««Բնակչության բժշկական օգնության և սպասարկման մասին» օրենքում լրացումներ կատարելու մասին» օրենքում փոփոխություններ են նախատեսվում: Նախագիծը Ազգային ժողովի՝ սեպտեմբերի 11-ի նիստին առաջին ընթերցմամբ ներկայացրեց Լուսինե Բադալյանը (Նարեկ Զեյնալյանը՝ համահեղինակ):
«Բժշկական կազմակերպությունները, «Պետական գնումների մասին» օրենքով առաջնորդվելով, երբ տենդեր են հայտարարում, տենդերում հիմնականում հաղթում է այն կազմակերպությունը, որն առաջարկում է ամենամատչելի ծառայությունը: Ամենամատչելին միշտ չէ, որ որակի հետ համադրելի է լինում, և այս մրցակցության պայմաններում պետությունը, պետական գնումները և նաև հասարակությունը տուժում են, և որպեսզի մենք կարողանանք որակը շատ բարձր պահել և նաև երաշխավորել պետական պատվերի շրջանակներում մեր քաղաքացիներին մատուցվող առողջապահական ծառայությունների որակն ու հուսալիությունը, դրա համար այս նախագծով անպայման պահանջում ենք համապատասխանության հավաստագիր և ծագման սերտիֆիկատ:
Նաև ունենք այլ պատճառներ, որովհետև եղել են դեպքեր, երբ այս երկու փաստաթղթերի առկայության դեպքում, եթե արտադրող կազմակերպությունը տեսել է որոշակի շեղում իր արտադրանքի մեջ, որն արդեն վաճառված է եղել, իր իսկ հաշվին հետ է կանչել և դրա բոլոր կոմպենսացիաներն արել է իր կողմից: Իսկ եթե չունենք այս փաստաթղթերը, չենք կարող նույնականացնել, և, բնականաբար, ամեն ինչ մնում է կա՛մ հիվանդանոցի, կա՛մ տվյալ պացիենտի վրա»,- ասաց Լուսինե Բադալյանը:
ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը Լուսինե Բադալյանից հետաքրքրվեց՝ ի՞նչ ներդրվող սարքերին է վերաբերում նախագիծը: Լուսինե Բադալյանը պարզաբանեց, որ խոսքը ներպատվաստվող բժշկական արտադրատեսակների մասին է, այն է՝ ինվազիվ բժշկական արտադրատեսակներ, այդ թվում՝ մասամբ կամ ամբողջությամբ օրգանիզմում ներծծվող, որոնք վիրաբուժական միջամտության միջոցով ամբողջությամբ ներմուծվում են մարդու մարմին կամ փոխարինում են էպիթելային մակերեսը կամ աչքի մակերեսը, որոնք վիրաբուժական ընթացակարգից հետո մնում են ներմուծման տեղում: Խոսքը վերաբերում է նաև բժշկական այն արտադրատեսակներին, որոնք վիրաբուժական միջամտության միջոցով մասամբ ներմուծվում են մարդու մարմին, և որոնք վիրաբուժական ընթացակարգից հետո ավելի քան 30 օր մնում են ներմուծման տեղում:
Ընդդիմադիր պատգամավոր Գեղամ Նազարյանը հետաքրքրվեց՝ ինչո՞ւ է օրենքը գործելու միայն պետպատվերի դեպքում: Լուսինե Բադալյանը պարզաբանեց, որ մասնավոր ծառայությունների դեպքում ազատ շուկայական հարաբերություններ են, կազմակերպությունն է դնում գին-որակ համադրությունը և առաջնորդվում է դրանով, ինչով չի կարող պետպատվերի շրջանակներում մատուցվող ծառայությունը առաջնորդվել:
«Դրա համար այստեղ եթե մրցակցությունը ի վնաս պետպատվերի շրջանակներում բուժվող մեր պացիենտի է, մյուս դեպքում խնդիր չկա, և քաղաքացին ինքը կարող է հիվանդանոցից ուզել ծագման սերտիֆիկատը կամ համապատասխանության հավաստագիրը»,- մանրամասնեց Լուսինե Բադալյանը, ապա ներկայացրեց դեպքերից մեկը՝ նշելով, որ հենց նմանատիպ դեպքերից հետո են եկել այն եզրահանգման, որ կարիք կա նախագծի ընդունման:
«Այդպիսի դեպք եղել է, երբ սրտի ռիթմավարի հետ կապված շեղում է առաջացել, և երբ ամբողջ աշխարհից հետ են կանչվել այդ սարքավորումները, և կազմակերպությունը իր վրա է վերցրել նաև հավելյալ վիրահատությունը, նոր սարք տեղադրելը և այլն: Քանի որ նույնականացնելու հնարավորություն չի եղել, չենք կարողացել նույնականացնել, տուժած ենք դուրս եկել»,- ասաց նա, ապա հավելեց. «Լինում է, երբ մարդը գնում է հիվանդանոց, ասենք՝ ոսպնյակի տեղադրման ժամանակ, չնայած ԱՆ-ի կողմից մեծ գումարի տրամադրմանը, ասել են՝ եթե պետպատվերով դնենք, դա այդքան էլ հաջող չի լինելու, եթե վճարովի ծառայությունից օգտվեք, լավ սարքավորում կներմուծենք օրգանիզմ»:
«Քաղաքացիական պայմանագիր» խմբակցության պատագամավոր Արսեն Թորոսյանը հարակից զեկուցող, առողջապահության նախարարի տեղակալ Արմեն Նազարյանից հետաքրքրվեց՝ ռիսկեր չկա՞ն, որ նախագծի ընդունումից հետո բժշկական վճարովի ծառայությունների գները կբարձրանան: Փոխնախարարը բացասական պատասխան տվեց՝ հիմնավորելով. «Վճարովի և պետպատվերով իրականացվող ծառայությունների գների աճ չենք կանխատեսում, քանի որ մեզ հայտնի են ԲԿ-ներ, որոնք, գործելով պետպատվերի շրջանակում, արդեն իսկ գնումն իրականացրել են նշված փաստաթուղթն ունենալու պարագայում, գնաճ չի նկատվել»:
Առողջապահության հարցերի մշտական հանձնաժողովի անդամ Հռիփսիմե Հունանյանը տեղեկացրեց, որ հարցը քննարկվել է համապատասխան հանձնաժողովում ու ստացել դրական եզրակացություն:
