Ազգային ժողովի հոկտեմբերի 2-ի նիստին ընդունվեցին առաջին ու երկրորդ ընթերցմամբ և ամբողջությամբ քննարկված մի շարք նախագծեր:
Առաջին ընթերցմամբ քննարկված և ընդունված նախագծերից է ՀՀ ջրային օրենսգրքում փոփոխություններ և լրացումներ կատարելու մասին և «Հայաստանի Հանրապետության ջրի ազգային ծրագրի մասին» օրենքում փոփոխություն կատարելու մասին օրենքների նախագծերի փաթեթը, որով նախատեսվում է ջրային ոլորտի խնդիրների լուծման համար նոր կարգավորումներ սահմանել՝ կապված ազատ ջրօգտագործման, ջրօգտագործման թույլտվության գործողության ժամկետի երկարաձգման, տրամադրման, հայտերի մերժման, ջրային ռեսուրսների ծանրաբեռնվածության հաշվարկը միջազգային փորձին համապատասխանեցնելուն ուղղված լուծումների հետ և մի շարք այլ կարգավորումների մասին:
Խորհրդարանը չընդունեց «Հայաստան» խմբակցության՝ առաջին ընթերցմամբ ներկայացրած նախագիծը, որը նախատեսում էր փոփոխել Քրեական օրենսգրքի 136-րդ հոդվածը, որը վերաբերում է ցեղասպանություններին և մարդկության դեմ ուղղված հանցագործությունները հրապարակայնորեն հերքելուն, արդարացնելուն, դրանք քարոզելուն կամ դրանց վտանգավորությունը նսեմացնելուն:
«Քաղաքացիական պայմանագիր» խմբակցության ղեկավար Հայկ Կոնջորյանը հայտարարեց, որ դեմ են քվեարկելու նախագծին:
Երկրորդ ընթերցմամբ և ամբողջությամբ ընդունված նախագծերի թվում է «Հայաստանի Հանրապետության քրեական օրենսգրքում փոփոխություն կատարելու մասին» և ««Ռազմական ոստիկանության մասին» օրենքում լրացումներ ու փոփոխություն կատարելու մասին» օրենսդրական փաթեթը, որի ընդունման անհրաժեշտությունը պայմանավորված է վարժական հավաքներից խուսափելու դրսևորման ձևերն օրենսդրորեն սահմանելու, արարքի նկարագրությունը հստակեցնելու, իսկ արարքը կատարված լինելու դեպքում պատասխանատվությունը խստացնելու, ինչպես նաև ռազմական ոստիկանության խնդիրները ու լիազորությունները հստակեցնելու անհրաժեշտությամբ:
Երկրորդ ընթերցմամբ և ամբողջությամբ ընդունվեց նաև «Քաղաքացիական պայմանագիր» խմբակցության պատգամավորներ Սերգեյ Բագրատյանի, Ալեն Սիմոնյանի, Հասմիկ Հակոբյանի և Արուսյակ Ջուլհակյանի հեղինակած ««Ճանապարհային երթևեկության անվտանգության ապահովման մասին» օրենքում լրացում կատարելու մասին» և «Վարչական իրավախախտումների վերաբերյալ ՀՀ օրենսգրքում փոփոխություն կատարելու մասին» օրենքների նախագծերի փաթեթը, որով առաջարկվում է արգելել տրանսպորտային միջոցներում լրացուցիչ ուժեղացուցիչների և բարձրախոսների տեղադրումը, քանի որ դրանցից հնչող բարձր երաժշտությունն ու ձայները կարող են խախտել հասարակական անդորրը, դժվարացնել շչակների ձայնը լսելը և շեղել վարորդներին:
