2023 թվականի եվրոպական վիճակագրության վերլուծությունը ցույց է տալիս, որ ԵՄ-ն շարունակում է Ռուսաստանից ներմուծել նավթ, նավթամթերք և բնական գազ (ընդհանուր՝ 29,1 մլրդ եվրոյի չափ), ինչպես նաև սև մետաղներ, նիկել, ալյումին, պլատինի խմբի մետաղներ, պարարտանյութեր և անօրգանական քիմիական արտադրանք (ներառյալ՝ միջուկային վառելիք, ամոնիակ և այլն):
Չնայած 2022 թվականի վերջին - 2023 թվականի սկզբին Եվրամիությունը էմբարգո է հաստատել ռուսական նավթի և նավթամթերքի ներմուծման հանդեպ, ռուսական խողովակաշարով գազի և հեղուկացված բնական գազի մատակարարումների վրա սահմանափակումները չեն ազդել։
Այնուամենայնիվ, եթե 2021 թվականին ռուսական բնական գազը, ըստ ԵՄ խորհրդի, ապահովում էր Միության գազի ներմուծման ավելի քան 40%-ը, ապա 2023 թվականի վերջին այդ մասնաբաժինը նվազել է մինչև 8%: Մասնավորապես, դրա վրա ազդել է մատակարարումների դադարեցումը պայթեցված «Հյուսիսային հոսքի» միջոցով: Ըստ Eurostat-ի տվյալների՝ անցյալ տարի ԵՄ-ն Ռուսաստանից ներմուծել է 16,7 միլիարդ եվրոյի գազային ածխաջրածիններ (ներառյալ խողովակաշարի գազը և հեղուկացված բնական գազը), մինչև 2022 թվականն այն կրճատվել է գրեթե 2,9 անգամ:
Eurostat եվրոպական գործակալության՝ փետրվարի 15-ին հրապարակված վիճակագրության համաձայն՝ 2023 թվականի վերջին ԵՄ 27 երկրում ռուսական ապրանքների ներմուծումը կազմել է 50,64 մլրդ եվրո, իսկ Ռուսաստան ԵՄ արտահանումը կազմել է 38,32 մլրդ եվրո։
2022 թվականի փետրվարից ԵՄ-ն Ռուսաստանի դեմ պատժամիջոցների 12 փաթեթ է ներկայացրել՝ հետևողականորեն նվազեցնելով թույլատրված առևտրի ծավալը։ Եվրահանձնաժողովը պնդում է, որ Ռուսաստանի հետ «նախապատժամիջոցային» առևտրաշրջանառությունից մոտ 147 միլիարդ եվրոն ենթարկվել է սահմանված սահմանափակումների։
