Նախորդ տարի մենք որոշակի օրենսդրական փոփոխություններ ներկայացրինք, որից հետո Կառավարության որոշում ընդունվեց, որով սահմանվեց, որ անշարժ գույքի նկատմամբ կիրառվող սահմանափակումները, որոնք կազմվում և ներկայացվում են Կադաստրի կոմիտե համապատասխան սահմանափակման կիրառման լիազորություն ունեցող մարմինների կողմից, Կառավարության որոշումից հետո պետք է Կադաստրի կոմիտե ներկայացվեն բացառապես էլեկտրոնային համակարգերի միջոցով:
Սա մեզ օգնում է, որպեսզի մենք որոշման կայացումից անմիջապես հետո էլեկտրոնային համակարգերի միջոցով ստանանք տեղեկատվություն, որ տվյալ անշարժ գույքի կամ սուբյեկտի նկատմամբ կիրառված է որոշակի սահմանափակումներ գույքի տիրապետման, տնօրինման նկատմամբ: Նախկինում այդ փաստաթղթերը Կադաստրի կոմիտե ներկայացվել են փոստային ծառայության միջոցով, որը ժամանակատար էր ու առաջ է բերել որոշակի խնդիրներ: Այդ մասին Ազգային ժողովի՝ սեպտեմբերի 8-ի նիստին «Գույքի նկատմամբ իրավունքների պետական գրանցման մասին» օրենքում լրացումներ և փոփոխություններ կատարելու մասին և կից ներկայացված օրենքների նախագծերի փաթեթը առաջին ընթերցմամբ ընդունելու մասին հարցի քննարկման ժամանակ ասաց Կադաստրի կոմիտեի ղեկավար Սուրեն Թովմասյանը:
Նրա խոսքով՝ այս նախագծով կանոնակարգվում է հաջորդ հատվածը, որը տեղի է ունենում դատարաններում:
«Դատարաններում որոշակի լսումների ժամանակ ևս որոշումներ են կայացվում գույքի նկատմամբ որոշակի սահմանափակումներ կիրառելու, և այդ սահմանափակումները ներկա դրությամբ ևս Կադաստրի կոմիտե ներկայացվում են թղթային տարբերակով: Այս նախագծով առաջարկում ենք, որ այն նույն էլեկտրոնային համակարգը, կամ եթե դատարանները կունենան իրենց ներքին էլեկտրոնային համակարգերը, ապա փոխգործելիության միջոցով գույքի նկատմամբ կիրառվող սահմանափակումները դատական պրոցեսների ժամանակ ևս Կադաստրի կոմիտե ներկայացնեն էլեկտրոնային եղանակով, որը անմիջապես հնարավորություն կտա մեզ նույնականացնել գույքը հենց այդ պահին և տեղափոխել տվյալ սահմանափակումը գույքի էլեկտրոնային գրանցամատյան և դրա վերաբերյալ տեղեկատվությունը անմիջապես արտապատկերել, որից անմիջապես հետո տրվող յուրաքանչյուր տեղեկատվություն արդեն բովանդակային առումով իր մեջ կպարունակի հենց այդ պահին առժամանակյա ճշգրիտ թվային տվյալներ»,- պարզաբանեց Թովմասյանը:
Նա ընդգծեց՝ Կադաստրի կոմիտեի որևիցե աշխատակից դատարանի որոշումների, վճիռների կամ քննիչների կայացրած որոշումների քննարկման լիազորություն չունի:
«Մենք կատարում ենք համապատասխան որոշման պահանջները: Կուզեմ բոլորին հայտարարել՝ Կադաստրի կոմիտեն գույքը ոչ վերցնում է սահմանափակման, ոչ էլ հանում է սահմանափակումից, այլ առաջնորդվում է բացառապես դրա տակ եղած որոշումներով»,- նշեց նա:
Հարակից զեկուցող, պատգամավոր Ալխաս Ղազարյանի խոսքով՝ նախագծերի փաթեթով ակնկալվում է ապահովել դատարանների կողմից անշարժ գույքի սահմանափակումներ կիրառելու և վերացնելու վերաբերյալ կայացված ակտերը էլեկտրոնային եղանակով անշարժ գույքի պետական ռեգիստր ներկայացնելը, որն էլ իր հերթին հանգեցնելու է տվյալ ակտերի անհապաղ կատարմանը՝ խուսափելով անհարկի ձգձգումներից և ակտերի ժամանակավրեպ դառնալուց:
