Ապօրինի գույքի բռնագանձման գործի շրջանակում հունիսի 20-ին ՀՀ գլխավոր դատախազություն է կանչվել Ոստիկանության պետական անվտանգության գլխավոր վարչության նախկին պետ Արամ Զաքարյանը։
«Ղեկավարվելով «Ապօրինի ծագում ունեցող գույքի բռնագանձման մասին» օրենքի 16-րդ և 17-րդ հոդվածներով՝ ծանուցում եմ, որ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Ձեզ պատկանող գույքի առնչությամբ իրականացվել է ուսումնասիրություն, որի արդյունքում կազմվել է ամփոփագիր»,- azdarar.am հարթակում տեղադրված հրապարակման մեջ։
Հիշեցնենք, որ Արամ Զաքարյանին մեղադրանք էր առաջադրվել այն բանի համար, որ նա, 2016 թվականի հոկտեմբերի 12-ից մինչև 2018 թվականի հուլիսի 12-ը ներառյալ զբաղեցնելով ՀՀ ոստիկանության ՊՊԳ վարչության պետի պաշտոնը, հանդիսանալով մշտապես իշխանության ներկայացուցչի գործառույթներով օժտված պաշտոնատար անձ, օգտագործելով պաշտոնեական դիրքը, կազմակերպել է իր ղեկավարած գլխավոր վարչության ենթակա ստորաբաժանման՝ Արմավիրի պահպանության բաժանմունքի պետ Խոսրով Անդրոյանի կողմից նույն բաժանմունքի ջոկի հրամանատար Արա Ասատրյանի և հաշվապահ Գայանե Արշակյանի օժանդակությամբ՝ օբյեկտների պահպանության իրականացման մասին պայմանագրերով տնտեսվարող սուբյեկտների վճարած առանձնապես խոշոր չափերով գումարների յուրացման եղանակով հափշտակությունը:
Այսպես, 2016 թվականի հոկտեմբերի 12-ին ՀՀ ոստիկանության պետական պահպանության գլխավոր վարչության պետի պաշտոնում նշանակվել է Արամ Զաքարյանը, այդ պաշտոնը զբաղեցրել է մինչև 2018 թվականի հուլիսի 12-ը: ՀՀ ոստիկանության ՊՊԳ վարչության պետ հանդիսացած Արամ Զաքարյանը, հիշյալ պաշտոնում նշանակվելուց հետո, նույն վարչության Արմավիրի պահպանության բաժանմունքի պետի պաշտոնը՝ 2013 թվականի հունիսի 13-ից զբաղեցրած Խոսրով Անդրոյանին հրահանգել են հիշյալ պայմանագրերի հիման վրա տնտեսվարող սուբյեկտների կողմից տրամադրվելիք վարձավճարներից հափշտակել գումարներ՝ իրեն տալով հափշտակված գումարներից ամսական մասնաբաժին՝ երաշխավորելով, որ հափշտակությունը չի բացահայտվի:
Նույն ժամանակահատվածում Խոսրով Անդրոյանը, չունենալով կանխիկ գործարքներ իրականացնելու իրավունք, հիշյալ տնտեսվարող սուբյեկտների հետ ձեռք է բերել բանավոր պայմանավորվածություն պայմանագրերով նախատեսված վարձավճարները համապատասխան հաշվեհամարներին փոխանցելու փոխարեն առձեռն իրեն տրամադրելու վերաբերյալ: Այնուհետև, Խոսրով Անդրոյանը նույն բաժանմունքի ջոկի հրամանատար Արա Ասատրյանին հանձնարարել է մատուցված պահպանության ծառայության դիմաց տնտեսվարող սուբյեկտներից ամսական գանձվող գումարները ստանալ առձեռն և փոխանցել իրեն: Խոսրով Անդրոյանի հանձնարարությամբ՝ Արա Ասատրյանը յուրաքանչյուր ամիս հիշյալ տնտեսվարող սուբյեկտներից առձեռն հավաքագրել է օբյեկտների պահպանության իրականացման համար կնքված պայմանագրերով սահմանված գումարները, որոնք ամբողջությամբ առձեռն փոխանցել է Խոսրով Անդրոյանին:
Խոսրով Անդրոյանը, նշված գումարները չփոխանցելով բաժանմունքի արտաբյուջետային հաշվեհամարին՝ հափշտակության հանգամանքը քողարկելու նպատակով իրեն օժանդակող՝ 2016 թվականի մայիսի 13-ից մինչև 2018 թվականի նոյեմբերի 20-ը ներառյալ ընկած ժամանակահատվածում բաժնի հաշվապահի պաշտոնը զբաղեցրած Գայանե Արշակյանի հետ նախնական համաձայնությամբ, մեկ միասնական դիտավորությամբ կեղծել է պաշտոնական փաստաթուղթ հանդիսացող «Հիմնարկի արտաբյուջետային միջոցների գոյացման, կատարված ծախսերի և պարտքերի մասին» հաշվետվությունները, որոնցում ներառվել են կեղծ տեղեկություններ այն մասին, թե իբր հիշյալ տնտեսվարող սուբյեկտները չեն վճարել կամ մասամբ են վճարել կնքված պայմանագրով նախատեսված վարձավճարները, որից հետո հաշվետվողական բնույթ կրող հիշյալ պաշտոնական փաստաթղթերը ստորագրվել են Խոսրով Անդրոյանի և հաշվապահ Գայանե Արշակյանի կողմից և դրվել շրջանառության մեջ։
Արդյունքում՝ Արամ Զաքարյանը 2016 թվականի հոկտեմբերի 12-ից մինչև 2018 թվականի հուլիսի 12-ն ընկած ժամանակահատվածում, իր պաշտոնեական դիրքն օգտագործելով, առանձնապես խոշոր չափերի հափշտակություններ կատարելու միասնական դիտավորությամբ, կազմակերպել է իր ղեկավարած գլխավոր վարչության ենթակա ստորաբաժանման՝ Արմավիրի պահպանության բաժանմունքի պետ Խոսրով Անդրոյանի կողմից նույն բաժանմունքի ջոկի հրամանատար Արա Ասատրյանի և հաշվապահ Գայանե Արշակյանի օժանդակությամբ՝ Արմավիրի պահպանության բաժանմունքի հաշվեհամարին փաստացի փոխանցման ենթակա, սակայն առանձին տնտեսվարող սուբյեկտներից Արա Ասատրյանի միջոցով առձեռն ստացված առանձնապես խոշոր չափերով՝ ընդհանուր 17.639.016 ՀՀ դրամ գումարի յուրացման կատարումը, որից Արամ Զաքարյանի կողմից փաստացի յուրացված գումարի չափը կազմել է 18.000 ԱՄՆ դոլարին համարժեք` 8.678.520 ՀՀ դրամ:
