝ ուրիշ պատմության մեջ: Այդ կինոն ավարտվել է վաղուց, բայց իրենք շարունակում են խոտանված կադրերը հանել, հետևից կպցնել, ու էդ կինոյի սցենարը նրա մասին է, որ Հայաստանը կործանվում է, որովհետև իրենց սոցիալ-հոգեբանությամբ իրենց գործունեության օբյեկտը կործանվող Հայաստանն է, երբ որ Հայաստանը չի կործանվում, իրենք չեն կարողանում այդ Հայաստանի հետ հարաբերվել: Որպեսզի իրենք լինեն, պետք է լինի Հայաստանի կործանման սցենարը: Ընդդիմությունն ինչո՞ւ է բացակա, որովհետև իրենց բոլոր թեզերը ջարդվել են, որովհետև իրենց մոտ վերջին կադրերն էլ են պրծնում, չկա, որ բերեն վերջից կպցնեն և ասեն՝ հետաքրքիր դրվագներ, հիմա գան ի՞նչ հարցնեն, չի կարելի անընդհատ խոտանված կադրերով քաղաքականություն վարել, խոտանված կադրերով կինոն շարունակել, որովհետև մարդիկ ձանձրանում են, իսկ այն պատմությունը, որը մենք ենք ներկայացնում, այդ պատմությունը հետաքրքիր է երկու պատճառով, որ ինքը նախ՝ նոր է սկսել, և իր մեկնարկի և շարունակության տրամաբանությունը բոլորովին ուրիշ բանի մասին է:
Մի՛ զարմացեք, որ մարդիկ ասում են՝ կործանվում են, նայում ես, ասում ես՝ էս ինչի մասին են խոսում. 2020-ին դրա մասին խոսեին, 2021-ին, 2022-ին, դա հասկանալի է, բայց եթե մի բան կործանվել է, կործանվել է նրանց ալգորիթմը՝ Հայաստանի իրենց պատկերացումների ալգորիթմը: Այսօր Հայաստանը ծաղկող, զարգացող, ինքնիշխան, անկախ, ինքնուրույն պետություն է»,- ասաց վարչապետը:
Նա անդրադարձավ նաև ընդդիմության այն հայտարարություններին, թե Հայաստանի կառավարությունը Ադրբեջանում և Թուրքիայում ինչ ասում են, դրանով է առաջնորդվում:
«Հայաստանի կառավարությունը, ես կուսակցության 7-րդ համաժողովում իմ ելույթում առիթ ունեցա մանրամասն ցույց տալ` մենք շարժվում ենք մեր ժողովրդի ասածով, մենք անում ենք այն, ինչ մեր ժողովուրդն ուզում է, հակառակ դեպքում մենք 2021 թվականին ընտրվելու շանս ո՞նց կունենայինք»,- նշեց Նիկոլ Փաշինյանը:
«Շաբաթը 4 անգամ հեղափոխություն էին անում, բա էդ հեղափոխությունները ինչի՞ չեն հաջողվել: ՀԱԵ բռնազավթածների մասին ենք խոսում, ես էլի ասում եմ` մեկը հարց չի՞ տալիս՝ Կտրիճ Ներսիսյանն իր անունը դրել է Ամենայն Հայոց կաթողիկոս, Ամենայն Հայոց կաթողիկոսը վեր կենա, ասի՝ էս կառավարության և էս կուսակցության օգտին մի՛ քվեարկեք, ժողովո՛ւրդ, էդ կուսակցությունը գնա ընտրություններում սահմանադրական մեծամասնությո՞ւն ստանա: Այդ ժամանակ է Կտրիճ Ներսիսյանը կարգալույծ եղել, որ ժողովուրդն ասել է՝ դու ո՞վ ես, դու ի՞նչ ես քեզնից ներկայացնում ընդհանրապես, ժողովուրդը իրեն կարգալույծ է արել վաղուց, և մենք՝ որպես ժողովրդի լիազոր ներկայացուցիչներ, պետք է այդ վճիռը ի կատար ածեինք, բայց ոչ թե որ ուզում են բռնություն, տեսարաններ, բռնության կարիք չկա, պետք է ընդամենը իրողություններն արձանագրել»,- ասաց վարչապետը:
