Կառավարությունը հավանություն տվեց որպես նվիրաբերություն գույք ընդունելու, ամրացնելու և անհատույց օգտագործման իրավունքով տրամադրելու մասին որոշման նախագծին։
«Ներկայացվող փաթեթն, ըստ էության, վերաբերում է Կառավարության 3 որոշումների, որոնք ներառված են նիստում: Այս նախագծերի ընդունումը բխում է Կառավարության՝ սպորտի ոլորտում որդեգրած ռազմավարությունից, որով մենք, մի կողմից, նպատակ ունենք զարգացնելու սպորտային ենթակառուցվածքները, և մյուս կողմից էլ այդ սպորտային ենթակառուցվածքների զարգացման ընթացքում առանձնահատուկ գնահատել և նաև ճանաչելի դարձնել մեր անվանի մարզիկների փորձը, վաստակը և նաև դրանով խրախուսել նորանոր երեխաների՝ զբաղվելու սպորտով։ Սրանով նախատեսվում է, որ մենք որպես նվիրաբերություն ընդունում ենք գույք, ամրացնում ենք և անհատույց օգտագործման իրավունքով տրամադրում ենք, որպեսզի տեղի ունենա նշված մարզակառույցների կառուցումը և հետագա շահագործումը։ Ամբողջական փաթեթը վերաբերում է երեք մարզակառույցների. առաջինը հանրաճանաչ բռնցքամարտիկ Վախթանգ (Վիկ) Դարչինյանի բռնցքամարտի ուղղվածությամբ մարզակառույցն է, որը պետք է կառուցվի Վանաձորում։ Վանաձորում այս մարզակառույցի կառուցման նպատակով մեզ է նվիրաբերվում 3 հողամաս, որոնք սեփականության իրավունքով պատկանել են Վախթանգ Դարչինյանին, մեր հանրահայտ ծանրամարտիկ Յուրի Սարգսյանին և ըմբշամարտիկ Ստեփան Սարգսյանին։ Մեր երեք մարզիկների գույքի նվիրաբերման արդունքում մենք հնարավորություն ենք ստանում Վանաձորում կառուցել բռնցքամարտի ժամանակակից և արդիական համալիր։
Միևնույն ժամանակ մենք մեր մյուս երկու մարզիկների անունով մարզակառույցների հետ կապված աշխատանքներն ենք պլանավորում, մասնավորապես, Ստեփան Սարգսյանի անվամբ ըմբշամարտի մարզակառույց կկառուցենք հենց իր ծննդավայր Լոռու մարզի Թումանյան համայնքի Շամուտ բնակավայրում։ Ընդ որում՝ պետք է նշեմ, որ արդեն իսկ նախընթաց աշխատանք է կատարված, մասնավորապես, մարզակառույցի համար հատկացված հողատարածքի նշանակությունը փոխված է, որպեսզի հնարավոր լինի կառուցապատում, ինչպես նաև ավագանու որոշմամբ այդ նվիրաբերության գործընթացն արդեն իսկ տեղի է ունեցել: Կառավարության որոշումով կկարողանանք մեկնարկել բուն գործընթացը։ Այստեղ էլ կունենանք ըմբշամարտի մարզադպրոց:
Յուրի Սարգսյանի մասով կունենանք նաև իր ծննդավայր՝ Արմավիրի մարզի Խոյ համայնքի Գեղակերտ բնակավայրի այն մարզադպրոցը, որտեղ հենց ինքը մարզվել է: Սա առանցքային է, որովհետև մենք միասին երկար քննարկել ենք լուծման տարբերակը, և մեր ծանրամարտիկը ցանկություն էր հայտնել, որ հենց այն մարզադպրոցը, որտեղ ինքը մարզվել է, ունենա արդիական պայմաններ, և սա նշանակում է, որ մենք Գեղակերտում կհիմնանորոգենք գոյություն ունեցող մարզադպրոցը։ Ընդ որում՝ քանի որ մարզադպրոցը եղել է «Սևան» գյուղական մարզական ՀԿ-ի սեփականությունը, ՀԿ-ի նախագահության որոշմամբ դա նվիրաբերվել է ՀՀ-ին, ինչը նշանակում է, որ մենք մարզադպրոցը կհիմնանորոգենք և այնուհետև անհատույց օգտագործման կտրամադրենք Սևան մարզական կազմակերպությանը մարզադպրոցի աշխատանքները կազմակերպելու համար։
Մյուս երկու կառույցները կհատկացվեն սպորտի կառավարման կենտրոն ՓԲԸ-ին, որը մեր գույքային միասնական կառավարիչն է: Այս որոշումից հետո կկարողնանաք նվիրաբերության պայմանագրերը, գույքի հանձնում-ընդունումն իրականացնել, որից հետո կմեկնարկի նախագծումը»,- ասաց ԿԳՄՍ նախարար Ժաննա Անդրեասյանը։
«Ես կարևորում եմ այս նախագիծը մի քանի ուղղությամբ, մի քանի հայեցակարգային պատճառով. առաջինը՝ նախ, մենք արձանագրում ենք սրանով, որ ՀՀ կառավարությունն, ըստ էության, արժևորում է այն սպորտային ժառանգությունը, որ մենք նախկինում տարբեր ժամանակներում ունեցել ենք։ Ինչպես առիթ ունենում եմ ասելու հիմնականում Իրական Հայաստանի գաղափարախոսության շուրջ քննարկումների տիրույթում, մենք անընդհատ խոսում ենք արժեքների կիրառական նշանակության մասին։ Ոչ կիրառական նշանակությունն այն է, որ կարող ենք հոբելյանից հոբելյան հիշել մարդկանց, նրանց վաստակը, Հայաստանին նրանց մատուցած ծառայությունները, որը լավ է, որը կարվի, իսկ մյուս դեպքում, երբ որ ունենում ենք Վիկ Դարչինյանի անվան դպրոց, Ստեփան Սարգսյանի, Սիմոն Մարտիրոսյանի անվան դպրոց, որն արդեն գործում է, Արթուր Աբրահամի անվան դպրոցը, որը կառուցվում է, Ալբերտ Ազարյանի անվան դպրոցը, որի հիմնարկեքը արեցինք, Հրանտ Շահինյանի անվան դպրոցը, որը շուտով շահագործման կհանձնենք, Արթուր Ալեքսանյանի անվան դպրոցը, որը երկար կառուցվում է, կիրառական նշանակությունն այն է, որ երեխաներն ամեն օր առնչվում են այդ ժառանգության հետ, և սա երաշխիք է, որ այդ ժառանգությունը ոչ միայն չի մոռացվի, այլև ժառանգության պարունակած էներգիան կծառայի հետագա հաջողությունների և հետագա ժառանգության համար»,- նշեց վարչապետ Նիկոլ Փաշինյանը։
Քաղաքաշինության կոմիտեի նախագահ Եղիազար Վարդանյանը հայտնեց, որ Արթուր Աբրահամի դպրոցի նախագծման աշխատանքներն ամբողջությամբ ավարտվել են։ «Ես կարևորում եմ, որ Արթուր Աբրահամն ուղեկցել է նախագծման ամբողջ ընթացքը, և նախագծի մեջ ներդրվել է միջազգային եվրոպական լավագույն փորձը իր աջակցությամբ, իր ուղեկցմամբ։ Կառույցը կազմված է լինելու մեկ ստորգետնյա և երեք վերգետնյա հարկերից, ունենալու է շուրջ 5400 քմ տարածք, որում ներառված են լինելու և՛ ըմբաշամրտի, և՛ բռնցքամարտի դահլիճներն իրենց բոլոր ենթակառուցվածքներով, մարզիկների համար անհրաժեշտ՝ միջազգային չափանիշներին համապատասխան բոլոր ենթակառուցվածքներով։ Լինելու է ընդհանուր խաղային մարզաձևերի դահլիճ, ուժային մարզումների դահլիճ։ Այս ամբողջն արդեն ավարտվել է, հայտարարվել է շինարարական աշխատանքների ձեռքբերման մրցույթ։ Հայտերի բացումը կկայանա սեպտեմբերի 22-ին. կունենանք շինարար ու բուն շինարարական աշխատանքները կմեկնարկենք»,- ասաց նա։
«Մենք իրականացրել ենք ամբողջական հետազոտություն, ընդ որում՝ սպորտի ռազմավարության համաձայն՝ այդպիսի տվյալների հավաքագրումը մենք պետք է դարձնենք ամենամյա, որը ցույց է տալու մեր հանրության շրջանում առողջ ապրելակերպի և սպորտով զբաղվելու վարքականոնը, որպեսզի կարողանանք զուգահեռ հետևել և տեսնել՝ ինչպես է փոխվում հանրային վարքականոնը այդ ենթակառուցվածքների զարգացմանը զուգընթաց. ավելի հաճա՞խ են մարդիկ զբաղվում սպորտով, ավելի հաճա՞խ են ֆիզիկական առողջ ակտիվություն ցուցաբերում: Եվ կարծում եմ, որ այս համալիր գործողությունները իսկապես կտան արդյունք, հատկապես որ այս պահին մենք ունենք 214 մեդալ, և սա նախորդ տարվա այս ժամանակահատվածի համեմատ ավելի է 17 մեդալով»,- ասաց Ժաննա Անդրեասյանը։
Եղիազար Վարդանյանը նաև տեղեկացրեց, որ ավարտական փուլում են Մալխաս և Ռոման Ամոյանների մարզադպրոցի աշխատանքները։ «Հոկտեմբեր ամսին կավարտենք նախագծման աշխատանքները և սահմանված կարգով ընթացք կտանք, ինչպես նաև Օլիմպիական հերթափոխի պետական մարզական քոլեջի համար նախագծում ենք և նոյեմբերին կավարտենք բռնցքամարտի մասնաշենքը և ձյուդոյի մասնաշենքը. շուրջ 1200 քմ տարածքով և նախագծերը ավարտելուց հետո դա էլ կդնենք սահմանված ընթացքով շինարարության մեջ»,- նշեց նա։
