«Կին քաղաքական առաջնորդներ» ցանցի գործունեության 10-րդ հոբելյանական գագաթնաժողովը Բելգիայում է անցկացվում, հենց այստեղ է կայացել նաև առաջինը: Բրյուսելում 2 օր ավելի քան 50 երկրի 250 կին քաղաքական գործիչ, դիվանագիտական ու հասարակական սեկտորի ներկայացուցիչ քննարկում են կարևոր հարցեր, հիմքում խաղաղությունն ու անվտանգությունն է: Գագաթնաժողովին մասնակցում է նաև հայկական պատվիրակությունը՝ վարչապետի տիկին Աննա Հակոբյանի գլխավորությամբ:
Ողջունելով «Կին քաղաքական առաջնորդներ» կազմակերպության գենդերային հավասարությանը և կանանց հզորացմանը ծառայելու մոտեցումը՝ Աննա Հակոբյանը շեշտել է, որ այս հարթակը ավելի լավ աշխարհ ունենալու երաշխիքներից է:
Աննա Հակոբյան (ՀՀ վարչապետի տիկին) - Դա առավել արդիական է այսօր, երբ աշխարհում ավելանում են անվտանգության բացակայությունը, կոնֆլիկտները և հումանիտար աղետները: Երեխաների պաշտպանության միջազգային օրն էր՝ հունիսի 1-ը, երբ իմ ուշադրությունը գրավեց մի վերնագիր. «Ես ուզում եմ թագավոր լինել՝ պատերազմներին վերջ տալու համար»։ Դա մի հայ տղայի պատասխանն էր այն հարցին, թե որն է նրա ամենամեծ ցանկությունը։ Եվս մեկ գլխագիր՝ արդեն միջազգային մամուլից, որ կրկին այդ օրն էր հրապարակվել, այնտեղ գրված էր. «Կիևում 11-ամյա երեխա է զոհվել»: Գուցե այս երկու գլխագրերի միջև կապն այնքան էլ ակնհայտ չէ մեզ՝ մեծերիս համար, բայց ես առավել քան վստահ եմ, որ հայ տղան ցանկանում էր պաշտպանել բոլոր երեխաներին՝ Ուկրաինայում և այլ երկրներում: Ես առավել քան վստահ եմ, որ ուկրաինացի և ցանկացած այլ երկրի երեխա ցանկանում է պաշտպանել այն երեխաներին, որոնք հայտնվել են պատերազմի էպիկենտրոնում` անկախ հանգամանքից, թե նրանք որտեղ են ապրում՝ Ուկրաինայում, Ռուսաստանում, Ադրբեջանում, Հայաստանում, Լեռնային Ղարաբաղում, թե դրա սահմաններից դուրս:
Մեծահասակներն են հռչակել երեխաների պաշտպանության միջազգային օր. շարունակեց վարչապետի տիկինը` ընդգծելով` այնպես, ինչպես ստեղծել են բյուրոկրատիան, ինստիտուտներն ու ռազմավարությունները: Աննա Հակոբյանի խոսքով` հիմա, սակայն, մեծահասակները պետք է լրջորեն մտածեն առաջնահերթությունների մասին, քանի որ 1 տարի 4 ամսում Ուկրաինայում զոհվել է 485, վրավորվել 992 երեխա: Եվ սա մեկն է այն կետերից, որտեղ երեխաների ապրելու հիմնարար իրավունք ապահովել չի հաջողվում:
Աննա Հակոբյան - Սա անհատական և հավաքական ձախողում է: Եկեք մտածենք սրա մասին: Գուցե կին որոշում կայացնողները, համայնքային ղեկավարները կամ ակտիվիստները կարողանան փոխել խնդիրները բռնությամբ և ուժով լուծելու արատավոր օրինաչափությունները: Կարծում եմ` այս համոզմունքն էր պատճառը, որ ավելի քան 20 տարի առաջ ՄԱԿ-ի Անվտանգության խորհուրդն ընդունեց «Կանայք, խաղաղություն և անվտանգություն» N 1325 բանաձևը: Եվ չնայած կանանց դերի բարձրացման համընդհանուր պայմանավորվածությանը` մենք մինչև հիմա թերներկայացված ենք անվտանգության ու խաղաղության հետ փոխկապակցված ցանկացած ոլորտում: Կարծում եմ, որ ղեկավար պաշտոններ զբաղեցնող կանայք այս իրավիճակը փոխելուն միտված ավելի վճռական որոշումներ կայացնելու պատասխանատվություն պետք է ստանձնեն:
Հայ ազգը դարեր շարունակ իր մաշկի վրա զգացել է պատերազմների կործանիչ ազդեցությունը, և հիմա էլ շարունակում է հարձակումների ակատեսը լինել: Լեռնային Ղարաբաղում հայերը տևական ժամանակ է շրջափակված են, խախտված են մարդու հիմնարար իրավունքները:
Աննա Հակոբյան - Չնայած այս ամենին` մենք խորապես համոզված ենք, որ չկա մարդկային տառապանքների հիերարխիա, և չկա այլընտրանք՝ երկխոսությանը և խաղաղությանը: Անձամբ ինձ համար սա կանոն է բոլոր պատերազմող կետերի պարագայում՝ լինի դա Լեռնային Ղարաբաղը, Ուկրաինան, Սուդանը, Պաղեստինը, թե մեկ այլ երկիր: Պատերազմական գոտում գտնվող բոլոր երկրների կանայք պետք է ակտիվացնեն իրենց ջանքերը և սկսեն խոսել ավելի բարձր, քան զենքերի ձայնն է, ավելի բարձր, քան բռնության ու ատելության խոսքն է:
Հոկտեմբերի 19-20 Երևանում կանցկացվի «Կին առաջնորդների դերը ժողովրդավարության, խաղաղության և անվտանգության խթանման գործում» խորագրով միջազգային գագաթնաժողով, հայտարարել է Աննա Հակոբյանը, հույս հայտնել, որ շատերին կտեսնի Երևանում: Վարչապետի տիկնոջ խոսքով` երկօրյա քննարկումների կենտրոնում են լինելու ժողովրդավարությանը, խաղաղությանն ու անվտանգությանն առնչվող հարցեր, հատուկ ուշադրություն են դարձնելու կանանց ամբողջական ու հավասար ներգրավվածության հարցին:
Աննա Հակոբյան - Իմ կողմից խոստանում եմ, որ Երևանում դուք կտեսնեք աշնան գեղեցկությունն ու հայկական ջերմ հյուրընկալությունը: Հույս ունեմ բոլորիդ հանդիպել Երևանում: Դուք կբերեք ձեր ձայնն ու գործողությունները՝ ավելի արդար ու ապահով աշխարհ ունենալու համար:
Մինչև Աննա Հակոբյանի ելույթը` ներկաները դիտել են Հայաստանի մասին պատմող կարճ հոլովակ, որտեղ ներկայացված են մեր երկրի գրավչությունները: Վարչապետի տիկինը գագաթնաժողովի ընթացքում մի շարք կարճ զրույցներ է ունեցել գործընկերների հետ, նաև ներկա է եղել 4 պանելային քննարկումների, որոնց ընթացքում տարբեր երկրներ ներկայացնող բանախոսները խոսել են խաղաղության ու անվտանգության օրակարգում կանանց ներգրավվածության կարևորությունից: Գագաթնաժողովի պատմության ընթացքում առաջին անգամ, միջազգային ինդեքսների տվյալների հիման վրա աշխարհի ամենախաղաղ երկրներին հանձնվել են «Խաղաղության մրցանակներ»:
