Աբու Դաբիի հանդիպումից գոհ եմ, դրական եմ գնահատում հանդիպումը: Այդ մասին ասուլիսին ասաց ՀՀ վարչապետ Նիկոլ Փաշինյանը՝ անդրադառնալով Աբու Դաբիում Ադրբեջանի նախագահ Իլհամ Ալիևի հետ հանդիպմանը:
«Նախ՝ եկեք արձանագրենք հետևյալը, որ ես այսօր մտածում էի, որ Աբու Դաբին առաջին դեպքն էր, որ երկու կողմերը իրար հետ քննարկել են, նախապես որոշել են, որ ինչ-որ մի տեղ հանդիպելու են և խոսելու են, այսինքն՝ նախկինում այդպիսի բան չէր եղել:
Տիրանայում մենք խոսել ենք, ես եմ նախաձեռնել այդ խոսակցությունը Տիրանայում, և հետո խոսել ենք, պարզվել է՝ կա հետաքրքրություն ավելի մանրամասն խոսելու, ասել ենք՝ եկեք պայմանավորվենք, պայմանավորվել ենք, հանդիպել ենք, ընդ որում՝ ասում են՝ ով է որոշել, որ Աբու Դաբիում, և ինչու Աբու Դաբիում: Նախորդիվ, չեմ հիշի՝ որ թվականին էր և հեռախոսազրույցի ընթացքում և հատուկ այդ հարցով ԱՄԷ-ի նախագահի բանագնաց էր եկել, ԱՄԷ նախագահի ուղերձն էր բերել, ով ասում էր, որ եթե դուք և Ադրբեջանն ունենաք պլատֆորմի կարիք՝ մենք առանց միջնորդական դերի հավակնության ամեն ինչ կկազմակերպենք: Ուզում եմ ԱՄԷ նախագահին շնորհակալություն հայտնել մեզ աջակցելու, բարձր մակարդակով կազմակերպելու համար:
Աբու Դաբիում դրական խոսակցություն է եղել, որը կարող է ունենալ դրական արդյունքներ, ինչ արդյունքներ՝ ես դրա մասին խոսելը հիմա ճիշտ չեմ համարում: Նկատի ունեմ՝ դա պրոցես է, այնպես չի, որ հիմա ինչ-որ բան հստակ պայմանավորվել ենք, եղել են գաղափարներ, եղել են և պարզվել է, որ այդ գաղափարներից կան մի քանիսը, մասնավորապես, որ կողմերը դրական են վերաբերում, բայց դա կարող է կողմերը 5 օրից մտածեն, որ դա այդքան էլ դրական չի, կամ մտածեն, որ դրական է, կամ մտածեն ավելի դրական դառնա վերաբերմունքը: Դա նշանակում է, որ իրականություն կդառնա, բոլորս կտեսնենք: Ես նկատի ունեմ, որ այնպես չէ, որ երկաթյա պայմանավորվածություն է, որոշակի ըմբռնում է: Այդ քննարկումն ինքնին շատ կարևոր և շատ լավ քննարկում է, որ և ես հույս ունեմ, որ մենք այս ֆորմատով կշարունակենք մեր խոսակցությունը Աբու Դաբիում, որևէ այլ տեղ»,- նշեց Նիկոլ Փաշինյանը:
Հիշեցնենք՝ հուլիսի 10-ին Հայաստանի Հանրապետության վարչապետը և Ադրբեջանի Հանրապետության նախագահը հանդիպել են Աբու Դաբիում (Արաբական Միացյալ Էմիրություններ) և քննարկել Հայաստան-Ադրբեջան միջպետական հարաբերությունների կարգավորման օրակարգի տարբեր ասպեկտներ:
Կողմերը հաստատել են, որ երկկողմ բանակցությունները հարաբերությունների կարգավորման գործընթացին վերաբերող բոլոր հարցերը հասցեագրելու ամենաարդյունավետ ձևաչափն են, և այդ հիմքով պայմանավորվածություն է ձեռք բերվել շարունակել արդյունքին միտված այդպիսի երկխոսությունը:
