Աղբի վերամշակման ոլորտում մեր խնդիրը մենք գնահատում ենք հրատապ, և աղբի վերամշակման գործարանի կառուցումը մենք գնահատում ենք հրատապ, այս ծրագիրը մեզ համար առաջնահերթություն ունի, այն աստիճան, որ մենք զուգահեռ երկու պրոցես ենք իրականացնում: Իրականում՝ որ պրոցեսով կտեսնենք, որ արդյունքը ավելի մոտ ենք ստանալու և արդյունավետ է լինելու, այդ պրոցեսով էլ առաջ կշարժվենք։ Ասուլիսին ասաց Երևանի քաղաքապետ Տիգրան Ավինյանը:
«Հիմա մենք ունենք երկրորդ զուգահեռ գործընթացը, որը ենթադրում է համայնք-մասնավոր գործընկերությամբ երկփուլ մրցույթի կայացման պրոցես։ Երբ խոսում ենք աղբի վերամշակման կայանի ծախսերի մասին, պետք է հասկանանք, որ աղբը իրենից ունի որոշակի արժեք, և այդ արժեքը ով ճիշտ կկարողանա առաջարկել ուտիլիզացնել, մասնավորապես էներգիայի տեսքով, նա էլ կկարողանա հաղթել։ Ընդ որում՝ պարտադիր չի, որ համայնքը մեծ ներդրումներ ունենա այս ծրագիրը իրականացնելիս»,- ասաց նա՝ ընդգծելով, որ Երևան քաղաքի համար առաջնային խնդիր է Նուբարաշենի աղբավայրի կոնսերվացումն ամբողջապես։
«Ամռան շոգին ունենում ենք բռնկումներ, և դրանից հետո քաղաքապետարանն աղբավայրի կառավարման պրոցեսն այս փուլում վերցրել է իր վրա, և մենք տեխնիկա ենք այնտեղ տանում, և մեր տեխնիկան պետք է մեր վերահսկողությամբ ապահովի աղբավայրի կոնսերվացումը։ Մեզ համար գերխնդիր է աղբավայրի՝ օր առաջ կոնսերվացումը»,- ասաց Երևանի քաղաքապետը։
«Մենք երկու ճանապարհով ենք գնում՝ միջազգային գործընկերների հետ ինստիտուցիոնալ ճանապարհը, որը միանշանակ լավ ճանապարհ է, ու մեր համար կարևոր է, թե ինչքան ժամանակ է տևելու։ Երկրորդ ճանապարհը՝ մենք բազմաթիվ առաջարկներ ենք ստացել միջազգային խոշոր աղբի վերամշակման գործարանների կողմից, որոնք առաջարկում են կառավարման իրենց մոդելը, որոնց հիման վրա մենք ուզում ենք իրականացնել երկփուլ մրցույթ։ Մենք հասկանալու ենք, թե քաղաքի համար լավագույն տարբերակը ո՛րն է, որը կարող է ընդունելի լինել Կառավարության համար, ՀԾԿՀ-ի համար, պատրաստում ենք փաթեթ մրցույթի և առաջարկում ենք մասնակցել այդ մրցույթին»,- ասաց նա:
